Baŋa-Wɛ ta ma bwe Zobi DƖ wɩ:
41
«Kʋ ta na yɩ nɩnɩʋ wʋ juru Prənyoŋo,nmʋ wʋ́ wanɩ n ma gwələ
n vaŋɩ-kʋ n lɩ na wʋnɩ na?
N ta wʋ́ wanɩ n kwe ŋʋna
n vɔ kʋ ni na?a
2 Nmʋ nan wʋ́ wanɩ
n puri kʋ mʋmwa
sɩ n kwe ŋʋna n tʋrɩ da,
yɩ n daarɩ n kwe gwələ
n gɩrɩmɩ kʋ pɩyaa nɩ na?
3 Prənyoŋo kʋm kʋntʋ wʋ́ yɔɔrɩ
kʋ taa loori‑m
sɩ n bwəli-kʋ n yagɩ mʋ na?
Kʋʋ́ kwe ni-sʋnɩ mʋ
kʋ ŋɔɔnɩ dɩ nmʋ na?
4 Kʋ ta wʋ́ sɛ kʋ pa‑m,
yɩ á goni ni daanɩ,
sɩ kʋ ŋwɩa maama wʋnɩ
kʋ taa yɩ n gambaa na?
5 Nmʋ wʋ́ pa kʋ ji kwɛɛra woŋo,
nɩ ba na jaanɩ zunə
ba maɩ ba kwɛɛrɩ te tɩn na?
N ta wʋ́ pa n sɔŋɔ bɩsankam sɩm
vaŋɩ-kʋ dɩ ŋʋna na?
6 Nɔɔna wʋ́ wanɩ
ba kɩ pipiu kʋ baŋa nɩ,
yɩ ba ca kʋ yɩra yam mugə-mugə
sɩ ba pɔɔrɩ-ya ba pa
ba donnǝ pipimpiinə na?
7 N nan wʋ́ wanɩ n kwe cicwə zanzan n zɔ kʋ yɩra yam,
naa n kwe cɩna n zɔ kʋ yuu kʋm,
sɩ kʋ pa kʋ na zʋnnɩ na?
8 Nmʋ na tiini n kwaanɩ n zʋ jaŋa dɩ-kʋ,
nń jaŋɩ bɩdwɩ yɩranɩ,
yɩ n du nɩ:
n daa n bá dwǝni dɩ-kʋ.
9 Wʋlʋ na bʋŋɩ nɩ
oó wanɩ-kʋ o cɔgɩ,
kʋ tu jɩgɩ o tɩtɩ mʋ o ni.
Bɛŋwaanɩ, o na yɔɔrɩ o na-kʋ,
o baarɩ maama wʋ́ ti mʋ.
10 Cɩga tɩn, nɔɔn-nɔɔnʋ ba jɩgɩ baarɩ
sɩ o fɩn o tɩtɩ o dwe
varɩm wʋm kʋntʋ.
Nɔɔnʋ wɔɔ mʋ nan yi sɩ o jeeri
o ja dɩdaanɩ amʋ Wɛ?
11 Wɔɔ jɩnɩ mʋ amʋ wʋ́ taa jɩga
sɩ a ŋwɩ a pa kʋ tu?
Bɛŋwaanɩ, amʋ mʋ te tɩga baŋa woŋo maama.
12 Amʋ daa ta wʋ́ taa ŋɔɔnɩ
Prənyoŋo taanɩ.
Kʋ nɛ sɩm dɩ kʋ yɩra yam dana lanyɩranɩ,
yɩ kʋ yatɩga kam dɩ lana zanzan.
13 Nɔɔn-nɔɔnʋ warɩ o pwəni
kʋ tɔnɔ kʋm,
Wɔɔ mʋ yi sɩ o vu o zʋ kʋ yəli-panɔ kʋm laŋa nɩ?
14 Nɔɔn-nɔɔnʋ ba jɩgɩ baarɩ
sɩ kʋ tu ja kʋ ni o kəŋi,
kʋ yələ yam na tiini
ya jɩgɩ fʋʋnɩ tɩn ŋwaanɩ.
15 Kʋ kwaga pʋrʋ tɩm
nyɩ dɩ tankwallʋ mʋ
ba gɩɩnɩ ba kikili daanɩ.
Tɩ maa sɔɔnɩ daanɩ
pa tɩ dana nɩ kandwa tɩn.
16 Tɩ tiini tɩ sɔɔnɩ daanɩ mʋ,
pa lulogo tǝrǝ sɩ viu tɔgɩ da
kʋ zʋ kʋ yi kʋ yɩra yam tɩtɩ.
17 Tɩ na tiini tɩ məəli daanɩ kʋntʋ tɩn,
nɔɔn-nɔɔnʋ warɩ-tɩ sɩ o kʋrɩ.
18 Prənyoŋo na sin kʋ viu kʋ yagɩ,
pooni mʋ nuŋi da
dɩ pɩpɩlɩ yiǝ.
Kʋ yiǝ yam dɩ maa nyɩɩna,
nɩ wɩa na nyɩ tɩ-pʋra nɩ te tɩn.
19 Min-vʋgʋ mʋ yǝni kʋ ba
kʋ nuŋi kʋ ni dɩm nɩ.
Mim-cɩnnʋ dɩ maa bagɩ
tɩ jaana je maama nɩ.
20 Nyʋa dɩ maa taɩ
ka nuŋi kʋ mʋmwa nɩ,
nɩ kambiə na cʋra mim nɩ
yɩ fʋnyʋgʋ fufugə te tɩn.
21 Kʋ na sin viu, kʋ wiiri min-cala
pa ya jaanɩ mim,
yɩ min-vʋgʋ dɩ yɔɔrɩ kʋ taɩ
kʋ nuŋǝ kʋ ni dɩm nɩ.
22 Kʋ daarɩ dam mʋ zʋʋrɩ kʋ ban yam nɩ.
Nɔɔnʋ maama na nɛ-kʋ, kʋ pa fʋʋnɩ mʋ.
23 Kʋ yɩra yam je je tǝrǝ
sɩ na bwǝnǝ.
Ya maama yɔɔrɩ ya dana
nɩ luu na yɩ te tɩn mʋ.
24 Kʋ bɩcarɩ nan tiini dɩ dana
nɩ piu naa nɔŋɔ-kandwɛ na yɩ te tɩn mʋ.
25 Kʋ na zaŋɩ wɛɛnɩ,
fʋʋnɩ yǝni dɩ ja dɩdɛɛra tɩtɩ mʋ.
Ba na ni kʋ dwanɩm,
ba wʋbʋŋa yǝni ya vugimi mʋ.
26 Ba na jeeri-kʋ dɩ sʋ-lwaanʋ, naa cicwə, naa taŋa cɩna,
tɩntʋ maama warɩ-kʋ kʋlʋkʋlʋ
sɩ tɩ kɩ.
27 Kʋ nii luuru sɩ tɩ taa nyɩ
dɩ ga-kʋrrʋ mʋ kʋ tee nɩ.
Canna dɩ maa nyɩ
dɩ daa kalʋ na pɔgɩ tɩn kʋ yigə nɩ.
28 Cɩna na jaanɩ wɛɛnɩ te dɩ,
ya muri sɩ ya pa kʋ duri.
Napana kandwa nyɩ dɩdaanɩ gaa mʋ tɩte dɩ-kʋ.
29 Kʋ nii gwələ sɩ ya taa nyɩ
dɩ swannʋ mʋ.
Ba nan na kwe cicwə mʋ
dɩ sɩ ba ma jeeri-kʋ dɩ najara,
kʋ yigə brɩ ka tǝrǝ ya wʋnɩ.
30 Kʋ pugə kam seeni ya-tana kam
nyɩ dɩ cwələ mʋ kwǝli-ka,
pa ka tiini ka jɩgɩ ni.
Kʋ na tuuri kʋ tɩtɩ
kʋ vəŋə baŋa nɩ,
kʋ yǝni kʋ jɩgɩ bwəru tɩm mʋ
kʋ gurə.
31 Kʋ nan na wʋ nɩnɩʋ wʋ
na-luŋə nɩ kʋ yɛ na,
kʋ paɩ na bam pɔgɩlɩ
nɩ na na cʋrɩ te tɩn mʋ.
Kʋ ta nyɩ dɩ tralɩ nugə na wʋ kambiə nɩ ka saŋɩ te tɩn mʋ.
32 Kʋ na yǝni kʋ kɛ Kʋ daarɩ,
cwǝŋǝ tigi nɩnɩʋ kʋm nɩ mʋ
napon-poŋo yɩ ka nyɩɩna,
nɩnɛɛnɩ nankwɩan yu-pwe
na yɩ te tɩn.
33 Varɩm wʋm kʋntʋ ba kwarɩ kʋlʋkʋlʋ.
Kʋ ba jɩgɩ doŋ
tɩga baŋa maama nɩ.
34 Vara balʋ maama na brɩ ba tɩtɩ kamunni,
kʋ jɩgɩ-ba kʋ goonə mʋ.
Kʋntʋ mʋ maa yɩ
varɩ-kamunə bam maama pɛ.»