34
Elihu ta ma ta o wɩ:
2 «Abam jɩgɩ swan mʋ na?
Nan cəgi-na a taanɩ dɩm.
Á zaasɩ á yi na?
Pʋrɩ-na á zwa sɩ á cəgi.
3 Bɛŋwaanɩ nabiinǝ zwa cəgi taana
sɩ ba lwarɩ mʋ,
nɩ ba dindəlimə na yǝni
ya laŋɩ wʋdiiru te tɩn.
4 Nan pa-na dɩ́ yɛ dɩ́ lwarɩ
kʋlʋ dɩ kʋlʋ na maŋɩ tɩn,
sɩ dɩ́ kɩ daanɩ dɩ́ zaasɩ
cwə-laa tɔgɩm.
5 Bɛŋwaanɩ Zobi taga o wɩ:
‹Amʋ jɩgɩ bʋra mʋ,
Wɛ nan ta vanɩ-nɩ cɩga.
6 Dɩ amʋ na wʋ a cɩga wʋnɩ tɩn dɩ,
nɔɔna ta paɩ a yɩ vwa-nyɩm mʋ.
Amʋ wʋ kɩ a sa cwǝŋǝ,
dɩ kʋ dɩ, kʋ ni-nɩ sɩ kʋ kɛ jɩŋa.›
7 Zobi nɔn-dwi dɩm wʋra na?
O tiini o jɩgɩ nɔɔnʋ tʋra,
nɩ o na jɩgɩ na mʋ o nyɔ tɩn.
8 O soe sɩ o taa yɩ dɩ kəm-balwaarʋ tiinə dɩ pusɩŋ-nyɩna mʋ.
9 Bɛŋwaanɩ o ya tagɩ o wɩ:
‹Nɔɔnʋ na kwaanɩ
sɩ o kɩ o su Wɛ yi,
o bá na nyɔɔrɩ kʋ baŋa nɩ.›
10 Abam na bʋŋɩ nɩ
á yɩ wʋbʋŋa tiinə tɩn,
nan cəgi-na a taanɩ dɩm.
Dam-fɔrɔ Tu Wɛ dɩm brɩ
DƖ bá tʋŋɩ lwarɩm kɔtaa!
DƖ bá wanɩ DƖ kɩ DƖ sa cwǝŋǝ dɩ.
11 Wɛ yǝni DƖ pa nɔɔnʋ joŋi nyɔɔrɩ
o tɩtʋŋa baŋa nɩ,
pa kʋ tu na o nyɩm sɩ kʋ maŋɩ
dɩ o kikiə na yɩ te tɩn mʋ.
12 Dam-fɔrɔ Tu Wɛ dɩm warɩ DƖ kɩ kǝm sɩ DƖ tʋŋɩ lwarɩm dɩ wʋnɩ.
DƖ nan ba kwɩɩlɩ cɩga kam
DƖ sɩn tɩga nɩ.
13 Wɔɔ mʋ fɔgɩ o kwe tɩga baŋa kam
o kɩ Wɛ jɩŋa nɩ?
Wɔɔ mʋ pɛ‑DƖ ni sɩ DƖ taa nii
lʋgʋ kʋm maama baŋa nɩ?
14 Wɛ nan ya na jaanɩ wʋbʋŋa
sɩ DƖ lɩ DƖ Joro dɩ DƖ siun
nabiinǝ yɩra nɩ,
15 nɔɔna maama wʋ́ tɔgɩ daanɩ
ba tɩ mʋ,
pa ba joori ba ji tɩga tɩɩrʋ.
16 Nmʋ na sɩɩnɩ n jɩgɩ yi-pʋrʋ,
sɩ n cəgi a taanɩ dɩntʋ.
Cəgi a na jɩgɩ kʋlʋ sɩ a ta tɩn.
17 Nmʋ na bʋŋɩ te tɩn,
Wɛ ya na kwɩɩlɩ cɩga kam,
DƖ ta wʋ́ wanɩ DƖ taa nii
lʋgʋ kʋm baŋa nɩ na?
Wɛ nan na yɔɔrɩ
DƖ bʋrɩ cɩga bʋra tɩn,
nmʋ bʋŋɩ sɩ n yáalɩ‑DƖ mʋ na?
18 Dɩntʋ mʋ yǝni DƖ bwɛ pwa nɩ:
‹Abam yɩ nɔn-wo-kʋrrʋ,›
yɩ DƖ ta tɛ dɩ nɔn-yum nɩ:
‹Abam yɩ nɔn-balwaarʋ mʋ.›
19 Dɩntʋ ba kuri nakwa da-wʋnɩ
sɩ DƖ zɩgɩ ba kwaga nɩ.
DƖ maa ba nii nadunə
sɩ ba taa garɩ yinigə tiinə.
Bɛŋwaanɩ ba maama yɩ Dɩntʋ
mʋ naanɩ-ba.
20 Ba yǝni ba da ba tɩ mʋ
tɩtɩɩ kʋnkʋrʋ nɩ.
Wɛ na magɩ-ba, baá tɩ mʋ.
Wɛ wʋ́ lɩ ba mʋmwa mwalɩ-mwalɩ mʋ,
dɩ ba na maŋɩ ba yɩ dɩdɛɛra
te maama dɩ.
21 Wɛ yiǝ pagɩ nabiinǝ kikiə maama baŋa nɩ mʋ.
DƖ maa naɩ ba na-vəli maama.
22 Lim naa lim-nyɔrɩsɩ je tǝrǝ,
kəm-balwaarʋ tiinə na wʋ́ vu
ba səgi da sɩ DƖ yɩ na-ba tɩn.
23 Wɛ daa ba maŋɩ sɩ DƖ saŋɩ nabiinǝ
sɩ ba ba DƖ yigə nɩ,
sɩ DƖ laan di ba taanɩ.
24 DƖ yǝni DƖ cɩcʋgɩ dɩdɛɛra
yɩ DƖ ba bwe-ba.
DƖ laan ma daarɩ DƖ tiŋi babam
DƖ ləri ba yuu nɩ.
25 Cɩga ŋwaanɩ tɩn, DƖ maanɩ
ba kikiə yam na yɩ te tɩn,
pa DƖ ja-ba tɩtɩɩ nɩ DƖ dʋlɩ DƖ yagɩ,
yɩ DƖ daarɩ o mɩɩrɩ-ba.
26 Ba pu-sɩŋa tɩtʋŋa ŋwaanɩ mʋ
DƖ yǝni o waarɩ-ba,
yɩ nɔɔna maama zɩgɩ ba niə.
27 Bɛŋwaanɩ ba baarɩ DƖ kwaga nɩ mʋ,
yɩ ba yigə tǝrǝ dɩ DƖ cwe sɩm tɔgɩm.
28 Ba na jɩgɩ yinigə tiinə bam
ba fɩn te tɩn
pɛ ba keeri ba loori Wɛ,
yɩ DƖ dɩ cəgi ba kərə kam.
29 Wɛ nan ya na maŋɩ da cɩmm mʋ dɩ,
wɔɔ mʋ yi sɩ o yáalɩ‑DƖ?
DƖ maa na səgi DƖ yibiyə,
wɔɔ mʋ wʋ́ wanɩ o nii o na‑DƖ?
Dɩntʋ nan mʋ yɩrɩ nabiinu maama dɩ tɩʋ maama,
30 sɩ DƖ cɩ nɔn-balwaarʋ sɩ ba dɩ yɩ
di paarɩ nɔɔna baŋa nɩ,
ba daarɩ ba pa cam yi-ba.
31 Nɔɔnʋ waɩ o tɛ dɩ Wɛ nɩnɛɛnɩ:
‹Amʋ kɩ a cɔgɩ mʋ
pa a na waarɩm.
A nan daa bá kɩ a sa cwǝŋǝ.
32 Nan brɩ-nɩ a na tusi te
yɩ a wʋ lwarɩ kʋ ni nɩ tɩn.
A na sɩɩnɩ a tʋŋɩ lwarɩm,
a daa bá kɩ a wǝli da.›
33 Nmʋ bʋŋɩ nɩ Wɛ wʋ́ ŋwɩ kʋ tu lwarɩm yam jɩnɩ
sɩ kʋ tɔgɩ nmʋ tɩtɩ wʋbʋŋa mʋ na?
Nmʋ nan vɩn Wɛ na tʋŋɩ te tɩn mʋ.
Kʋ wʋ nmʋ tee nɩ.
Nmʋ mʋ wʋ́ kuri n pa n tɩtɩ,
sɩ kʋ daɩ amʋ.
Kʋntʋ tɩn, pa dɩ́ lwarɩ
n wʋbʋŋa na yɩ te tɩn.
34 Wʋbʋŋa tiinə dɩ yi-pʋrɩ-nyɩna na ni a taanɩ,
baá ta dɩ amʋ nɩ:
35 ‹Zobi kaagɩ o ŋɔɔnɩ a-yəri-ka taanɩ mʋ.
O maa yǝni o ŋɔɔnɩ bɩtar-yɔɔrʋ yɩranɩ.›
36 Amʋ tɩtɩ wʋbʋŋa nɩ,
kʋ maŋɩ sɩ Zobi na waarɩm
sɩ kʋ kɛ jɩŋa,
o na kaagɩ o ŋɔɔnɩ nɔn-balwaarʋ
taana yam doŋ tɩn ŋwaanɩ.
37 O ta kɩ zwabaniə mʋ
o wǝli dɩ o lwarɩm dɩm.
O maa magɩ ni-kantɔgɔ
dɩbam yigə nɩ,
yɩ o daarɩ o maɩ bɩtarbiǝ zanzan
o jɩgɩ Wɛ o mwana.»