Pa-na dɩ́ te Baŋa-Wɛ!
135
Pa-na dɩ́ tee Baŋa-Wɛ!aTee-na Baŋa-Wɛ yɩrɩ dɩm!
Abam balʋ na yɩ DƖ tɩntʋŋna tɩn,
tee-DƖ-na!
2 Kʋ maa yɩ abam balʋ na zɩgɩ
Baŋa-Wɛ sɔŋɔ kʋm nɩ
yɩ á tʋŋɩ á pa‑DƖ
DƖ digə kam nɩ tɩn.
3 Tee-na Baŋa-Wɛ,
sɩ DƖ tiini DƖ lamma.
Leeni-na le á zuli DƖ yɩrɩ dɩm,
kʋ na paɩ ywəəni tɩn ŋwaanɩ.
4 Bɛŋwaanɩ, Baŋa-Wɛ kuri
Zakɔbɩ dwi dɩm mʋ
sɩ ba taa yɩ DƖ tɩtɩ nɔɔna.
Yisɩrayɛlɩ tiinə bam yɩ DƖ tɩtɩ
nyɩm mʋ.b
5 Cɩga ŋwaanɩ tɩn, a lwarɩ nɩ
Baŋa-Wɛ jɩgɩ dam.
DƖ maa yɩ Wɛ-kamunu DƖ dwe
wa yam maama wuu.
6 Kʋ na yɩ wɛyuu nɩ mʋ
naa tɩga kam baŋa nɩ yoo,
naa nanɩɩrʋ tɩm wʋnɩ mʋ dɩ,
dɩdaanɩ tɩ kuri kuri je sɩm maama,
Baŋa-Wɛ yǝni DƖ tʋŋɩ DƖ fra
na lagɩ te maama tɩn mʋ.
7 DƖ maa paɩ kunkwǝǝnu zɩga
lʋgʋ baŋa ni maama nɩ.
DƖ ta maa paɩ dʋa nɩ
yɩ ka ta yǝni ka pɩpɩla.
Kʋ ta na yɩ viu kʋm,
DƖ yǝni o pʋrɩ-kʋ mʋ
sɩ kʋ nuŋi
kʋ dʋlɩ je maama nɩ.
8 Wɛ dɛɛn mʋ magɩ bu-kwɩan dwi maama Ezipi tɩʋ nɩ,
pa nabiinǝ dɩdaanɩ vara
wo-kwɩn sɩm maama tɩ.
9 DƖ ma kɩ wo-kɩnkagɩla
dɩdaanɩ tɩtʋŋ-kamunə
Ezipi tiinə bam tɩtarɩ nɩ,
yɩ DƖ tɔgɩ ya baŋa DƖ cɔgɩ
Ezipi Pa-farʋ wʋm
dɩdaanɩ o nakwa bam maama.
10 DƖ dɛɛn wanɩ tɩɩnɩ zanzan mʋ DƖ di,
yɩ DƖ daarɩ DƖ ti pwa-kamunə mʋmwɛ.
11 Kʋ dɛɛn yɩ Amɔɔrɩ tiinə Pɛ Sɩhɔn,
dɩ Basan tɩʋ Pɛ Ɔgɩ,
dɩdaanɩ Kaanan tiinə pwa badonnǝ bam maama mʋ kʋntʋ.
12 DƖ laan ma kwe ba tɩga kam
DƖ pa DƖ nɔɔna Yisɩrayɛlɩ tiinə bam
sɩ ba taa te taan wuu.
13 Baŋa-Wɛ, nmʋ yɩrɩ dɩm
wʋ́ taa wʋra mʋ maŋa maama.
Kʋ zɩgɩ zɩm sɩ kʋ vu kʋ yi
dwi dɩlʋ na saŋɩ tɩn maama,
nɔɔna wʋ́ taa guli n yɩrɩ dɩm gulə.
14 Bɛŋwaanɩ, Baŋa-Wɛ wʋ́ zɩgɩ
DƖ nɔɔna bam kwaga nɩ
pa ba na ba bʋra.
DƖ maa wʋ́ duri DƖ tɩntʋŋna bam yibwənə.
15 Jwǝnǝ yalʋ dwi-gɛ tiinə bam
na jɩgɩ ba kaanɩ tɩn
yɩ səbu-poŋo dɩ səbu-sɩŋa mʋ
ba mɛ ba kɩ-ya.
Nabiinǝ mʋ mɔɔnɩ-ya dɩ ba jɩŋa.
16 Ya maa jɩgɩ niə
yɩ ya warɩ ya ŋɔɔnɩ.
Ya ta jɩgɩ yiǝ. Ya nan ba naɩ dɩ.
17 Ya maa jɩgɩ zwa
yɩ ya warɩ ya cəgi taanɩ.
Siun dɩ nan ba tɔgɩ ya mʋmwa nɩ kʋ nuŋǝ.
18 Balʋ maama na mɔɔnɩ jwǝnǝ tɩn
wʋ́ ba ba taa nyɩ dɩ-ya.
Balʋ dɩ na kɩ ba wʋ-dɩdʋa dɩ-ya tɩn
wʋ́ ji nɔn-yɔɔrʋ mʋ.c
19 Yisɩrayɛlɩ dwi tiinə bam,
tee-na Baŋa-Wɛ!
Arɔn dwi dɩm dɩ,
abam dɩ tee-na Baŋa-Wɛ!
20 Levi dwi tiinə bam, tee-na Baŋa-Wɛ!
Abam balʋ maama na kwarɩ
Baŋa-Wɛ tɩn,
zaŋɩ-na á tee‑DƖ!
21 Balʋ maama na wʋ Siyɔn nɩ tɩn,
tee-na Baŋa-Wɛ,
DƖ na zʋʋrɩ Zeruzalɛm nɩ tɩn ŋwaanɩ!
Pa-na dɩ́ tee Baŋa-Wɛ!