Bɩtar-dɩndɩ 1

Bɩtar-dɩndɩ Tɔnɔ

Yisɩrayɛlɩ tɩʋ pɛ Solɔmɔn na yɩ Davidi bu tɩn bɩtar-dɩndɩ mʋ tɩntʋ.

2 Bɩtar-dɩndɩ yantʋ nan maŋɩ sɩ ya brɩ nɔɔna swan sɩ ya daarɩ ya zaasɩ-ba. Yaá wǝli nɔɔna sɩ ba taa ni yi-pʋrʋ taanɩ kuri, yɩ ba pɔɔrɩ taana daanɩ. 3 Ya ta wʋ́ kaanɩ nɔɔna sɩ ba kwe yi-pʋrʋ ba ma ja ba tɩtɩ, sɩ ba kikiə taa tɔgɩ cwǝŋǝ, nɩ kʋ na maŋɩ dɩ cɩga kam te tɩn. 4 Bɩtar-dɩndɩ yam waɩ ya paɩ nayəri-nyɩna ja wʋbʋŋ-ŋʋna. Ya ta waɩ ya paɩ nɔn-dʋnnʋ na yǝno dɩ yi-pʋrʋ. 5 Yi-pʋrɩ-nyɩna dɩ na cəgi-ya, baá zaasɩ ba wǝli ba swan wʋnɩ. Wʋbʋŋ-bʋŋɩna dɩ wʋ́ fɔgɩ ba lwarɩ cwǝŋǝ ba taa tɔgɩ-ka. 6 Kʋ maa wʋ́ pa nɔɔna lwarɩ bɩtar-dɩndɩ yam kuri, kʋ wǝli dɩ sinsəri, dɩ dɩndɩ sɩlʋ maama swan tiinə na yǝni ba ŋɔɔnɩ tɩn.

7 Nabiinǝ na kwarɩ Baŋa-Wɛ mɛ tɩn,

yǝno dɩ puli dáanɩ mʋ.

Kʋ daarɩ jwəəru yɩranɩ mʋ

wʋ́ gooni swan taanɩ

dɩ kʋrɩsɩm.

Yɩ pa ba sʋgɩ‑m ba wanɩ

8 Amʋ bu, sɛ sɩ n joŋi n ko kʋrɩsɩm.

Nan yɩ swe n nu na brɩ-m te tɩn.

9 Pa ba zaasɩm dɩm taa tigi n bɩcarɩ nɩ,

nɩ nɩnwaŋa zambili mʋ n dɩ

n ban nɩ tɩn.

10 Amʋ bu, nɩ lwarɩm-kərə na jɩgɩ-m ba sʋga,

sɩ n yɩ sɛ ba taanɩ dɩm.

11 Baá wanɩ ba ta dɩ nmʋ nɩ:

«Pa dɩ́ kɩ daanɩ,

sɩ dɩ́ vu dɩ́ səgi cwǝŋǝ ni nɩ,

dɩ́ daarɩ dɩ́ nuŋi dɩ́ ja nɔɔna

dɩ́ gʋ,

yɩ ba nan wʋ kɩ kʋlʋkʋlʋ ba cɔgɩ.

12 Dɩ́ wʋ́ ti-ba lɩla nɩnɛɛnɩ dɩ́ na nɛ-ba,

dɩ ba na maŋɩ ba jɩgɩ yazurə

te maama dɩ.

Dɩ́ wʋ́ li-ba nɩ ba ga zʋ tɩga kuri mʋ te.

13 Pa-na dɩ́ tɔgɩ daanɩ dɩ́ vrɩ

ba wo-laarʋ tɩm dɩ́ taa te,

pa dɩ́ sam su dɩ ba jɩjɩgɩrʋ tɩm.

14 Kʋntʋ tɩn, ba n wǝli dɩbam wʋnɩ,

sɩ dɩ́ na pɛ wǝǝnu tɩm,

dɩ́ wʋ́ pɔɔrɩ tɩ wʋnɩ dɩ́ pa‑m.»

15 Amʋ bu, ba na tagɩ kʋntʋ doŋ,

yɩ da n wǝli ba wʋnɩ.

Nan ja n tɩtɩ sɩ n cɩ n tɩtɩ dɩ

ba na wʋ mɛ tɩn.

16 Bɛŋwaanɩ, nɔn-balwaarʋ tɩm kʋntʋ

garɩ ba tʋŋɩ lwarɩm,

yɩ ba lagɩ lɩla dɩ nɔn-gʋra tɩtʋŋa.

17 Wʋlʋ na bʋŋɩ sɩ o ja zuŋə,

kʋ tu bá pa ka na cɩkʋ

kʋlʋ o na cɩgɩ ka ŋwaanɩ tɩn.

18 Vɩnvɩrna bam kʋntʋ nan na səgi

sɩ ba gʋ nɔɔna tɩn,

kʋ yɩ ba tɩtɩ dwi mʋ ba lagɩ ba ja.

19 Wʋlʋ maama na bʋŋɩ sɩ o duni

kampinə baŋa nɩ,

kʋ tu wʋ́ guri kʋntʋ mʋ.

Jɩjɩgɩrʋ tɩlʋ o na vrɩ tɩn mʋ

wʋ́ ba tɩ cɔg-o.

Ba maŋɩ yi-pʋrʋ dɩ bukɔ daanɩ

20 Yi-pʋrʋ mʋ zɩgɩ tɩʋ kʋm cwe sɩm dɩ kʋ yaga kam ni nɩ kʋ tɔɔla kʋ yaga. 21 Tɩʋ kʋm pooni mɛ nɔɔna na jeeri ba kɩ sɔɔ tɩn, dɩ kʋ mancwəənu niə yam nɩ mʋ kʋ zɩgɩ da kʋ ŋɔɔnɩ baŋa baŋa kʋ wɩ:

22 «Nayəri-nyɩna, dɛ dɔɔ mʋ

á wʋ́ yagɩ á jwərim dɩm?

Nɔn-lwɛɛna, á dɩ wʋ́ taá lwɛ

á donnǝ taan,

sɩ á vu á maŋɩ yən mʋ?

Nɔn-jwəəru, á wʋ́ yagɩ ka-taa-culi-yəno maŋa kɔɔ mʋ?

23 Á ya na sɛ a bwɛa yam,

amʋ dɩ yaá kwe a bɩcarɩ maama a pa abam,

yɩ a pa á lwarɩ kʋlʋ na tigi

a wʋbʋŋa nɩ tɩn.

24 Abam nan vɩn amʋ beeri dɩm,

pa a twɩ a jɩn a jeeri abam

yɩ á wʋ kɩ-nɩ á kɩ da.

25 Abam ta maa wʋ pɛ a kwiə yam jɩgɩ kuri ya paɩ abam,

yɩ á daarɩ á wʋ kɩ á yigə

dɩ bwɛa yalʋ a na pɛ tɩn.

26 Kʋntʋ ŋwaanɩ amʋ dɩ wʋ́ kɩ abam mʋ a mwanɩ,

dɩ á na lagɩ á na cam te tɩn.

27 Fʋʋnɩ maa wʋ́ ja abam

nɩnɛɛnɩ vu-dɩʋ doŋ,

yɩ lɛɛrʋ dɩ ba á baŋa sɩ tɩ li abam

nɩ kʋrɩm na kɩ te tɩn.

28 Ba laan wʋ́ loori zǝnǝ amʋ tee nɩ,

yɩ a vɩn sɩ a lǝri-ba.

Ba maa na beeri a je te dɩ,

ba bá na-nɩ.

29 Bɛŋwaanɩ, ba yɔɔrɩ ba culi yǝno mʋ,

yɩ ba vɩn ba wɩ:

ba bá taa kwarɩ Baŋa-Wɛ.

30 Ba maa wʋ sɛ amʋ kwiə yam,

yɩ ba ta kwarɩmɩ ba zwa

dɩ a bwɛa yam.

31 Kʋntʋ ŋwaanɩ baá su dɩ yaara

ba coori-ya,

ba wʋbʋŋ-lwaanʋ tɩm

dɩ ba kikiə yam ŋwaanɩ.

32 Bɛŋwaanɩ, nayəri-nyɩna vɩn zaasɩm mʋ

pa ba lagɩ ba tɩ lɩla.

Nɔn-jwəəru yigə maa tǝrǝ dɩ kʋlʋkʋlʋ

pa baá na cɔgɩm.

33 Kʋ daarɩ, wʋlʋ maama na sɛ

a zaasɩm dɩm,

kʋʋ́ kɩ lam kʋ pa kʋ tu.

O bɩcarɩ bá taa zaga dɩ kʋlʋkʋlʋ,

yɩ kʋlʋkʋlʋ fʋʋnɩ dɩ bá taa jɩg-o.»