Baŋa-Wɛ digə kam zulə
132
Amʋ Tu Baŋa-Wɛ,guli Pɛ Davidi gulə,
dɩ o na yaarɩ tɩtʋŋa baŋa nɩ
te tɩn.
2 O dɛɛn dugi durə mʋ
dɩ nmʋ Baŋa-Wɛ dɩm
na yɩ Zakɔbɩ dwi tiinə
Dam maama Tu wʋm tɩn.
O ma goni ni o wɩ:
3 «Amʋ bá sɛ sɩ a zʋ a digə,
naa sɩ a pəni a sara nɩ,
4 naa sɩ dɔɔnɩ ba amʋ yiǝ nɩ
dɩ fɩnfɩɩn dɩ,
5 kʋ na daɩ nɩ amʋ nɛ jǝgǝ
a pa Baŋa-Wɛ,
yɩ Zakɔbɩ dwi tiinə
Dam maama Tu Wɛ dɩm
taa zʋʋrɩ da.»
6 Nii-na! Dɩ́ dɛɛn na wʋ Efrata nɩ tɩn,
mʋ dɩ́ ni Wɛ ni-gonim daka kam ŋwa.
Dɩ́ ma na-ka Jeerima karɩ sɩm nɩ.
7 Pa-na sɩ dɩ́ vu Baŋa-Wɛ
digə kam nɩ,
sɩ dɩ́ kuni doonǝ DƖ yigə nɩ
dɩ́ zuli‑DƖ.
8 Baŋa-Wɛ, nan zaŋɩ
n ba n zʋ n jǝŋǝ je sɩm nɩ!
Tɔgɩ dɩ n ni-gonim daka kam
n ba n ta n zʋʋrɩ da,
sɩ n dam dɩm brɩ ja!
9 Pa n kaanɩm tiinə bam
zʋ nɔn-ŋʋnnɩ nɩ,
nɩ ba zʋ gwar-laarʋ mʋ tɩn.
Pa n tɩtɩ nɔɔna bam
taa caka dɩ wʋpolo.
10 Nan da n tɩntʋŋnʋ Davidi ŋwaanɩ
sɩ n yɩ fɔgɩ n vɩn wʋlʋ n laan
na tiŋi sɩ o di paarɩ
n nɔɔna baŋa nɩ tɩn.b
11 Bɛŋwaanɩ, Baŋa-Wɛ dɛɛn
dugi durə dɩ Pɛ Davidi
yɩ DƖ daa bá joori DƖ ni dɩm
kwaga nɩ.
DƖ maa wɩ: «Nɔɔnʋ wʋ́ nuŋi
n dwi dɩm wʋnɩ mʋ o ji pɛ.c
12 Nmʋ dwi dɩm na sɛ ni-gonim dɩlʋ a na kɩ dɩ ba tɩn
yɩ ba tɔgɩ zaasɩm dɩlʋ a na pɛ-ba tɩn,
bantʋ wʋ́ taa di nmʋ paarɩ dɩm mʋ sɩ kʋ taa ve maŋa maama.»
13 Baŋa-Wɛ yɔɔrɩ DƖ kuri Siyɔn mʋ
sɩ DƖ pa kʋ taa yɩ DƖ jǝŋǝ je.
14 DƖ maa wɩ:
«Yo mʋ yɩ amʋ jǝŋǝ je
mɛ amʋ na wʋ́ taa zʋʋrɩ
maŋa maama tɩn.
15 Amʋ wʋ́ pa Siyɔn tiinə bam jɩŋa
taa jɩga sɩ kʋ gaalɩ.
Ba yinigə tiinə bam dɩ tɩtɩ
wʋ́ taa di ba sui mʋ.
16 Ba kaanɩm tiinə bam wʋ́ taa paɩ a vrɩm dɩm yi nɔɔna.
Amʋ tɩtɩ nɔɔna balʋ na wʋ tɩʋ kʋm wʋnɩ tɩn
wʋ́ taa leeni dɩ wʋpolo
maŋa maama.
17 Yo seeni mʋ amʋ wʋ́ pa
sɩ Davidi dwi paarɩ dɩm
taa zɩgɩ dɩ dam.
A ta wʋ́ pa wʋlʋ amʋ na tiŋi
sɩ o ji pɛ tɩn
taa jɩgɩ pooni o ŋwɩa wʋnɩ.
18 Amʋ wʋ́ pa cavɩɩra di
o dʋna bam.
O tɩtɩ paarɩ dɩm nan
wʋ́ taa jɩgɩ nɩnwaŋa lanyɩranɩ.»