Pa Wɛ n cɩga
3
Amʋ bu, yɩ swe wǝǝnu tɩlʋa na jɩgɩ a brɩ-m tɩn.
Nan yɔɔrɩ n pa a niə yam
taa tigi n wʋbʋŋa wʋnɩ.
2 Bɛŋwaanɩ, n na tɔgɩ-ya,
n wʋ́ na mʋmwɛ-dɛɛrɩ,
yɩ wǝǝnu da cwǝŋǝ tɩ pa‑m.
3 Fɔgɩ n ta n jɩgɩ cɩga dɩ sono,
sɩ n yɩ yagɩ-tɩ.
Pa tɩntʋ taa nyɩ dɩ zambili
n na kwe n dɩ n ban nɩ tɩn.
Pa tɩ taa tigi n wʋbʋŋa nɩ wuu,
nɩ n na pʋpʋnɩ-tɩ n tiŋi
kandwa-pɩlɛ yɩra nɩ te tɩn.
4 Kʋntʋ baŋa nɩ mʋ Wɛ dɩ nabiinǝ
wʋ́ taa lagɩ n ni-taanɩ,
yɩ n na yɩrɩ-ŋʋm.
5 Kwe n cɩga maama
n daŋɩ Baŋa-Wɛ baŋa nɩ.
Nan yɩ tɩɩgɩ nmʋ tɩtɩ wʋbʋŋa baŋa nɩ.a
6 Tɩtʋŋɩ dɩlʋ maama n na wʋ́ kɩ tɩn,
ta n ye Baŋa-Wɛ ni nɩ.
Kʋntʋ mʋ DƖ wʋ́ pa wǝǝnu maama kwe tɩ cwǝŋǝ tɩ pa‑m.
7 Yɩ fɔgɩ n jeeli n yuu nɩ
nɩ nmʋ mʋ ye n tiə.
Nan ta n kwarɩ Baŋa-Wɛ
sɩ n daarɩ n kɩ baŋwɩan dɩ balɔrɔ.
8 Kʋntʋ mʋ wʋ́ pa n na yazurə,
yɩ n dam dɩm wʋ́ joori n tɩtɩ nɩ.
9 Kwe n jɩjaanʋ tɩm
n ma n zuli Baŋa-Wɛ,
sɩ n daarɩ n kwe n dayigǝ wʋdiiru pɛɛra n pa‑DƖ.b
10 Kʋntʋ baŋa nɩ mʋ n tuli wʋ́ su
dɩ wʋdiiru,
yɩ sa-dʋŋa dɩ taa daga ba gaalɩ,
pa n yǝri n na wʋ́ kɩ-tɩ mɛ.
11 Amʋ bu, nɩ Baŋa-Wɛ na jɩgɩ-m
DƖ vaŋɩ nmʋ zwɛ, sɩ n sɛ kwiə sɩ n da cwǝŋǝ.
DƖ maa na bwɛ‑m,
sɩ n yɩ pa n yigə nywanɩ.
12 Bɛŋwaanɩ, Baŋa-Wɛ kʋrɩsɩ
balʋ DƖ na soe tɩn mʋ,
nɩ ko na kɩ te dɩ o bu-sono tɩn.c
Swan na lana te tɩn
13 Wʋlʋ maama na lwarɩ swan
yɩ o jɩgɩ yi-pʋrʋ,
kʋ tu yuu ywəmmə.
14 Swan tiini ya jɩgɩ kuri
ya dwe səbu-poŋo.
Ya maa jɩgɩ nyɔɔrɩ
ya dwe səbu-sɩŋa dɩ.
15 Ya ta maa jɩgɩ lʋnnɩ
ya dwe kandwa-ŋʋna.
Nmʋ fra na zʋ woŋo kʋlʋ maama,
kʋ bá yi swan na yɩ te tɩn.
16 Swan ze mʋmwɛ-dɛɛrɩ mʋ o jazɩm nɩ.
Jɩjɩgɩrʋ dɩ yɩrɩ kamunu maa wʋ
pɛɛra yalʋ o na ze o jagwiə nɩ tɩn.
17 Swan cwe sɩm jɩgɩ ywəəni mʋ.
Sɩ tɔgɩm maa paɩ nɔɔna bɩcara zurǝ.
18 Swan nyɩ dɩ tiu kʋlʋ biə
na paɩ ŋwɩa tɩn mʋ,
balʋ na beeri-ya sɩ ba joŋi tɩn
tee nɩ.
Ya ma yǝni ya ja yu-yoŋo ya ba
ya pa balʋ na puuri-ya ba ja tɩn.
19 Baŋa-Wɛ dɛ DƖ swan ŋwaanɩ mʋ
DƖ cwi tɩga baŋa kam kuri.
DƖ ma tɔgɩ DƖ yi-pʋrʋ baŋa nɩ
DƖ pa wɛyuu kʋm dɩ wʋra.
20 DƖ mɛ DƖ yǝno mʋ DƖ pɔɔrɩ
nanɩɩrʋ tɩm yɩra yɩra,
yɩ DƖ daarɩ DƖ pa dʋa taa zɩgɩ
kunkwǝǝnu wʋnɩ ka nɩ.
21 Amʋ bu, ta n maɩ swan cɩga cɩga
dɩ wʋbʋŋ-laarʋ n tʋŋa.
Yɩ pa tɩ vrɩ n jɩŋa nɩ
tɩ daarɩ‑m.
22 Tɩntʋ mʋ wʋ́ pa n ŋwɩa
taa jɩgɩ kuri lanyɩranɩ,
yɩ ka taa jɩgɩ lam ka pa‑m,
nɩ zambili mʋ n dɩ n ban nɩ tɩn.
23 Tɩ ta wʋ́ pa n vəŋə tɔgɩ cwǝŋǝ,
sɩ n yɩ seeri n tʋ tɩga nɩ.
24 N ma n na tigi n siə,
fʋʋnɩ bá taa jɩgɩ-m.
Nmʋ nan na pəni sɩ n dɔ mʋ dɩ,
nń dɔ mʋ yɔlɔlɔlɔ.
25 Fʋʋnɩ bá ja‑m,
nɩ lɛɛrʋ na da tɩ ba n baŋa,
naa cɔgɩm na tʋ nɔn-balwaarʋ yuu nɩ.
26 Bɛŋwaanɩ, Baŋa-Wɛ mʋ wʋ́ pa
n wʋʋ taa tigə.
Wʋntʋ wʋ́ taa cʋ-m cam wʋnɩ,
sɩ kʋlʋkʋlʋ yɩ ja‑m pa n tʋ.
27 N doŋ na maŋɩ sɩ n zən‑o,
yɩ nmʋ na jɩgɩ kʋlʋ
na wʋ́ zən‑o tɩn,
sɩ n yɩ van‑o.d
28 Nmʋ na waɩ n doŋ n wələ lele,
nan yɩ ta dɩd-o nɩ:
«Ve sɩ n jwa joori n ba
sɩ a wəli‑m.»
29 Kʋ na yɩ n farʋ wʋlʋ
na pɛ nmʋ o cɩga tɩn,
yɩ bʋŋɩ lwarɩm sɩ n ma n cɔg-o.
30 Yɩ magɩ kantɔgɔ dɩ nɔɔnʋ
yɔɔ yɩranɩ,
nɩ kʋ tu na wʋ cɔgɩ n yigə
kʋlʋkʋlʋ baŋa nɩ.
31 Yɩ pa n wʋbʋŋa zʋ
nɔn-balwaarʋ kikiə wʋnɩ.
Nan yɩ lwǝni ba tɩtʋŋ-naga kam.
32 Bɛŋwaanɩ, Baŋa-Wɛ culi nɔn-ŋʋllʋ mʋ.
Kʋ nan na yɩ nɔn-ŋʋna,
DƖ lɔgɩ DƖ wʋʋ DƖ brɩ bantʋ mʋ.
33 Baŋa-Wɛ sɔɔlɩ lwarɩm mʋ DƖ yagɩ
nɔn-lɔŋɔ sɔŋɔ nɩ.
Kʋ daarɩ nɔn-ŋʋm sɔŋɔ su
dɩ DƖ yu-yoŋo mʋ.
34 Kʋ na yɩ nɔn-lwɛɛna,
Wɛ nii-ba kafɛ mʋ.
Kʋ daarɩ DƖ yu-yoŋo wʋ balʋ na tu ba tɩtɩ tɩn yuu nɩ.e
35 Swan tu yɩrɩ wʋ́ zaŋɩ mʋ.
Nɔn-joro maa wʋ́ di o cavɩɩra.