35
Elihu daa ta ma ta o wɩ:
2 «Zobi, fɔgɩ n bʋŋɩ
n taanɩ dɩm wʋnɩ n nii,
kʋ yɩ kʋ cwǝŋǝ nɩ na?
N brɩ n tɩtɩ nɩ:
n jɩgɩ bʋra Wɛ yigə nɩ.
3 N ta bwe Wɛ mʋ n wɩ:
‹A na kɩ lwarɩm,
kʋ lagɩ kʋ kɩ-m bɛɛ mʋ?
A nan na culi lwarɩm,
a lagɩ a na bɛ nyɔɔrɩ mʋ?›
4 Amʋ nan wʋ́ ləri nmʋ
dɩ n badonnǝ batɔ bam.
5 Kwǝni n yuu n nii wɛ-baŋa kam,
sɩ n daarɩ n nii kunkwǝǝnu tɩm
na tiini tɩ wʋ wɛyuu nɩ te tɩn.
6 Nmʋ lwarɩm dɩm ba saɩ Wɛ yɩra.
Nmʋ na cɔgɩ pa kʋ daga
te maama dɩ,
kʋ lagɩ kʋ kɩ-DƖ bɛɛ mʋ?
7 Nmʋ nɔn-ŋʋnnɩ jɩgɩ zǝnǝ
kʋ paɩ Wɛ mʋ na?
DƖ lagɩ DƖ joŋi bɛɛ mʋ n jɩŋa nɩ
sɩ DƖ taa te?
8 N pu-sɩŋa kikiə yam cɔgɩ
n donnǝ nabiinǝ mʋ,
yɩ n nɔn-ŋʋnnɩ dɩm dɩ wǝli
bantʋ yɩranɩ.
9 Cam maŋa nɩ,
nɔɔna yǝni ba coosǝ mʋ.
Ba maa keeri ba beeri zǝnǝ,
dɩdɛɛra na bɛɛsɩ-ba tɩn ŋwaanɩ.
10 Nɔɔn-nɔɔnʋ nan ba tɛ o wɩ:
‹Amʋ Kəru Wɛ nan bɛ?
Wʋntʋ mʋ paɩ a ni waɩ dɩ purim
dɩ leeni le tɩtɩɩ nɩ.
11 O maa paɩ dɩ́ jɩgɩ wʋbʋŋa
yɩ dɩ́ jɩgɩ yi-pʋrʋ dɩ́ dwe
vara dɩ zunə dwi maama.›
12 Cam maŋa nɩ nabiinǝ yǝni
ba coosǝ,
yɩ Wɛ vɩn sɩ DƖ cəgi ba loro kʋm,
ba na jɩgɩ yi-dɛɛrɩ
yɩ ba tʋŋɩ lwarɩm tɩn ŋwaanɩ.
13 Cɩga tɩn, Dam-fɔrɔ Tu Wɛ dɩm
ba cəgi ba wara yam.
DƖ nan nii ba kərə kam sɩ ka taa yɩ bɩtar-yɔɔrʋ mʋ DƖ yigə nɩ.
14 Kʋntʋ tɩn, Zobi,
Wɛ wʋ́ cəgi n taanɩ dɩm na?
N nan kaagɩ n tɛ wɩ: n ba na‑DƖ,
yɩ n taanɩ dɩm tigi DƖ yigə nɩ,
pa n cəgi-DƖ sɩ DƖ pa DƖ kwǝrǝ.
15 Nmʋ ta tɛ n wɩ: Wɛ ba tɔgɩ
DƖ ban-zɔŋɔ kʋm baŋa
DƖ waarɩ lwarɩm-kərə,
DƖ yigə na tǝrǝ dɩ ba lwarɩm kikiǝ tɩn ŋwaanɩ.
16 Kʋ maa brɩ nɩ
Zobi na yǝni o puri o ni,
bɩtar-yɔɔrʋ yɩranɩ mʋ nuŋi dɩ wʋnɩ.
O tiini o ŋɔɔnɩ bɩtarbiǝ zanzan,
yɩ o yǝri kʋlʋkʋlʋ ni nɩ.»