Elihu ni-taanɩ
32
Kʋ na tu te tɩn, Zobi badonnǝ batɔ bam daa maa ba kwaanɩ sɩ ba ta taanɩ dɩd-o, bɛŋwaanɩ o sɛ o tɩtɩ nɩ o wɩ o jɩgɩ cɩga. 2 Nɔɔnʋ wʋdoŋ dɩ dɛɛn maa wʋra, o yɩrɩ mʋ Elihu. O nuŋi Ram dwi kʋm wʋnɩ mʋ yɩ o ko yɩ Buzi tu Barakɛɛlɩ. O banɩ ma zaŋɩ dɩ Zobi, dɩ o na pɛ o tɩtɩ jɩgɩ cɩga dɩ kʋlʋ na yi‑o tɩn, yɩ o wʋ pɛ Wɛ jɩgɩ cɩga tɩn. 3 O banɩ ta zaŋɩ Zobi badonnǝ batɔ bam baŋa nɩ mʋ, dɩ ba na wʋ wanɩ sɩ ba ləri Zobi taanɩ dɩm dɩ cɩga, yɩ ba ta vɩn sɩ ba pa‑o bʋra tɩn dɩ.4 Elihu ya pɛ Zobi badonnǝ bam ŋɔɔnɩ ba ti mʋ yɩ wʋntʋ dɩ laan ŋɔɔnɩ dɩd-o, ba maama na kʋɩ‑o tɩn ŋwaanɩ. 5 O maa na je o cəgi ba taana yam yɩ o maanɩ nɩ ba daa ba jɩgɩ taanɩ sɩ ba ta dɩ Zobi tɩn, mʋ o yɩra wiirə sɩ o ta taanɩ.
6 Elihu laan ma ta o wɩ:
«Amʋ yɩ bu mʋ
abam maama yigə nɩ,
yɩ abam maama kʋɩ-nɩ.
Kʋntʋ nan mʋ pɛ a maŋɩ da cɩmm abam tɩtarɩ nɩ,
a na kwarɩ sɩ a ta yǝno taanɩ dɩlʋ na wʋ amʋ wʋbʋŋa nɩ tɩn ŋwaanɩ.
7 Amʋ ya bʋŋɩ a tɩtɩ nɩ a wɩ:
‹Abam na daanɩ lʋgʋ baŋa nɩ tɩn
paɩ á jɩgɩ cwǝŋǝ
sɩ á taá ŋɔɔnɩ swan taana
á brɩ dɩbam.›
8 Amʋ laan nan maanɩ nɩ
nabiinu yi-pʋrʋ tɔgɩ
o joro kʋm na yɩ te tɩn,
nɩ Dam-fɔrɔ Tu Wɛ dɩm na sin
DƖ siun DƖ yagɩ kʋ tu yɩra nɩ
te tɩn mʋ.
9 Kʋ daɩ nɩ kʋkwɩɩrʋ mʋ brɩ yi-pʋrʋ.
Swan dɩ nan daɩ cəlimə
ya ləri nakwa yɩranɩ wʋnɩ.
10 Kʋntʋ ŋwaanɩ mʋ amʋ dɩ nan wɩ:
Cəgi-na a taanɩ dɩm,
sɩ amʋ dɩ ta a na ye te tɩn.
11 Abam na wʋra á ŋɔɔnɩ tɩn,
amʋ yɔɔrɩ a yɩ cɩmm mʋ.
A maa je a cəgi
á wʋbʋŋa na yɩ te,
dɩ á na beeri bɩtarbiǝ
sɩ á ta te tɩn.
12 Amʋ nan yɔɔrɩ a cəgi kɩʋʋ mʋ
sɩ á ni á taanɩ dɩm.
Abam wʋlʋwʋlʋ nan wʋ wanɩ
o brɩ nɩ Zobi tusi.
Á nan ta wʋ wanɩ o taanɩ dɩm
sɩ á ləri á pa‑o.
13 Nan taá ye-na sɩ á yɩ ta wɩ:
‹Dɩbam jɩgɩ swan mʋ.
Wɛ yɩranɩ mʋ maŋɩ sɩ DƖ van‑o.
Kʋ nan daɩ nabiinǝ mʋ wʋ́ kɩ kʋntʋ.›
14 Zobi na tʋlɩ o taanɩ tɩn,
kʋ daɩ amʋ mʋ o lwɛ.
Amʋ dɩ nan bá kwe abam taana yam doŋ sɩ a ma a lǝr-o.
15 Nii mʋ! Ba jaanɩ ba niə!
Ba daa ba jɩgɩ kʋlʋkʋlʋ sɩ ba ta.
16 Ba na zɩgɩ da cɩmm kʋntʋ tɩn,
amʋ dɩ wʋ́ taa yɩ cɩmm mʋ na?
17 Amʋ dɩ nan maŋɩ sɩ a ta taanɩ mʋ.
Amʋ dɩ wʋ́ ta a na ye te tɩn mʋ.
18 Bɛŋwaanɩ, amʋ ni yɔɔrɩ dɩ su
dɩ taanɩ mʋ sɩ a ta.
A nan bá wanɩ a ni dɩm a pu
sɩ a yɩ ta woŋo.
19 Amʋ wʋʋ kʋm nyɩ dɩ lɔɔ kʋlʋ wʋʋ
na su dɩ sa-dʋŋa tɩn mʋ.
Kʋ maa nyɩ dɩ kʋ lagɩ kʋ bagɩ mʋ.
20 Amʋ maŋɩ sɩ a ŋɔɔnɩ
a ni-taanɩ mʋ sɩ a yɩra zuri.
Cɩga tɩn, Aá puri a ni
sɩ a ləri taanɩ dɩm.
21 Amʋ nan na wʋ́ ŋɔɔnɩ te tɩn,
a bá zɩgɩ a pa nɔɔn-nɔɔnʋ.
A nan bá ŋɔɔnɩ ni-sʋnɩ
dɩ nɔɔn-nɔɔnʋ
sɩ kʋ pa kʋ tu yuu zǝŋi.
22 Bɛŋwaanɩ, amʋ ya na ye ni-sʋnɩ ŋwaŋa,
tɩntʋ a Kəru wʋm ya pɛ
a je mʋ tɩga kam baŋa nɩ.»