2
Amʋ bu, sɛ sɩ n joŋi a zaasɩm dɩm.Kwe niə yalʋ a na pɛ‑m tɩn
n kɩ n bɩcarɩ nɩ.
2 Pʋrɩ n zwa sɩ n ja swan,
n daarɩ n kwe n wʋbʋŋa maama
n pa yi-pʋrʋ.
3 Yɔɔrɩ n beeri yi-pʋrʋ,
sɩ n daarɩ n loori yǝno
dɩ kwǝr-dɩa.
4 Cɛ sɩ n beeri swan,
nɩ ya yɩ səbu-poŋo
kʋlʋ na səgi tɩn mʋ.
5 N na kɩ kʋntʋ, nń lwarɩ Baŋa-Wɛ fʋʋnɩ na yɩ te cɩga cɩga,
yɩ n daarɩ n mɩ dɩ DƖ.
6 Bɛŋwaanɩ Baŋa-Wɛ mʋ kwe swan
DƖ paɩ nabiinǝ.
DƖ ta maa wǝli-ba dɩ yǝno dɩ yi-pʋrʋ.
7 DƖ maa jɩgɩ swan cɩga cɩga
sɩ DƖ kwe DƖ pa nɔn-ŋʋna.
Kʋ ta na yɩ balʋ na yɔɔrɩ
ba tɔgɩ cwǝŋǝ tɩn,
DƖ kwǝli-ba nɩ najara cɩ-kwaŋa mʋ te.
8 DƖ nii kʋ baŋa nɩ mʋ
sɩ cɩga taa tʋŋa,
yɩ DƖ cɩ balʋ na jɩgɩ DƖ cɩga tɩn,
sɩ cam yɩ yi-ba.
9 Nmʋ na sɛ sɩ n joŋi swan,
n laan wʋ́ ba n lwarɩ kʋlʋ na lana
yɩ kʋ tɔgɩ cwǝŋǝ tɩn.
N ta wʋ́ lwarɩ kʋlʋ na maŋɩ kǝm tɩn,
sɩ n wanɩ n tɔgɩ cwə-laa.
10 N wʋbʋŋa maa wʋ́ ja swan,
yɩ yǝno dɩ pa n na wʋpolo lanyɩranɩ.
11 Nmʋ na jɩgɩ wʋbʋŋa te tɩn mʋ
wʋ́ taa kwǝli‑m.
N wʋbʋŋ-ŋʋna maa wʋ́ taa yɩrɩ-m.
12 Kʋntʋ tɩn, n bá ta n tɔgɩ
nɔn-balwaarʋ cwe sɩm,
naa n tʋ pipiri-nyɩna cwǝŋǝ nɩ.
13 Bantʋ maŋɩ ba ywəri cɩga cwǝŋǝ kam nɩ mʋ,
yɩ ba ve lim wʋnɩ.
14 Ba ta soe sɩ ba taa tʋŋɩ lwarɩm mʋ,
yɩ ba wʋʋ dɩ tigə dɩ kǝm-balwaarʋ.
15 Ba yɩ nɔn-ŋʋllʋ mʋ
yɩ ba kikiə ba tɔgɩ cwǝŋǝ.
16 Swan cɩga cɩga wʋ́ cɩ-m dɩ ka-tʋla,
dɩ o na maŋɩ o ŋɔɔnɩ ni-sʋnɩ ŋwaŋa
sɩ o ma sʋgɩ‑m te dɩ.
17 Kʋ tu yagɩ o barʋ wʋlʋ o na zʋ
o dʋnnɩ maŋa nɩ tɩn,
pa o yiri ni dɩlʋ o na goni
Wɛ yigə nɩ tɩn.
18 Cwǝŋǝ kalʋ na ve o sɔŋɔ kʋm nɩ tɩn guri dɩ tʋʋnɩ mʋ.
Balʋ na tɔgɩ da tɩn maa zʋʋrɩ curu.
19 Wʋlʋ maama na ve o te,
kʋ tu daa ba joorə.
O nan daa bá tʋ
ŋwɩa cwǝŋǝ kam wʋnɩ.
20 Nmʋ nan na joŋi swan,
n laan wʋ́ ta n tɔgɩ
nɔn-ŋʋna na-bwərə mʋ,
yɩ n ve cɩga tiinə cwǝŋǝ nɩ.
21 Bɛŋwaanɩ, balʋ na yɔɔrɩ
ba tɔgɩ cwə-laa tɩn mʋ
wʋ́ taa zʋʋrɩ dɩ́ tɩga kam wʋnɩ.
22 Kʋ daarɩ nɔn-balwaarʋ tɩm yɩrɩ
wʋ́ saarɩ tɩga kam baŋa nɩ.
Nɔn-ŋʋllʋ dɩ maa wʋ́ je ka wʋnɩ.