Zobi ni-taanɩ
42
Zobi ma ləri Baŋa-Wɛ o wɩ:2 «A ye nɩ n waɩ wǝǝnu maama n kɩ.
Ba ba cʋ nmʋ yigə dɩ kʋlʋkʋlʋ
n na jaanɩ wʋbʋŋa sɩ n kɩ tɩn.
3 Nmʋ ya bwe amʋ n wɩ:
‹N yɩ wɔɔ mʋ sɩ n bwɛ
amʋ wʋbʋŋa na jaanɩ te tɩn,
yɩ n ŋɔɔnɩ wǝǝnu tɩlʋ n na yǝri tɩn?›
Cɩga tɩn, amʋ ŋɔɔnɩ wǝǝnu tɩlʋ
a na wʋ lwarɩ tɩ kuri tɩn mʋ.
Tɩ maa yɩ wo-kɩnkagɩla
yalʋ na dwe a jam tɩn.a
4 N ta tagɩ dɩ amʋ nɩ:
‹Laan ta n yɩ kʋntʋ cɩmm
sɩ a ŋɔɔnɩ dɩ nmʋ.
Amʋ wʋ́ bwe‑m taanɩ,
sɩ n dɩ ləri a bwiə yam
n pa-nɩ.›
5 Cɩga tɩn, amʋ zwa ya mʋ ni nmʋ ŋwa.
A tɩtɩ laan nan mʋ nɛ‑m dɩ a yiǝ.
6 Cavɩɩra maa jɩgɩ-nɩ dɩ bɩtar-yɔɔrʋ tɩlʋ a ya na yəni a tɛ tɩn.
A yɔɔrɩ a culi a lwarɩm dɩm
dɩ a wʋʋ maama,
pa a jǝni tɩɩrʋ
dɩ tɩntwarɩm baŋa nɩ.»
Tɔnɔ kʋm gurim
7 Baŋa-Wɛ dɛɛn na ŋɔɔnɩ dɩ Zobi DƖ ti tɩn, mʋ DƖ tagɩ dɩ Teman tu Elifaazɩ DƖ wɩ: «A banɩ zaŋɩ dɩ nmʋ, dɩ n badonnǝ bale bam mʋ. Bɛŋwaanɩ, á wʋ tagɩ amʋ yɩra taanɩ sɩ kʋ yɔɔrɩ cwǝŋǝ sɩ kʋ maŋɩ dɩ a tɩntʋŋnʋ Zobi na tagɩ te tɩn. 8 Nan beeri-na nabɛ sɩrpɛ, dɩ pi-balɩ sɩrpɛ á ja á vu Zobi te sɩ á kwe-tɩ á kɩ zwɛɛm kaanɩm á tɩtɩ ŋwaanɩ. Kʋ kwaga seeni, a tɩntʋŋnʋ Zobi wʋ́ loori-nɩ o pa abam. A maa wʋ́ joŋi o wɛ-loro kʋm, sɩ a yɩ waarɩ abam dɩ jwərim dɩlʋ á na kɩ tɩn. Abam na tagɩ amʋ yɩra taanɩ te tɩn wʋ yɔɔrɩ cwǝŋǝ sɩ kʋ yi Zobi na tagɩ te tɩn.»
9 Teman tu Elifaazɩ, dɩ Suha tu Bilidadɩ, dɩ Naama tu Tɩsofaarɩ ma sɩɩnɩ ba kɩ nɩ Baŋa-Wɛ na brɩ-ba sɩ ba kɩ te tɩn. Baŋa-Wɛ dɩ ma sɛ wɛ-loro kʋlʋ Zobi na kɩ ba ŋwaanɩ tɩn.
10 Zobi dɛɛn na loori Wɛ o pa o badonnǝ bam tɩn kwaga nɩ, mʋ Baŋa-Wɛ daa pɛ Zobi joori o zɩgɩ dɩ dam. O ma ba o duni, nɩ kʋ ya na yɩ te pulim kam nɩ tɩn kuni bɩle.b 11 O cʋrrʋ maama, dɩ o nakwa, dɩ o badonnǝ balʋ maama dɛɛn na ve dɩd-o tɩn ma ba o te yɩ ba di candiə daanɩ o sɔŋɔ nɩ. Ba ma ŋwanɩ ba pa‑o yɩ ba zuri o bɩcarɩ dɩ lɛɛrʋ tɩlʋ maama Baŋa-Wɛ na tʋŋɩ o yɩra nɩ tɩn. Ba maama dɩdʋa dɩdʋa ma pa‑o səbu-poŋo səbu-dala, dɩ səbu-sɩŋa jafʋlɩ.
12 Baŋa-Wɛ ma tiini DƖ kɩ Zobi yu-yoŋo pa o kweelim kam garɩ o ya na yɩ te pulim kam nɩ tɩn. O dɛɛn laan jɩgɩ peeni mʋrrʋ fugə-tɩna (14,000), dɩ yogondə mʋrrʋ bardʋ (6,000), dɩ nabɛ mʋrrʋ tɩle (2,000), dɩ bɩnɛ mʋrʋ (1,000). 13 DƖ ma pa Zobi daa lʋ biə fugə, bəkəri sɩrpɛ, dɩ bukwa batɔ. 14 O dɛɛn ma bəŋi o bukɔ-nakwɩn kam yɩrɩ nɩ Yemima. O bukɔ wʋlʋ na saŋɩ tɩn yɩrɩ maa yɩ Kezia, yɩ o bukwa batɔ tu wʋm dɩ yɩrɩ yɩ Kerɛn-Hapukɩ. 15 Tɩga baŋa maama wʋnɩ, kaanɩ dɛɛn tǝrǝ o lam na twɛ Zobi bukwa bam. Zobi ma pa-ba cwǝŋǝ sɩ ba wǝli ba nabwa bam wʋnɩ sɩ o na tɩga, sɩ ba cɛ o jɩjɩgɩrʋ tɩm ba pa daanɩ.