Baŋa-Wɛ na ləri Zobi taanɩ dɩm te tɩn
38
Baŋa-Wɛ maa zɩgɩ vu-fɔrɔ kʋm wʋnɩ DƖ ləri Zobi taanɩ dɩm, yɩ DƖ ta DƖ wɩ:2 «Nmʋ yɩ wɔɔ mʋ sɩ n bwɛ
amʋ wʋbʋŋa na jaanɩ te tɩn,
yɩ n ŋɔɔnɩ wǝǝnu tɩlʋ n na yǝri tɩn?a
3 Fɔgɩ n zɩgɩ kǝŋkǝŋ
sɩ n jeeri-nɩ nɩ baarʋ tɩn,
sɩ a lagɩ a bwe‑m taanɩ mʋ.
Nmʋ dɩ nan maŋɩ sɩ n ləri
a bwiə yam mʋ.
4 Nmʋ dɛɛn wʋ yən nɩ mʋ
yɩ amʋ cwi tɩga kam baŋa kuri?
Nmʋ yi na sɩɩnɩ dɩ pʋʋrɩ,
ta n brɩ-nɩ.
5 Wɔɔ mʋ jeeli tɩga baŋa yalɩm ni
na wʋ́ taa maɩ te tɩn?
Wɔɔ mʋ kwe lwara ŋʋna
sɩ o ma o maŋɩ-ka?
Nmʋ nan wʋ́ taa ye tɩntʋ maama na?
6 Bɛ baŋa nɩ mʋ tɩga kam kuri cwi pa ka zɩgɩ da?
Wɔɔ nan mʋ cwi
ka kabri-kuri kam?
7 Wɔɔ mʋ kɩ kʋntʋ maama
yɩ calɩcwɩ sɩm tɔgɩ daanɩ
sɩ leeni le tɩ-pʋra maŋa nɩ,
yɩ wɛyuu nɔn-kɔgɔ kʋm maama
dɩ caka dɩ wʋpolo?b
8 Nɩnɩʋ kʋm na bam dɛɛn
na pi ba nuŋi tɩn,
wɔɔ mʋ lɔgɩ pɩmpala o tiŋi
sɩ dɩ cɩ ba cwǝŋǝ?
9 Amʋ dɛɛn pɛ kunkwǝǝnu mʋ kwǝli nɩnɩʋ kʋm,
pa kʋ wʋ lim wʋnɩ.
10 A ma yɔɔrɩ a tiŋi bibələ mʋ a pa-kʋ,
yɩ a beeri bwəəru dɩ luuru
a ma a cɩ-kʋ a yagɩ da.
11 Amʋ laan maa ta dɩ-kʋ a wɩ:
‹Nmʋ ba maŋɩ sɩ n lɛɛnɩ
n kɛ yo seeni.
N na-caŋɩna na pɔgɩlɩ te maama,
sɩ wʋ́ maŋɩ yo seeni mʋ.›c
12 Nmʋ ŋwɩa maama wʋnɩ
n pɛ dɛ dɩm ni nɩ:
tɩga kam maŋɩ sɩ ka pʋʋrɩ na?
13 Nmʋ pɛ wɩa puli ka nyɩ
lʋgʋ baŋa ni maama nɩ,
yɩ ka pooni pa nɔn-balwaarʋ duri ba səgi na?
14 Tɩ-pʋra ni nɩ tɩga kam baŋa lam
yǝni ka nuŋi mʋ jaja,
nɩ gɔrɔ na gɔgɩrɩ
dɩ nyɩnyʋrʋ dwi dwi te tɩn.
15 Nɔn-balwaarʋ tɩm daa ba jɩgɩ pooni sɩ ba taa tʋŋa,
yɩ ba wʋ-lʋŋ-tɩtʋŋa dam dɩm
laan cɔgɩ mʋ.
16 Nmʋ ta wanɩ n vu n yi nɩnɩʋ kʋm buli-yiə na buri mɛ tɩn na?
Nmʋ tu nɩnɩʋ kʋm na-luŋə je nɩ
n vu n dwe kʋ tɩga kam na?
17 Ba ta jaanɩ‑m ba vu ba brɩ ni dɩlʋ
nɔɔna na wʋ́ tɔgɩ da ba zʋ
curu wʋ mɛ na yɩ lim je tɩn na?
18 Nmʋ nan ta lwarɩ tɩga kam baŋa
na daga ka maɩ te tɩn na?
Nmʋ na ye kʋntʋ maama,
sɩ n ta n brɩ-nɩ kʋ na yɩ te tɩn.
19 Pooni yǝni dɩ ve yən nɩ mʋ
dɩ tigə?
Sɩ lim, dɩntʋ yǝni dɩ zʋʋrɩ
yən mʋ?
20 Nmʋ ye cwe sɩlʋ na ve
tɩ na zʋʋrɩ mɛ dɩ mɛ,
sɩ n wanɩ n ja-tɩ n vu da na?
21 Amʋ na naanɩ wǝǝnu tɩm kʋntʋ tɩn dɩ ba lʋgɩ‑m na?
Kʋ nan na sɩɩnɩ kʋ yɩ kʋntʋ,
nmʋ maŋɩ n ye wǝǝnu tɩm kʋntʋ maama ni nɩ.
N bɩna yam tiini ya gaalɩ!
22 Nmʋ ta zʋ di sɩlʋ dʋ-kambana yam
na kikili ya tigi da tɩn na?
23 Amʋ tiŋi-ya sɩ cam dɩ najara maŋa na yǝni ka yi,
sɩ a kwe-ya a mi a yagɩ
tɩga baŋa nɩ.
24 Nmʋ ye n na wʋ́ tɔgɩ cwǝŋǝ kalʋ
n vu n yi a na zɩgɩ mɛ a pa
dʋa kam pɩpɩlɩ ka jagɩ tɩn na?
N ta ye a na zɩgɩ mɛ a dʋlɩ viu kʋm,
sɩ kʋ nuŋi wa-puli seeni kʋ yi tɩga baŋa je maama tɩn na?
25 Wɔɔ mʋ lɔgɩ cwǝŋǝ
sɩ dʋ-fara taa tɔgɩ da ka nɩ,
yɩ dʋ-baga dɩ taa tɔgɩ da ka baga?
26 Wɔɔ mʋ paɩ dʋa kam nɩ
ka bugi kagʋa kalʋ
nɔɔna na ba zʋʋrɩ ka wʋnɩ tɩn?
27 Kʋntʋ wʋ́ pa tɩ-kʋra kam na zurim,
sɩ ga-lɛɛrʋ wanɩ tɩ puli da.
28 Dʋa kam jɩgɩ ko na?
Sɩ nyɔnɔ kʋm,
nabiinu yɩ kʋ ko mʋ na?
29 Wɔɔ dɩ nan mʋ jaanɩ
dʋ-kambana yam pugə,
naa dʋ-zurə kalʋ na jaanɩ waarʋ
ka ba tɩn pugə?
30 Ka maa paɩ bwi sɩm na bam
dɔ ba kɩ dam nɩ kandwɛ doŋ,
yɩ nɩnɩʋ kʋm baŋa dɩ zuri lɔgɩ-lɔgɩ?
31 Kʋ na yɩ calɩcwɩ dwi dwi
na kikili daanɩ te tɩnd,
nmʋ wʋ́ wanɩ n kwe-sɩ n vɔ daanɩ,
naa n bwəli-sɩ n yagɩ na?
32 Nmʋ nan waɩ-sɩ n brɩ
sɩ sɩ taa fuŋi sɩ maŋa nɩ lanyɩranɩ,
yɩ sɩ brɩ sɩ nyɩnyʋrʋ nɩ vara tɩn na?
33 Nmʋ ye cwe sɩlʋ wɛyuu wǝǝnu tɩm na tɔga pa tɩ wʋra tɩn na?
N nan wʋ́ wanɩ n pa cwe sɩm kʋntʋ taa tʋŋa tɩga baŋa nɩ na?
34 Nmʋ wʋ́ wanɩ n pa n kwǝrǝ zaŋɩ
ka yi kunkwǝǝnu tɩm
sɩ n pa-tɩ ni sɩ tɩ cuuri dɩ dʋa
yɩ na-fara ba kʋ li
nmʋ je sɩm maama nɩ na?
35 Nmʋ wʋ́ wanɩ n dʋlɩ
dʋa pɩpɩlɩm n yagɩ,
sɩ ka sɛ ka kɩ n ni dɩm
na brɩ te tɩn maama na?
36 Wɔɔ mʋ pɛ kunkwǝǝnu tɩm
jɩgɩ swan dʋa nɩnɩm seeni,
sɩ kunu dɩ taa ye kʋ tɩtʋŋa ni nɩ?
37 Wɔɔ dɩ nan mʋ waɩ o tɔgɩ yǝno ŋwaanɩ
o garɩ kunkwǝǝnu tɩm ni o tiə,
yɩ kʋ tu ta waɩ-tɩ o gunə
sɩ tɩ dʋa taa nɩ,
38 sɩ kʋ pa tɩ-kʋra kasʋlʋ kʋm bugi,
yɩ tɩɩrʋ tɩm dɩ məəli daanɩ.
39 Nywəənu kana na wɔɛ,
nń wanɩ n beeri nwana
n ja n ba n pa-tɩ na?
N ta wʋ́ pa nyoŋ-pwalɩ faarɩ tɩ wʋʋ,
40 nɩ tɩ na tigi tɩ bɔɔna nɩ,
naa tɩ na vwɛ punnu wʋnɩ mʋ dɩ na?
41 Wɔɔ mʋ yǝni o beeri wʋdiu
o paɩ bacangaarʋ,
nɩ tɩ biə na yǝni ba keeri
ba loori Wɛ,
yɩ ba kaagɩ ba beeri wʋdiu?»