36
Elihu daa ta ma ta o wɩ:
2 «Zuri n yɩra sɩ a daa taa ŋɔɔnɩ a wǝli da fɩɩn,
sɩ n wanɩ n lwarɩ kʋlʋ a ta na
wʋ́ brɩ-m Wɛ ŋwaanɩ tɩn.
3 A lagɩ a kwe yǝno taana
dwi dwi mʋ a ma a brɩ-m,
sɩ n lwarɩ nɩ a Kəru wʋm
sɩɩnɩ o wʋ o cɩga wʋnɩ.
4 Cɩga ŋwaanɩ tɩn, wǝǝnu tɩlʋ
a na maŋɩ sɩ a ta tɩn daɩ vwan.
Wʋlʋ na zɩgɩ n yigə nɩ o ŋɔɔnɩ tɩn
nan jɩgɩ wʋbʋŋa o ti mʋ.
5 Wɛ tiini DƖ jɩgɩ dam.
Dɩ kʋ dɩ,
DƖ ba gooni nɔɔn-nɔɔnʋ.
DƖ nan sɩɩnɩ DƖ jɩgɩ dam,
yɩ DƖ yǝni DƖ ja DƖ wʋbʋŋa DƖ ti mʋ
sɩ DƖ kɩ kǝm.
6 DƖ ba paɩ nɔn-balwaarʋ cwǝŋǝ
sɩ ba taa ŋwɩ.
Nabwənə balʋ ba na jɩgɩ ba bɛɛsɩ tɩn nan wʋ́ na cɩga DƖ tee nɩ.
7 DƖ yi pagɩ nɔn-ŋʋna baŋa nɩ mʋ,
sɩ DƖ pa ba tɔgɩ dɩ pwa
ba di paarɩ,
yɩ ba daarɩ ba na zulə
sɩ kʋ taa ve maŋa maama.
8 Ba nɛ sɩm nan na vɔgɩ
dɩ capʋnnʋ mʋ diŋ-diŋ dɩ,
pa ba jɩgɩ yaara ba di,
9 Wɛ wʋ́ lɩ kʋlʋ ba na kɩ
ba cɔgɩ tɩn mʋ DƖ brɩ-ba,
dɩ ba na tusi
yɩ ba zǝŋi ba tɩtɩ te tɩn.
10 DƖ maa paɩ ba pʋrɩ ba zwa
sɩ ba joŋi kʋrɩsɩm,
yɩ DƖ daarɩ DƖ kaanɩ-ba sɩ ba joori
ba kǝm-balwaarʋ tɩm kwaga nɩ.
11 Ba maa na sɛ DƖ ni dɩm
yɩ ba daarɩ ba zuli‑DƖ,
ba laan wʋ́ taa ve yigə mʋ
yɩ ba di ywəəni
ba ŋwɩa da yam maama wʋnɩ.
12 Ba nan na vɩn Wɛ kwiə yam,
ba laan wʋ́ tɔgɩ curu cwǝŋǝ
ba jea mʋ.
ba wʋ́ tɩ mʋ,
ba nayərim dɩm wʋnɩ.
13 Nɔn-balwaarʋ nan ba fɔgɩ
ba zuri ba bana.
Wɛ na maŋɩ DƖ waarɩ-ba
te maama dɩ,
ba ba loori zǝnǝ DƖ tee nɩ.
14 Bantʋ yǝni ba tɩ
ba nɔn-dʋnnɩ maŋa nɩ mʋ,
yɩ ba guri dɩ cavɩɩra,
nɩ baara balʋ na kɩ tʋlʋ
jwǝnǝ zulim baŋa nɩ tɩn.
15 Balʋ na jɩgɩ yaara ba di tɩn mʋ
Wɛ wʋ́ tɔgɩ ba yaara yam baŋa nɩ
DƖ joŋi-ba DƖ yagɩ,
yɩ DƖ vɩɩrɩ DƖ tɩtɩ dɩ ba
ba cam dɩm wʋnɩ.
16 Wɛ nan koori nmʋ mʋ
sɩ DƖ lɩ‑m n cam dɩm wʋnɩ,
sɩ n vu n yi jəgə na yɩ yalɩgʋ tɩn
mɛ kʋlʋkʋlʋ na bá daanɩ‑m tɩn.
DƖ nan ta kwe wʋdi-laarʋ
DƖ zɩgɩ n yigə nɩ,
sɩ n ta n di n wʋbʋŋa.
17 Nɔn-balwaarʋ waarɩm wʋbʋŋa
laan mʋ su n yuu.
Cɩga sarɩya nan wʋ́ sɩɩnɩ
ya kɩ ya pa‑m.
18 Ta n ye n tɩtɩ sɩ n yɩ pa
nɔɔn-nɔɔnʋ na cwǝŋǝ
sɩ o kwe o jɩjɩgɩrʋ o sʋgɩ‑m
sɩ n kɩ n cɔgɩ.
Nan yɩ sɛ sɩ n joŋi dim
sɩ kʋ pa n kɩ n tusi.
19 Nmʋ jɩjɩgɩrʋ tɩm na daga te,
yɩ n na tʋŋɩ dɩ dam te maama dɩ,
tɩ wʋ́ wanɩ tɩ cɩ
sɩ cam yɩ yi‑m na?
20 Yɩ ta n je n tɩɩna sɩ lim ba
dɩ kwǝli‑m tɩtɩɩ nɩ,
dɩ kʋ na yɩ maŋa kalʋ
nɔɔna na da ba je tɩn dɩ.
21 Ta n ye n tɩtɩ sɩ n yɩ pipiri
n tʋ kǝm-balwaarʋ wʋnɩ.
Cam nan tu n baŋa
sɩ kʋ cɩ nmʋ dɩ kikiə yam kʋntʋ doŋ.
22 Nii mʋ! Wɛ dam dɩm ba tiə.
Bɩrɩnʋ wʋdoŋ tǝrǝ
o na wʋ́ maŋɩ dɩ Wɛ.
23 Nɔɔn-nɔɔnʋ warɩ sɩ o brɩ Wɛ
cwǝŋǝ kalʋ DƖ na wʋ́ tɔgɩ tɩn.
Ba nan ba tɛ dɩ Wɛ ba wɩ:
‹Nmʋ kɩ tɩntʋ mʋ n cɔgɩ.›
24 Nan guli sɩ n tee‑DƖ
DƖ tɩtʋŋa yam ŋwaanɩ,
nɩ nɔɔna na yǝni ba leeni
ba tee-DƖ te tɩn.
25 Nabiinǝ maama nɛ kʋlʋ DƖ na kɩ tɩn.
Ba nan zɩgɩ yigə yigə mʋ
yɩ ba tʋlɩ ba nii ba na.
26 Cɩga tɩn, Wɛ tiini DƖ yɩ kamunu,
pa dɩ́ warɩ sɩ dɩ́ lwarɩ-DƖ dɩ́ ti.
Nɔɔn-nɔɔnʋ warɩ sɩ o jeeli
Wɛ bɩna yam ni na maɩ te tɩn.b
27 Wɛ yǝni DƖ la tɩga baŋa na bam mʋ DƖ zǝŋi wɛyuu nɩ,
yɩ DƖ laan pa ba ji dʋa
kunkwǝǝnu tɩm wʋnɩ.
28 Dʋa kam laan ma yǝni
ka nuŋi wɛyuu nɩ ka nɩ
ka bugi tɩga kam
sɩ nabiinǝ na-ka zanzan.
29 Wɔɔ mʋ waɩ o lwarɩ Wɛ na kɩ te
DƖ lwarɩ kunkwǝǝnu tɩm?
Naa DƖ na kɩ te DƖ je DƖ digə kam nɩ,
DƖ bagɩ pɩna-pɩna tɩn?
30 Nii DƖ na kɩ te DƖ pa dʋa kam pɩpɩlɩ wɛyuu nɩ,
yɩ DƖ ta kwǝli nɩnɩʋ wʋ na-luŋə kam.
31 Wɛ tɔgɩ kənə yam kʋntʋ baŋa nɩ mʋ
DƖ nii lʋgʋ baŋa tɩɩnɩ dɩm baŋa nɩ,
yɩ DƖ pa nabiinǝ naɩ ba wʋdiiru zanzan.
32 DƖ yǝni DƖ ze pɩpɩlɩm o jɩŋa nɩ
nɩ cicwe mʋ tɩn,
yɩ DƖ dʋlɩ-dɩ DƖ yagɩ
sɩ dɩ yi mɛ DƖ na lagɩ tɩn.
33 Dʋ-baga brɩ nɩ dʋ-viu mʋ zaŋɩ.
Sɔŋɔ vara tɩtɩ dɩ yǝni
ba brɩ kʋntʋ mʋ.