Elihu ta ma ta o wɩ:
33
«Zobi, nan zuri n yɩrasɩ n cəgi kɩʋʋ,
sɩ n ni kʋlʋ maama
amʋ na wʋ́ ta dɩ nmʋ tɩn.
2 Amʋ laan ti a yigə mʋ sɩ a puri a ni
sɩ a ta kʋlʋ maama
na wʋ a wʋnɩ tɩn.
3 A ni-taanɩ dɩm brɩ
a wʋbʋŋ-laarʋ na yɩ te tɩn.
A yɔɔrɩ a tɛ yǝno kʋlʋ
na yɩ cɩga cɩga tɩn mʋ.
4 Dam-fɔrɔ Tu Wɛ Joro kʋm
mʋ naanɩ amʋ.
O maa sin o siun o yagɩ a yɩra nɩ
pa a jɩgɩ ŋwɩa.
5 Nmʋ nan na jɩgɩ ni sɩ n puri,
sɩ n ləri a taanɩ dɩm.
Ti n yigə sɩ n zɩgɩ amʋ yigə nɩ
n tʋlɩ n taanɩ dɩm.
6 Wɛ yigə nɩ mʋ amʋ dɩ nmʋ
nan yɩ bɩdwɩ.
Amʋ dɩ nan yɩ dɔgɔ mʋ
ba mɛ ba kɩ-nɩ.
7 Kʋntʋ ŋwaanɩ, yɩ ta n kwarɩ fʋʋnɩ dɩ amʋ.
A nan bá tiini a daanɩ‑m.
8 Nmʋ nan tagɩ tɩntʋ pa amʋ ni.
Nmʋ na tagɩ kʋlʋ n dɩ amʋ zwa nɩ tɩn mʋ tɩntʋ:
9 ‹Amʋ wʋ kɩ kʋlʋkʋlʋ a cɔgɩ.
A ta wʋ a cɩga nɩ mʋ
yɩ a wʋ tusi dɩ kʋlʋkʋlʋ.
10 Dɩ kʋ dɩ, Wɛ beeri cwǝŋǝ
sɩ DƖ vɩ-nɩ.
DƖ yɔɔrɩ DƖ kɩ-nɩ nɩ a yɩ DƖ dʋnʋ tɩn.
11 DƖ kwe cɩgɩrʋ mʋ
o vɔ a nɛ diŋ-diŋ,
yɩ DƖ daarɩ DƖ yɩrɩ a na-vəli maama.›
12 Zobi, nmʋ nan na tagɩ kʋlʋ kʋntʋ tɩn,
kʋ daɩ cɩga mʋ n jɩgɩ n tɛa.
Nii mʋ! A maŋɩ sɩ a ləri‑m,
bɛŋwaanɩ Wɛ daga DƖ dwe nabiinǝ.
13 Bɛɛ mʋ yɩ n jɩgɩ ni sɩ n pʋʋnɩ Wɛ
nɩ DƖ ba ləri n taanɩ dɩm
dɩ fɩnfɩɩn dɩ?
14 Ta n ye nɩ Wɛ yǝni DƖ tɔgɩ
cwe dwi dwi mʋ
DƖ ŋɔɔnɩ dɩ nɔɔna.a
Ba nan yǝni ba warɩ
sɩ ba lwarɩ DƖ kwǝrǝ kam.
15 Nɔɔna na tigi tɩtɩɩ nɩ ba dɔ
ba bəri maŋa kalʋ nɩ tɩn,
Wɛ waɩ DƖ pa ba dwɛ dɩndwɩa,
yɩ DƖ vɩɩrɩ wǝǝnu DƖ brɩ-ba.
16 DƖ maa paɩ DƖ kwǝrǝ tʋ ba zwa nɩ,
pa DƖ ni-kaana yam fugi-ba.
17 Wɛ yǝni DƖ kɩ kʋntʋ sɩ kʋ cɩ nabiinǝ dɩ kǝm-balwaarʋ mʋ,
sɩ DƖ ta cɩ sɩ ba yɩ taa zǝŋi ba tɩtɩ.
18 Dɩntʋ waɩ DƖ cʋ sɩ tʋʋnɩ yɩ ja-ba,
sɩ ba yɩ tɔgɩ curu cwǝŋǝ ba je.b
19 Wɛ nan ta waɩ DƖ pa kʋ ni nabiinǝ
sɩ DƖ tɔgɩ da DƖ zaasɩ-ba.
DƖ maa yǝni DƖ yagɩ
pa ba yɩra yɔɔrɩ ya cɛ
ya pa-ba,
20 pa wʋdiu ji wo-zɔɔnɩ ba yigə nɩ,
kʋ na maŋɩ kʋ ywəmmə
te maama dɩ.
21 Kʋntʋ maa paɩ ba yǝni
ba yɔɔrɩ maama ba ti,
pa ba kwi sɩm tɩtɩ tigi sɩ niə.
22 Ba laan maa yɩ bɔɔnɩ ni vərə,
yɩ tʋʋnɩ dɩ je dɩ cəgi
sɩ dɩ kwe-ba dɩ ja dɩ kɛ.
23 Wɛ malɛsɩ kɔgɔ kʋm wʋnɩ dɩdʋa
nan na wʋ nɔɔnʋ tee nɩ,
sɩ ka zɩgɩ kʋ tu dɩ Wɛ
tɩtarɩ laŋa nɩ,
ka wʋ́ wanɩ ka brɩ nɔɔnʋ wʋm
cwə-laa kalʋ o na jɩgɩ
sɩ o tɔgɩ tɩn.
24 Malɛka kamc laan maa waɩ
o duri nɔɔnʋ wʋm ŋwaŋa
yɩ ka ta wɩ:
‹Cʋ sɩ tʋʋnɩ yɩ ja-o!
Amʋ nan nɛ woŋo
sɩ a ma a ləri kʋ tu yuu nɩ.›
25 Nɔɔnʋ wʋm yɩra laan
wʋ́ joori ya zuri,
sɩ o taa dana nɩ nɔn-dʋŋʋ te.
26 O daa ta wʋ́ warɩ Wɛ,
yɩ o kikiə yam dɩ su Wɛ yi.
O laan maa wʋ́ zɩgɩ Wɛ yigə nɩ
o zuli‑DƖ dɩ ywəəni.
Wɛ dɩ maa wʋ́ pa kʋ tu joori
o taa tɔgɩ cwǝŋǝ cɩga cɩga.
27 Nɔɔnʋ wʋm laan maa wʋ́ taa brɩ o donnǝ nɩ:
‹Amʋ ya kɩ lwarɩm mʋ
yɩ a tusi cwǝŋǝ.
Dɩ kʋ dɩ, Wɛ wʋ kɩ-nɩ
nɩ kʋ ya na maŋɩ sɩ DƖ kɩ te tɩn.
28 DƖ nan liiri-nɩ mʋ
pa a wʋ zʋ tʋʋnɩ goŋo wʋnɩ.
Amʋ laan wʋ́ taa wʋ pooni yigə nɩ mʋ yɩ a di ywəəni.›
29 Cɩga tɩn, Wɛ yǝni DƖ kɩ kʋntʋ doŋ
DƖ pa nabiinǝ kuni bɩle, naa kuni bɩtɔ mʋ,
30 sɩ DƖ wanɩ DƖ cɩ sɩ tʋʋnɩ yɩ ja-ba.
DƖ kɩ kʋntʋ sɩ ba taa ve
ŋwɩa pooni dɩm wʋnɩ mʋ.
31 Zobi, nan ta n yɩ kʋntʋ cɩmm
sɩ n cəgi a taanɩ dɩm kɩʋʋ.
Kɩ yirr, sɩ a daa ta jɩgɩ taanɩ mʋ
sɩ a ta.
32 Nmʋ nan ta na jɩgɩ taanɩ sɩ n ta,
ləri-nɩ sɩ a dɩ cəgi.
Ta n brɩ-nɩ, a na beeri cwǝŋǝ
sɩ a pa n na n bʋra tɩn ŋwaanɩ.
33 Kʋ nan na daɩ kʋntʋ,
nan cəgi amʋ taanɩ dɩm.
Pu n ni, sɩ a lagɩ a brɩ-m
yi-pʋrʋ cwǝŋǝ mʋ.»