15
Nmʋ na ləri taanɩ dɩ ni-bwəm, kʋ pipiri banɩ mʋ.aKʋ daarɩ bɩtara kalʋ na pogili nɔɔnʋ tɩn, ka paɩ bam zaŋɩ mʋ.
2 Yi-pʋrɩ-nyɩna paɩ yǝno jɩgɩ kuri mʋ.
Kʋ daarɩ nɔn-joro ni na puri,
jwərim yɩranɩ mʋ nuŋǝ.
3 Baŋa-Wɛ dʋlɩ DƖ yiǝ DƖ nii je maama mʋ.
DƖ ye nɔn-balwaarʋ dɩ nɔn-ŋʋna na jɩgɩ kʋlʋ ba kɩ tɩn.b
4 Taanɩ na zurǝ pugə nɩ, kʋ nyɩ dɩ tiu kʋlʋ na paɩ ŋwɩa tɩn mʋ.
Kʋ daarɩ ni dɩlʋ na ŋɔɔnɩ bɩtarɩ-balwaarʋ tɩm cɔgɩ pugə mʋ.
5 Nɔn-joro ba joŋi o ko zaasɩm.
Wʋbʋŋa tu sɛ kʋrɩsɩm mʋ.
6 Nɔn-ŋʋna sam su dɩ jɩjɩgɩrʋ mʋ.
Nɔn-balwaarʋ maa laɩ wǝǝnu ba tiŋi
yɩ cam ba dɩ ja-ba.
7 Yi-pʋrɩ-nyɩna jɩgɩ yǝno ba jagɩ mʋ.
Jwəəru nan warɩ kʋntʋ ba kɩ.
8 Baŋa-Wɛ culi nɔn-balwaarʋ na kwe pɛɛra yalʋ ba pa‑DƖ tɩn.
Kʋ daarɩ DƖ wʋbʋŋa tɔgɩ wɛ-loro kʋlʋ nɔn-ŋʋna na kɩ tɩn mʋ.
9 Baŋa-Wɛ culi nɔn-balwaarʋ kikiə yam mʋ.
Kʋ nan na yɩ balʋ na tɔgɩ nɔn-ŋʋnnɩ kikiə tɩn,
DƖ soe bantʋ mʋ.
10 Wʋlʋ na ywəri cɩga cwǝŋǝ kam,
baá waar‑o mʋ,
Wʋlʋ dɩ na kwarɩ sɩ ba bwɛ‑o, oó tɩ mʋ.
11 Tʋʋnɩ dɩ curu tɩtɩ yɩ jasɩ mʋ Baŋa-Wɛ yigə nɩ.
Nabiinǝ bɩcara mʋ DƖ laan bá taa ye na?
12 Nɔɔnʋ wʋlʋ na pupogi woŋo maama tɩn ba lagɩ kʋrɩsɩm.
O maa pwɛ o tɩtɩ dɩ swan tiinə.
13 Nɔɔnʋ wʋʋ na poli, kʋ brɩ o yibiyə nɩ mʋ.
Kʋ daarɩ wʋlʋ wʋʋ na cɔgɩ yibiyə wʋ́ nywanɩ mʋ.
14 Yi-pʋrɩ-nyɩm beeri sɩ o lwarɩ cɩga mʋ.
Nɔn-joro nan yɔɔrɩ o puuri jwərim mʋ o su o pugə.
15 Yinigə tu ŋwɩa yɔɔrɩ ka yɩ yaara yɩranɩ mʋ.
Kʋ nan na yɩ wʋlʋ wʋʋ na poli tɩn,
dɛ maama nyɩ dɩ candi-fara mʋ o jɩgɩ o di.
16 N jɩŋa na ba gara
yɩ n kwarɩ Baŋa-Wɛ
garɩ n jɩjɩgɩrʋ na gaalɩ
yɩ n wʋ cam wʋnɩ.
17 Sono na wʋ mɛ
yɩ ba di dwə-vɔɔrʋ yɩranɩ tɩn
garɩ sɩbɔŋɔ na wʋra
yɩ ba dʋnɩ nwana ba sui.
18 Ban-lʋm tu fɔgɩ o wiiri kantɔgɔ mʋ o kɩ da.
Ban-pʋnʋ tu maa zuri najara.
19 Yawɔrɩ-nyɩm ŋwɩa nyɩ dɩ sabarɩ na vrɩ kara te tɩn mʋ.
Nɔn-ŋʋm cwəŋə kam kwɛ mʋ ka palɩsɩ.
20 Bu wʋlʋ na jɩgɩ wʋbʋŋ-laarʋ tɩn paɩ o ko wʋʋ pwələ mʋ.
Kʋ nan na yɩ nɔn-joro,
wʋntʋ brɩ o ba nɩgɩ o nu.
21 Wʋlʋ wʋbʋŋa na muri tɩn jɩgɩ wʋpolo dɩ jor-kikiə mʋ.
Wʋbʋŋa tu kikiə maa tɔgɩ cwǝŋǝ lanyɩranɩ.
22 Kwiə na tǝri mɛ tɩn wǝǝnu ba tɔgɩ cwǝŋǝ.
Yigə tiinə nan na daga, kʋ kwɛ wǝǝnu mʋ.
23 Lərə yalʋ na lana tɩn jaanɩ wʋpolo mʋ ya tui,
Taanɩ na tagɩ dɩ maŋa nɩ, dɩ kwɛ wəənu mʋ lanyɩranɩ.
24 Yi-pʋrɩ-nyɩm kikiə wʋ́ pa o na mʋmwɛ-dɛɛrɩ,
sɩ kʋ cɩ-o dɩ tʋʋnɩ.
25 Baŋa-Wɛ wʋ́ yigi kamun-nyɩm sɔŋɔ DƖ dɩ tɩga nɩ.
DƖ maa yɩrɩ kadənə tɩga sisəm dɩm.
26 Baŋa-Wɛ culi nɔn-balwaarʋ wʋbʋŋa yam mʋ,
sɩ kʋ na yɩ ta-ŋʋna,
DƖ yi sui yantʋ mʋ.
27 Wʋlʋ na bʋŋɩ sɩ o duni kampinə baŋa nɩ tɩn
wʋ́ pa cam yi o digə tiinə mʋ.
Kʋ daarɩ wʋlʋ na culi vwa-tɩtʋŋa tɩn wʋ́ daanɩ.
28 Nɔn-ŋʋm wʋ́ sigi bɩle mʋ sɩ o ta taanɩ.
Nɔn-balɔrɔ ni nan na puri,
lwarɩm taanɩ yɩranɩ mʋ nuŋǝ.
29 Baŋa-Wɛ sɩn DƖ zwa dɩ nɔn-balwaarʋ kərə.
Kʋ daarɩ, DƖ yǝni DƖ cəgi nɔn-ŋʋna wɛ-loro mʋ.
30 Nɔɔnʋ yibiyə na poonə,
kʋ paɩ wʋpolo mʋ.
Ta-ŋʋna maa paɩ nɔɔna wʋʋ tigə.
31 Wʋlʋ na sɛ zaasɩm dɩlʋ na jɩgɩ jwa,
kʋ tu dɩ swan tiinə wʋ́ taa ve daanɩ.
32 N na culi sɩ ba bwɛ‑m,
n jɩgɩ n tɩtɩ mʋ n ni.
Wʋlʋ maa na sɛ zaasɩm tɩn yi wʋ́ pʋʋrɩ.
33 Nɔɔnʋ na kwarɩ Baŋa-Wɛ, kʋ pa‑o yi-pʋrʋ mʋ.
Ka-tu-ka-tɩtɩ dɩ maa tɔgɩ zulə yigə.