37
Amʋ dɩ na ni dʋ-viu kʋm sɔɔ tɩn mʋ a wʋʋ diə.
A bɩcarɩ dɩ maa yɔɔrɩ dɩ zaga.
2 Fɔgɩ á cəgi-na sɩ á wʋ́ ni
DƖ kwǝrǝ kam na wuuri te tɩn.
Kʋ maa yɩ mumunim dɩlʋ
na nuŋi DƖ ni nɩ tɩn mʋ.
3 DƖ yǝni o liligi DƖ dʋa pɩpɩlɩm mʋ
DƖ yagɩ wɛyuu nɩ
sɩ dɩ pooni dɩm vu dɩ yi
tɩga kam ni maama.
4 Kʋntʋ kwaga nɩ mʋ
DƖ yǝni DƖ suuri dɩ kwǝr-dɩa.
DƖ na wʋra o bagɩ pɩna-pɩna kʋntʋ tɩn,
kʋlʋkʋlʋ ba cʋ pɩpɩlɩm dɩm.a
5 Wɛ na bagɩ dɩ kwǝr-dɩa kʋntʋ,
kʋ sɔɔ kʋm yɩ wo-kɩnkagɩlɩ mʋ.
DƖ maa kɩ wo-kamunə yalʋ
dɩ́ na ba ni ya kuri dɩ́ ti tɩn.
6 DƖ maa tɛ dɩ nɛɛzɩ DƖ wɩ:
‹Ta n nɩ tɩga kam baŋa nɩ,›
yɩ DƖ ta tɛ dɩ dʋ-fara
sɩ ka taa tiini ka loi tɩga kam nɩ.
7 DƖ yǝni DƖ cʋ nɔɔna maama
dɩ ba tɩtʋŋa yam,
sɩ kʋ pa ba lwarɩ DƖ dɩ na tʋŋɩ te tɩn.
8 Ga-vara bam tɩtɩ dɩ duri
ba səgi mʋ, yɩ ba laan maŋɩ
ba dalɩm je sɩm nɩ.
9 Dʋ-viu kʋm wʋ́ nuŋi
kʋ jǝgǝ kam nɩ kʋ ba.
Vu-fɔrɔ kʋm dɩ wʋ́ ja waarʋ kʋ ba.
10 Wɛ ma yɔɔrɩ DƖ sin DƖ viu mʋ
yɩ kʋ waarʋ tɩm daga,
pa bwi sɩm na bam dɔ
ba kɩ dam.
11 DƖ maa paɩ dʋa tɩnɩ
dɩ kunkwən-luluru,
yɩ dʋa pɩpɩlɩm dɩ jagɩ
kunkwǝǝnu tɩm wʋnɩ.
12 Tɩ yǝni tɩ tɔgɩ Wɛ ni dɩm
yɩ tɩ pipiri tɩga kam
ni maama nɩ mʋ,
sɩ tɩ yɔɔrɩ tɩ kɩ DƖ na brɩ-tɩ te tɩn.
13 Wɛ na yǝni DƖ pa kʋlʋ kɩ
tɩga kam baŋa nɩ tɩn,
kʋ waɩ kʋ ye sɩ
DƖ waarɩ nabiinǝ mʋ,
naa sɩ DƖ ma DƖ brɩ nɩ
DƖ jɩgɩ ba sono.
14 Zobi, nan kwaanɩ sɩ n cəgi
a taanɩ dɩntʋ.
Zuri n yɩra sɩ n maanɩ
Wɛ tɩtʋŋ-kɩnkagɩla yam n nii.
15 Nmʋ ye Wɛ na kɩ te DƖ paɩ kunkwǝǝnu tɩm ni pa tɩ veǝ,
dɩ DƖ na kɩ te DƖ paɩ dʋa pɩpɩlɩ na?
16 Nmʋ ta ye DƖ na təli kunkwǝǝnu tɩm te wɛyuu nɩ na?
Tɩ nan brɩ DƖ na tɔgɩ DƖ yǝno ŋwaanɩ
DƖ kɩ tɩtʋŋ-kɩnkagɩla te tɩn mʋ.
17 Dʋ-viu nan na nuŋi
tɩga jagwiə baŋa seeni,
pa wulim jɩgɩ tɩga baŋa maama,
nmʋ luluŋ-bɩa wʋ́ ciiri mʋ
ka bugi n gwaarʋ tɩm.
18 Nmʋ wʋ́ wanɩ n wǝli dɩ Wɛ
sɩ á ja wɛyuu kʋm á lwarɩ,
sɩ kʋ taa dana nɩ niu kʋlʋ
ba na mɛ canna ba kɩ tɩn na?
19 Nan pa dɩ́ lwarɩ kʋlʋ
dɩ́ na maŋɩ sɩ dɩ́ ta dɩ Wɛ tɩn.
dɩbam nan dáa ba lagɩ dɩ́ ta kʋlʋkʋlʋ,
dɩ́ nayərim dɩm na nyɩ dɩ lim tɩn ŋwaanɩ.
20 Aá wanɩ a brɩ Wɛ nɩ:
a lagɩ a ŋɔɔnɩ taanɩ dɩd-o na?
Kʋ yaá brɩ nɩ a lagɩ
sɩ DƖ ja-nɩ DƖ cɔgɩ mʋ.
21 Kʋ nan na yɩ te lele tɩn,
wɩa tiini ka nyɩ dɩ dam
wɛyuu kʋm nɩ,
yɩ nɔɔna warɩ-ka sɩ ba nii.
Kʋ nan yɩ viu na kalɩ
kunkwǝǝnu tɩm kʋ kɛ
kʋ saarɩ-tɩ wɛyuu kʋm nɩ tɩn
mʋ te kʋntʋ.
22 Wɛ nuŋi jazɩm baŋa seeni je sɩm nɩ mʋ dɩ bɩɩna,
yɩ dɩ nyɩɩna dɩ paarɩ-zulǝ.
DƖ nɩnwaŋa kam maa gilimi‑DƖ
yɩ ka tiini ka jɩgɩ fʋʋnɩ.
23 Kʋ na yɩ Dam-fɔrɔ Tu Wɛ dɩm,
DƖ tiini DƖ daga DƖ dwe
sɩ nabiinǝ yi DƖ yɩra.
DƖ dam dɩm yɔɔrɩ dɩ gaalɩ.
DƖ nan na tʋŋɩ cɩga yɩranɩ tɩn ŋwaanɩ,
DƖ ba bɛɛsɩ nɔɔna.
24 Kʋntʋ ŋwaanɩ mʋ
nɔɔna yɔɔrɩ ba kwarɩ-DƖ.
Wɛ yigə nan tǝri balʋ na brɩ ba tɩtɩ nɩ ba jɩgɩ swan tɩn wʋnɩ.»