Zobi ta ma ta o wɩ:
30
«Laan nan nii! Balʋ amʋ na kʋɩ tɩn mʋ jɩgɩ-nɩ ba mwana.Ba yɩ balʋ a ya na wʋ́ gooni
ba kwə mʋ,
ba na wʋ yi sɩ ba taa tɔgɩ
dɩ a kakuri-zəli sɩm
ba nii a vara baŋa nɩ tɩn ŋwaanɩ.
2 Ba tɩtʋŋa maa ba jɩgɩ nyɔɔrɩ
ya pa-nɩ,
ba dam na ti dɩ daarɩ-ba tɩn ŋwaanɩ.
3 Yinigə dɩ kana dɛɛn tiini ka ja-ba,
pa ba yɔɔrɩ ba kaagɩ
kagʋa kam nɩ mʋ
ba lɩlagɩ kasʋlʋ kʋm wʋnɩ tɩtɩɩ nɩ,
sɩ ba nii baá na ba ni-wʋdiu na.
4 Ba vaarɩ tweeru vɔɔrʋ ba dʋna
ba maa jiri wʋdiu,
yɩ ba guri tiu bʋnnʋ ba di.
5 Ba magɩ gullu mʋ ba lɩ-ba
ba tɩɩnɩ dɩm wʋnɩ,
yɩ ba yeeri-ba ba zəli,
nɩ ba yɩ ŋwɩɩna mʋ te.
6 Je sɩlʋ yɩranɩ ba na waɩ
ba zʋʋrɩ da tɩn
yɩ nabarɩ sɩlʋ na kʋgɩ tɩn wʋnɩ,
dɩdaanɩ pweeru bɔɔna
dɩ gugwəəru wʋnɩ mʋ.
7 Ba maa nyɩ dɩ bɩnɛ sɩlʋ na kaagɩ punnu tɩtarɩ nɩ sɩ keeri tɩn.
Ba yǝni ba gilimi daanɩ
sabarɩ je nɩ mʋ.
8 Ba maa yɩ varɩ-yɔɔrʋ na ba jɩgɩ kugu je tɩga kam nɩ,
nɔɔna na zəli-ba tɩn ŋwaanɩ.
9 Bantʋ biə laan nan puli le mʋ
ba leeni ba maɩ ba mwanɩ amʋ,
yɩ amʋ laan jigi ba ni sinsərə mʋ.
10 Ba maa jɩgɩ-nɩ ba nɩɩsa
yɩ ba daarɩ ba cɩ ba tɩtɩ dɩ amʋ.
Ba nan ta yɔɔrɩ ba twɩ lileeru mʋ
ba yagɩ amʋ yibiyə nɩ.
11 Wɛ laan mʋ pɛ kʋ ni-nɩ,
yɩ a daa ba jɩgɩ kǝm kǝm.
Kʋ maa paɩ bantʋ dɩ yɔɔrɩ
ba kɩ-nɩ nɩ ba na lagɩ te tɩn.
12 Nɔn-yɔɔrʋ tɩm kʋntʋ kɩ daanɩ
ba zaŋɩ amʋ jazɩm seeni
sɩ ba jeeri-nɩ dɩ najara.
Ba maa jɩgɩ-nɩ ba zəli
je maama nɩ,
yɩ ba kwɛ cwǝŋǝ ba tiŋi
sɩ ba yi amʋ.
13 Ba cɩgɩ a cwǝŋǝ mʋ
sɩ a yɩ wanɩ a lu.
Ba ma kwaanɩ ba pa a tʋ tɩga nɩ,
yɩ nɔɔn-nɔɔnʋ ba jɩgɩ
sɩ o wǝli-ba.
14 Ba yɔɔrɩ ba tui ba yi amʋ te,
nɩ ba na tɔgɩ kabri na bwəri mɛ tɩn laŋa nɩ ba kɛ te tɩn.
15 Cam dwi dwi mʋ tiini
dɩ jɩgɩ-nɩ dɩ cɔga.
Amʋ zulə ti ya daarɩ-nɩ,
nɩ viu na kalɩ-ya kʋ ja viiri te tɩn.
A yazurə dɩ kɛ ya daarɩ-nɩ mʋ.
16 A ŋwɩa kam laan lagɩ ka je mʋ
ka daarɩ-nɩ.
Amʋ yaara yam maa ba fɔgɩ ya tiə.
17 Tɩtɩɩ dɩm maama wʋnɩ,
kʋ yɔɔrɩ kʋ ni-nɩ mʋ.
Kʋ tiini kʋ cɛ amʋ yɩra
kʋ ba yaga.
18 Wɛ jaanɩ a gɔrɔ kʋlʋ a na zʋ tɩn
DƖ sɔ kʋ ban nɩ mʋ.
DƖ gʋrɩgɩ amʋ gɔrɔ ban nɩ mʋ diŋ-diŋi.
19 DƖ ta yɔɔrɩ DƖ dʋlɩ-nɩ mʋ
DƖ dɩ bwəru wʋnɩ,
pa a maama laan yɩ tɩɩrʋ
dɩ tɩntwarɩm yɩranɩ.
20 Amʋ Tu Wɛ, a keeri a loori nmʋ mʋ yɩ n ba ləri-nɩ.
A ta maa zɩgɩ n yigə nɩ
sɩ a warɩ‑m.
N nan yɔɔrɩ n saarɩ tɩga mʋ,
yɩ n yigə tǝrǝ amʋ wʋnɩ.
21 Nmʋ pipiri n ji nɩ nɔn-cɩa mʋ
n tʋŋɩ amʋ yɩra nɩ.
N ma n kwe n dam maama
n jɩgɩ-nɩ n bɛɛsa.
22 Nmʋ nan ta jaanɩ-nɩ n dʋlɩ n yagɩ,
nɩ viu na kalɩ-nɩ kʋ ja je te tɩn.
Vu-fɔrɔ kʋm mʋ pɛ-nɩ kʋ fufugi
kʋ maa jeə.
23 Amʋ nan ye nɩ kʋ bá daanɩ
dɩ n na wʋ́ pa tʋʋnɩ ja-nɩ,
sɩ a daarɩ a zʋ curu nɩ
mɛ na yɩ nabiinǝ maama gurim je tɩn.
24 Cɩga tɩn, nɔɔnʋ na wʋ cam wʋnɩ,
kʋ daɩ sɩ ba kɩ-o zʋnnɩ ba wǝli da,
kʋ fɔgɩ kʋ daɩ o na keeri
o lagɩ zǝnǝ nɔɔna tee nɩ.
25 Balʋ na wʋ cam wʋnɩ tɩn,
amʋ ba keeri a pa-ba mʋ na?
Sɩ yinigə tiinə dɩ,
amʋ ba ŋwanɩ a pa-ba mʋ na?
26 Amʋ nan na je a tɩɩna lam
sɩ dɩ ba a baŋa tɩn,
lwarɩm mʋ ləri dɩ yi-nɩ.
A maa na je a tɩɩna wɩ pooni mʋ wʋ́ nyɩ dɩ pa-nɩ tɩn,
lim yɩranɩ mʋ tu dɩ kwəli-nɩ.
27 Amʋ wʋʋ yɔɔrɩ kʋ jujugi mʋ taa.
Dɛ maama wʋnɩ cam yǝni
dɩ cɩ a cwǝŋǝ dɩ cəgi-nɩ.
28 Amʋ yɔɔrɩ a kaagɩ a ve
dɩ wʋ-cɔgɔ mʋ,
yɩ lim kwǝli a cwǝŋǝ kam.
A ta maa zɩgɩ nɔn-kɔgɔ tɩtarɩ nɩ
a keeri a loori zǝnǝ.
29 Amʋ kərə kam nan paɩ a nyɩ dɩ
ga-kakuri dɩ kukwəəru mʋ,
yɩ a mɩ dɩ-tɩ.
30 Amʋ ya-tana kam dɩ laan zwəri mʋ
yɩ ka lɔɔrɩ ka tɩtɩ nɩ.
Ya-bra mʋ jɩgɩ amʋ kwi sɩm ya di.
31 Amʋ laan nan na yǝni a taɩ kɔnɔ,
kʋ yɩ luə le yɩranɩ mʋ a leenə.
A ta na wui wuə,
ka wǝli kərə sɔɔ wʋnɩ ka kɩ da.»