40
Baŋa-Wɛ daa ta ma ta dɩ Zobi DƖ wɩ:
2 «Nmʋ wʋlʋ na magɩ kantɔgɔ dɩ amʋ Dam-fɔrɔ Tu Wɛ dɩm tɩn,
n laan wʋ́ sɛ n pa-nɩ na?
Nmʋ ya na gooni-nɩ tɩn,
n maŋɩ sɩ n ləri a taanɩ dɩm mʋ.»
3 Zobi ma ləri Baŋa-Wɛ o wɩ:
4 «Nii-nɩ, amʋ daɩ kʋlʋkʋlʋ n yigə nɩ.
A nan wʋ́ kɩ tɛ mʋ a ləri‑m?
Amʋ ni mɔɔrɩ mʋ
yɩ dɩ warɩ sɩ dɩ puri.
5 A maŋɩ a ŋɔɔnɩ kʋ daga.
Bɛɛ mʋ a daa wʋ́ ta?
A bá wanɩ a ləri.»
6 Baŋa-Wɛ maa zɩgɩ vu-fɔrɔ kʋm wʋnɩ DƖ ŋɔɔnɩ dɩ Zobi DƖ wɩ:
7 «Nan fɔgɩ n zɩgɩ nɩ baarʋ te,
sɩ a lagɩ a bwe‑m taanɩ mʋ.
Nmʋ dɩ nan maŋɩ
sɩ n ləri a bwiə yam mʋ.
8 Nmʋ bʋŋɩ sɩ n kwɩɩlɩ a cɩga kam n sɩn tɩga nɩ mʋ na?
N ta wʋ́ lwɛ amʋ
sɩ kʋ pa n ta n jɩgɩ bʋra na?
9 Nmʋ jɩŋa tʋŋɩ wo-kamunə
nɩ Wɛ jɩŋa kam na kɩ te tɩn na?
N waɩ n kwǝrǝ n mumuni
nɩ Wɛ kwǝrǝ na bagɩ te tɩn na?
10 Tɔ! N na waɩ n kɩ, kwǝli n tɩtɩ
dɩ nɩnwaŋa dɩ kamunni,
sɩ n brɩ n paarɩ dɩ n zulə
na maɩ te tɩn.
11 Kwe n ban-lʋm dɩm n lo n yagɩ
kamun-nyɩna baŋa nɩ
sɩ kʋ pa ba maama zʋʋrɩ
ba tɩtɩ tɩga nɩ.
12 Pa balʋ maama
na brɩ ba tɩtɩ kamunni tɩn
tu ba tɩtɩ tɩga nɩ,
sɩ n ta daarɩ n nɔnɩ nɔn-balwaarʋ
n sɩn tɩga nɩ.
13 La ba maama n kɩ daanɩ,
sɩ n kwe-ba n kɩ kasʋlʋ wʋnɩ.
Vɔ-ba n daarɩ n pɩ n yagɩ
ba yibeelǝ wʋnɩ.
14 N na wanɩ wǝǝnu tɩm kʋntʋ n kɩ,
amʋ laan wʋ́ sɛ a pa nmʋ nɩ:
n tɩtɩ dam mʋ wʋ́ wanɩ‑m
dɩ joŋi.
15 Nan maanɩ n nii bugə wʋʋ coŋo kʋma na yɩ te tɩn.
Amʋ mʋ naanɩ-kʋ
nɩ a na naanɩ nmʋ dɩ te tɩn.
Kʋ dɩ nan di ga-lɛɛrʋ mʋ
nɩ na-bɩa na kɩ te tɩn.
16 Kʋ cwə yam tiini ya dana,
yɩ kʋ pugə kam dɩ jɩgɩ ŋwannʋ
na joŋi kʋ yɩra yam maama tɩn.
17 Kʋ nan twɩ kʋ nabili mʋ tee,
nɩ pʋnʋ doŋ tɩn,
yɩ kʋ nɛ ŋwannʋ tɩm dɩ dana lanyɩranɩ.
18 Kʋ kwi sɩm dana
nɩ canna luguru na yɩ te tɩn mʋ,
yɩ kʋ nacɩrɩ sɩm nyɩ dɩ be
sɩlʋ ba na mɛ luuru ba kɩ tɩn.
19 Kʋntʋ mʋ yɩ kʋlʋ Wɛ na kɩa DƖ wo-naanʋ tɩm wʋnɩ
yɩ kʋ tiini kʋ yɩ kʋ yɩra tɩn!
Kʋ yələ yam nyɩ dɩ sʋ-lɔŋɔ mʋ.
20 Ga-lɛɛrʋ yɔɔrɩ tɩ puli pweeru je sɩm nɩ mʋ sɩ kʋ taa di,
yɩ ga-vara dwi maama dɩ kaagɩ dáanɩ ba kwɛɛra.
21 Kʋ nan yǝni kʋ vu kʋ tigi
sabarɩ kuri nɩ mʋ,
yɩ kʋ səgi bugə ni
nancan-gullu wʋnɩ.
22 Sabarɩ sɩm maa paɩ kʋ jɩgɩ woro
sɩ kʋ səgi da.
Bugə ni tweeru tɩm dɩ kaagɩ-kʋ
dɩ kɩ tɩtarɩ nɩ.
23 Bugə na bam na duri
yɩ ba pɔgɩlɩ te maama dɩ,
kʋ ba kwarɩ fʋʋnɩ.
Kʋlʋkʋlʋ ba daanɩ-kʋ,
dɩ Zʋrdɛn bugə na bam na maŋɩ
ba duri ba zʋʋrɩ kʋ ni wʋnɩ te dɩ.
24 Nɔɔn-nɔɔnʋ nan warɩ
bugə wʋʋ varɩm wʋm sɩ o ja,
yɩ kʋ zɩgɩ da kʋ niə.
N bá wanɩ n kwe cɩkʋ
n ma n ja-kʋ kʋ mʋmwɛ seeni.»