Zobi ta ma ta o wɩ:
31
«Amʋ wʋbʋŋa nan yɔɔrɩya ja mʋ nɩ:
amʋ bá pa a yiǝ cwǝŋǝ
sɩ ya nii bukɔ sɩ a fra zʋ o wʋnɩ.a
2 Dam-fɔrɔ Tu Wɛ dɩm
na wʋ wɛyuu nɩ tɩn
lagɩ DƖ pa dɩ́ guri tɩta mʋ?
Bɛ nyɔɔrɩ mʋ DƖ kwe DƖ tiŋi
dɩbam ŋwaanɩ?
3 Kʋ na yɩ nɔn-balwaarʋ,
dɩ balʋ na tʋŋɩ lwarɩm tɩn,
DƖ bá pa lɛɛrʋ dɩ cɔgɩm
ba ba baŋa nɩ mʋ na?
4 Wɛ nan naɩ a na-vəli na yɩ te tɩn,
yɩ DƖ daarɩ DƖ jeeli
a naba-laara maama.
5 Amʋ nan kaagɩ a tʋŋɩ vwan mʋ,
naa a gɔɩ naba-laara a ve
a ganɩ nɔɔna mʋ na?
6 Yagɩ sɩ Wɛ kwe-nɩ DƖ maŋɩ
dɩ DƖ bwaŋa kalʋ na yɩ cɩga cɩga tɩn.
DƖ na kɩ kʋntʋ, DƖ wʋ́ na nɩ
a zɩgɩ dɩ a cɩga mʋ.
7 Amʋ ywəri cwǝŋǝ kalʋ
DƖ na tiŋi DƖ pa-nɩ tɩn mʋ
naa a sɛ sɩ a yiǝ ja-nɩ ya pa a cɔgɩ,
naa a mɛ a jɩn mʋ a tʋŋɩ lwarɩm
pa a digimi a tɩtɩ?
8 A nan na sɩɩnɩ a kɩ lwarɩm kʋntʋ doŋ,
sɩ nɔɔna badonnǝ di
kʋlʋ maama a na yaarɩ a na tɩn,
sɩ ba daarɩ ba gɔ wʋdiiru tɩlʋ
a na dugi tɩn ba yagɩ.
9 Amʋ ya na maŋɩ a pa ka-gaa
mʋ sʋgɩ a wʋbʋŋa o wanɩ,
naa a yi na su a doŋ kaanɩ mʋ
pa a səgi o digə ni nɩ,
10 nan yagɩ sɩ a kaanɩ joŋi nɔn-gaa muni o cʋ o pa kʋ tu,
sɩ nɔɔna badonnǝ dɩ taa jɩgɩ
a kaanɩ ba laga.
11 Bɛŋwaanɩ, a kǝm dɩm kʋntʋ
yaá taa yɩ kǝm-lɔŋɔ mʋ,
yɩ kʋ maŋɩ sɩ nakwa bam
vanɩ nɔɔnʋ bʋra kʋ ŋwaanɩ.
12 ɡwalɩm kikiə nan nyɩ dɩ mim
dɩlʋ na zwɛ wǝǝnu kulə,
pa dɩ vu dɩ yi curu tɩtɩ tɩn.
Ya maa wʋ́ cɔgɩ nyɔɔrɩ dɩlʋ maama a na tʋŋɩ a na tɩn.
13 A tɩntʋŋna maa na pʋʋnɩ
amʋ pʋmpʋna,
a wʋ kɩ siri sɩ a cəgi-ba mʋ na?
14 Kʋ ya na daɩ kʋntʋ, yɩ Wɛ na tu
sɩ DƖ bwe-nɩ kʋ ŋwaanɩ,
Aá wanɩ a na ni sɩ a puri
wǝǝnu tɩntʋ maama wʋnɩ na?
15 Kʋ daɩ Wɛ mʋ mɔɔnɩ amʋ
DƖ kɩ a nu pugə nɩ,
yɩ DƖ daarɩ DƖ mɔ bantʋ dɩ na?
16 Yinigə tiinə tu amʋ te dɩ ba cam
yɩ a wʋ wǝli-ba na?
A nan ta pɛ kadənə
tɩɩna yam ti na?
17 Amʋ fɔgɩ a jɩgɩ a wʋdiu
a di a yɩranɩ,
yɩ a wʋ cɛ-kʋ dɩ bɩtara na?
18 Kʋ zɩgɩ a nɔn-dʋnnɩ maŋa nɩ mʋ
a yɔɔrɩ a jɩgɩ bɩtara a kɔna.
A ŋwɩa maama wʋnɩ
a nii kadənə dɩ baŋa nɩ.
19 A na nɛ wʋlʋ yinigə na kɛ jɩŋa
pa o ga gwaarʋ sɩ o zʋ tɩn,
naa wʋlʋ na ba jɩgɩ kʋlʋkʋlʋ
sɩ o ma o kwǝli o yɩra tɩn,
20 a wʋ kwe a piə tankɔlɔ a pa kʋ tu
pa o tee-nɩ,
o na nɛ woŋo sɩ o ma o kwǝli
o tɩtɩ tɩn ŋwaanɩ na?
21 A liligi a nʋa bɩtarʋ yigə nɩ
sɩ a fug‑o,
tɩʋ kʋm dɩdɛɛra na zɩgɩ amʋ kwaga nɩ tɩn ŋwaanɩ mʋ na?
22 A nan na sɩɩnɩ a kɩ kʋntʋ doŋ,
sɩ a vɔŋɔ kʋm gwəri kʋ na lǝgi mɛ tɩn kʋ tʋ tɩga nɩ,
yɩ kʋ zɩgɩ a jatogo kʋm nɩ kʋ bwəri.
23 Bɛŋwaanɩ amʋ ya fʋna nɩ
Wɛ wʋ́ pa lɛɛrʋ yi-nɩ mʋ.
A maa warɩ wo-lwaanʋ tɩm kʋntʋ
sɩ a kɩ,
a na kwarɩ Wɛ dɩ DƖ paarɩ dɩm tɩn ŋwaanɩ.
24 Amʋ nan kwe a tɩɩna
a kɩ a səbu-sɩŋa wʋnɩ,
naa a tagɩ a wɩ:
kʋlʋkʋlʋ daa bá daanɩ-nɩ,
a na jɩgɩ səbu-sɩŋa zanzan tɩn ŋwaanɩ na?
25 A dɛɛn na yɩ nadum tɩn,
a nan jɩgɩ wʋpolo dɩ a jɩjɩgɩrʋ tɩm,
nɩ a tʋŋɩ mʋ a na-tɩ na?
26 Amʋ ta nii wapuli dɩm dɩ ka dam dɩm,
naa a nii cana kam
dɩ ka nɩnwaŋa kam,
27 pa tɩntʋ wanɩ-nɩ tɩ sʋgɩ
sɩ a səgi a zuli-tɩ mʋ na?
28 Nɩ amʋ ya na sɩɩnɩ a kɩ
lwarɩm dɩm kʋntʋ doŋ,
kʋ ya maŋɩ sɩ nakwa bam
vanɩ a bʋra mʋ ya ŋwaanɩ,
bɛŋwaanɩ a wʋ jaanɩ cɩga
dɩ Baŋa-Wɛ dɩm.
29 Cam mʋ na yǝni dɩ yi a dʋnʋ tɩn,
a zɩgɩ a caka dɩ lɛɛrʋ tɩlʋ
na tu o baŋa nɩ tɩn na?
30 Amʋ nan wʋ pɛ a ni cwǝŋǝ
sɩ dɩ cɔgɩ dɩ sɔɔlɩ lwarɩm
dɩ yagɩ kʋ tu baŋa nɩ.
31 Amʋ sɔŋɔ tɩntʋŋna brɩ
ba wʋ tagɩ nɩ:
‹Zobi wʋ pɛ o vərə wʋdiu
sɩ ba di ba su.›
32 Bɛŋwaanɩ, amʋ wʋ sɛ sɩ vərə
maŋɩ pwələ nɩ ba pəni.
A nan yǝni a jeeri-ba lanyɩranɩ mʋ a sɔŋɔ nɩ.
33 A jɩgɩ a lwarɩm mʋ a səgi a wʋnɩ,
sɩ nɔɔn-nɔɔnʋ yɩ lwarɩ
a na kɩ a cɔgɩ te tɩn na?
Nabiinǝ yǝni ba kɩ
wǝǝnu tɩntʋ maama mʋ.
Amʋ nan wʋ kɩ-tɩ.
34 Amʋ wʋ pɩ a tɩtɩ a yagɩ digə nɩ
a je da cɩmm,
a na kwarɩ fʋʋnɩ dɩ nɔɔna na wʋ́ ta wǝǝnu tɩlʋ
ba ma ba gooni-nɩ tɩn ŋwaanɩ.
35 Nɔɔnʋ na wʋra sɩ kʋ tu yigə
taa wʋ a taanɩ dɩm wʋnɩ,
kʋ ya lamma!
Amʋ tʋlɩ a taanɩ dɩm a ti.
Dam-fɔrɔ Tu Wɛ dɩm na jɩgɩ kʋlʋ
sɩ DƖ ta,
DƖ nan ləri a taanɩ dɩm!
Kʋ ya maŋɩ sɩ DƖ pʋpʋnɩ DƖ na jɩgɩ
kʋlʋ sɩ DƖ bwɛ-nɩ kʋ baŋa nɩ tɩn
DƖ tiŋi tɔnɔ nɩ.
36 A yaá kwe DƖ tɔnɔ kʋm kʋntʋ
a daŋɩ a bakalɩ baŋa nɩ,
yɩ a daarɩ a pu-kʋ a yuu nɩ,
nɩ kʋ yɩ paarɩ yipugə mʋ tɩn.
37 Amʋ dɩ nan yaá maŋɩ
a na-vəli maama a brɩ-DƖ.
A maa wʋ́ vu a zɩgɩ DƖ yigə nɩ
dɩ baarɩ nɩ pabu te.
38 A tɩga kam keeri yɩ ka kan yi-na,
amʋ na kɩ a cɔgɩ-ka tɩn ŋwaanɩ na?
39 A nan di a kara wʋdiiru tɩm
yɩ a wʋ ŋwɩ tɩntʋŋna bam mʋ na?
Amʋ pini balʋ na tʋŋɩ
a tɩga kam baŋa nɩ tɩn,
pa ba tɩ dɩ kana na?
40 Amʋ na sɩɩnɩ a kɩ wǝǝnu tɩntʋ doŋ,
sɩ sabarɩ dɩ ga-balwaarʋ di a karɩ sɩm,
sɩ sɩ wʋdiiru daa yɩ kɩ tɩ pa-nɩ.»
Zobi na tagɩ kʋlʋ maama o kweeli tɩn mʋ kʋntʋ.