Dɩbam tɩɩna wʋ Baŋa-Wɛ tee nɩ
126
Maŋa kalʋ Baŋa-Wɛ na pɛsɩ dɩ́ joori dɩ́ jǝni
Siyɔn tɩʋ kʋm nɩ tɩn,
kʋ nyɩ dɩ dɩndwɩa mʋ dɩ́ dwɛ.
2 Mwaanʋ dɛɛn su dɩbam ni mʋ.
Dɩ́ maa leeni wʋpolo le.
Dwi-gɛ tiinə laan maa tɛ
dɩbam taanɩ ba wɩ:
«Baŋa-Wɛ mʋ kɩ wo-kamunnu zanzan DƖ pa-ba.»
3 Cɩga tɩn, Baŋa-Wɛ sɩɩnɩ DƖ kɩ
wo-kamunnu DƖ pa dɩbam,
yɩ kʋ poli dɩ́ wʋʋ!
4 Baŋa-Wɛ, pa dɩ́ joori
dɩ́ taa jɩgɩ yu-yoŋo,
nɩnɛɛnɩ dʋa na nɩga
pa nabarɩ joori sɩ jɩgɩ na
jagwiə seeni kagʋa kam nɩ te tɩn.
5 Nan pa balʋ na ve
ba du wo-dwə ba karɩ nɩ
yɩ wʋ-cɔgɔ jɩgɩ-ba tɩn
laan ba ba zagɩ ba wʋdiiru tɩm
yɩ ba kaasɩ dɩ wʋpolo.
6 Balʋ na keeri wʋ-cɔgɔ ŋwaanɩ
yɩ ba jɩgɩ ba wo-dwə bam
ba maa ve sɩ ba du tɩn
laan wʋ́ joori maŋa kadoŋ nɩ
dɩ ba wʋdiiru tɩm
yɩ ba kaasɩ dɩ wʋpolo sɔɔ ba yaga.