Baŋa-Wɛ ta ma ta dɩ Zobi o wɩ:
39
«Nmʋ ye maŋa kalʋ pweeru yuu bʋnɩ na lʋrɩ dɩ biə tɩn na?Sɩ we sɩm, nmʋ zɩgɩ n nii-sɩ
pa sɩ lʋrɩ na?
2 Nń wanɩ n jeeli vara bam kʋntʋ
pu-jarɩ canɩ sɩm ni na?
N ye ba lʋra maŋa kam na?
3 Ba yǝni ba toori mʋ sɩ ba kʋnɩ,
yɩ ba daarɩ ba lʋ bu wʋlʋ
ba na yaarɩ o ŋwaanɩ tɩn.
4 Ga-vara bantʋ biə yǝni
ba kɩ nɔɔna mʋ kagʋa wʋnɩ.
Ba laan maa yǝni ba viiri
ba daarɩ ba tiinə
yɩ ba daa ba joorə.
5 Wɔɔ mʋ paɩ kagʋa wʋ bɩnɛ
cwǝŋǝ sɩ sɩ beeri yɔɔ?
Wɔɔ mʋ bwəli-sɩ
pa sɩ ve sɩ na lagɩ mɛ tɩn?
6 Amʋ mʋ pɛ-sɩ cwǝŋǝ sɩ sɩ taa zʋʋrɩ kagʋa kam nɩ,
mɛ kasʋlʋ kʋm na yɔɔrɩ
kʋ yɩ yɛ yɩranɩ tɩn.
7 Kʋ na yɩ vuvugə kalʋ na wʋ
tɩʋ kʋm wʋnɩ tɩn,
sɩntʋ yǝni sɩ gooni-ka mʋ.
Sɩ ba jɩgɩ nɔɔna balʋ
na wʋ́ fɩ-sɩ sɩ sɩ tʋŋɩ tɩn.
8 Sɩ yɔɔrɩ sɩ kaagɩ pweeru tɩm yuu nɩ mʋ sɩ beeri ga-lɛɛrʋ,
dɩ kʋlʋ maama na zurǝ tɩn sɩ sɩ di.
9 Ga-naa wʋ́ sɛ sɩ kʋ tʋŋɩ
kʋ pa‑m na?
Tɩtɩɩ nɩ, kʋʋ́ maŋɩ
n naboo nɩ mʋ na?
10 Nmʋ wʋ́ wanɩ n ma ŋʋna
n vaŋɩ-kʋ sɩ kʋ va kʋ pa‑m na?
Kʋʋ́ sɛ sɩ kʋ tɔgɩ n kwaga kʋ lɔ
pɩmpala bwəəlu tɩm nɩ na?
11 Nmʋ nan ta wʋ́ ta n tɩɩgɩ
kʋ dam-fɔrɔ kʋm baŋa nɩ,
sɩ kʋ tʋŋɩ n tɩtʋŋ-dɛɛra maama
kʋ pa‑m na?
12 Nmʋ ta wʋ́ kɩ n cɩga
dɩ ga-naa nɩ: kʋʋ́ ja n faa
kʋ joori kʋ zʋ digə kʋ pa‑m,
sɩ n daarɩ n frɩ n mɩna yam na?
13 Nakɩlakɔgɔa yǝni kʋ wuuri
kʋ vwana dɩ dam.
Kʋ vwana kʋrʋ tɩm nan ba maŋɩ
dɩ bugə ni zunə vwana yam
na jɩgɩ lam te tɩn.
14 Kʋ yǝni kʋ dɩ kʋ cɩcara
kʋ yagɩ tɩ-kamparɩ nɩ mʋ,
sɩ kasʋlʋ kʋm fʋnyʋgʋ magɩ-ya.
15 Kʋ nan daa wʋ maanɩ nɩ
ga-varɩm napɔɔna
waɩ ya tui ya nɔnɩ-ya ya lɔɛ.
16 Kʋ maa jɩgɩ kʋ biə kʋ yaara,
nɩ ba daɩ o tɩtɩ biə mʋ tɩn.
Kʋ yigə tǝrǝ dɩ kʋ na yaarɩ
kʋ lwe-ba kafɛ te tɩn.
17 Kʋ nan yɩ amʋ Wɛ na wʋ pɔɔrɩ swan a sigi a pa-kʋ,
yɩ a wʋ sɛ sɩ kʋ joŋi yi-pʋrʋ tɩn ŋwaanɩ mʋ.
18 Dɩ kʋ dɩ, kʋ na zaŋɩ wɛɛnɩ
sɩ kʋ duri dɩ fʋra,
kʋʋ́ mwanɩ sisəŋ-nɔɔnʋ
dɩ ka diru wʋm mʋ.
19 Nmʋ yɩ wʋlʋ na kwe dam
n paɩ sisəŋ-nɔɔnʋ tɩn mʋ na?
Nmʋ mʋ pugi ka ban dɩdaanɩ vaa kʋlʋ na dʋlɩ zɩm dɩ gwiə tɩn na?
20 Nmʋ nan waɩ n pa ka faŋa
nɩ kayɩra na kɩ te,
yɩ ka sin viu ka yagɩ
sɩ ka ma fugi nɔɔna tɩn na?
21 Ka napɔɔna yǝni ya guri tɩga
dɩ baarɩ mʋ,
yɩ ka brɩ nɩ ka yiǝ sɩɩnɩ
najara ŋwaanɩ.
Ka ma yɔɔrɩ ka duri
ka zʋ najara yam wʋnɩ.
22 Ka nan jɩgɩ fʋʋnɩ tɩtɩ dɩ ka mwanɩ mʋ, ka bɩcarɩ ba di,
ka ba twəni ka kɩ kwaga nɩ sʋ-lɔŋɔ yigə nɩ.
23 Cɩkɔgɔ wʋ ka saŋa nɩ mʋ
kʋ dwana,
yɩ najara cicwe dɩ sʋ-lwaanʋ
nyɩɩna wɩa yigə nɩ.
24 Ka yɩ nyarɩ-nyarɩ mʋ
sɩ ka cɔ tɩga ka guri.
Ba na wugi nabɔnɔ najara ŋwaanɩ,
ka warɩ ka zɩgɩ cɩmm.
25 Ba na yǝni ba wu nabɔnɔ kʋm,
ka wʋ́ ləri dɩ wʋpolo mʋ.
Ka maa zɩgɩ yigə yigə mʋ
ka ni jara-kǝm lwəm,
yɩ ka ta ni jar-kərə bam
na kɩ sɔɔ kʋlʋ tɩn,
dɩ ba yigǝ tiinǝ bam kwǝri
na zaŋɩ wɛɛnɩ te tɩn.
26 Kʋ yɩ nmʋ tɩtɩ yǝno baŋa nɩ mʋ
kawulə yarɩgɩ kʋ vwana
kʋ jaanɩ wɛyuu nɩ
kʋ ve jagwiə seeni na?
27 Kaloŋ-zɔŋɔ dɩ nan cəgi
nmʋ ni-taanɩ mʋ,
sɩ kʋ taa kaagɩ wɛyuu nɩ kʋ yaara,
yɩ kʋ sɔ kʋ pogo pweeru yuu nɩ na?
28 Kʋ yǝni kʋ din piu yuu mʋ
baŋa baŋa kʋ sɔ kʋ pogo,
yɩ dáanɩ mʋ kʋ naɩ dalɩm je.
29 Kʋ na wʋ piu kʋm yuu nɩ kʋntʋ,
kʋ tʋlɩ kʋ nii kʋ naɩ kʋ wʋdiu mʋ yigə yigə.
30 Twa na wʋ mɛ seeni tɩn,
dáanɩ mʋ duuru wʋm wʋ́ taa wʋra.
O biə dɩ maa wʋ́ jeeri ba nyɔ jana.»