Zobi na tagɩ kʋlʋ o kweeli tɩn
29
Zobi daa ma toŋi o taanɩ dɩm wʋnɩ o wɩ:2 «Faŋa kam yɩ Wɛ dɛɛn nii
amʋ baŋa nɩ tɩn,
da yam kʋntʋ ya na waɩ ya joorə,
kʋʋ́ taa lana.
3 Maŋa kam kʋntʋ nɩ,
Wɛ dɛɛn wʋ a tee nɩ,
pa a na ve lim wʋnɩ dɩ, fʋʋnɩ tǝrǝ,
Wɛ pooni na wʋ a tee nɩ tɩn ŋwaanɩ.
4 A nɔn-dʋnnɩ maŋa kam nɩ mʋ kʋntʋ,
yɩ Wɛ lɔ DƖ wʋʋ DƖ brɩ-nɩ
pa a sɔŋɔ kʋm na yazurə.
5 Maŋa kam kʋntʋ nɩ Dam-fɔrɔ Tu wʋm wʋ amʋ tee nɩ,
yɩ amʋ biə yɔɔrɩ
ba kaagɩ a maama ba pu.
6 Amʋ naanɩ dɛɛn puli pa nayɩla
ba jɩgɩ tɩtʋŋɩ a sɔŋɔ nɩ.
Olivi nugə dɩ maa nuŋi
amʋ karɩ sɩm nɩ
ka duri ka tu ka tu
pweeru tɩm kuri seeni.
7 Amʋ dɛɛn maa na yǝni a vu
sɩ a jǝni tɩʋ kʋm mancwəənu niə nɩ,
yɩ a da a jeeri nakwa jeerim
je sɩm nɩ,
8 nɔn-dʋnnʋ tɩm na nɛ-nɩ,
baá zɩgɩ dáa nɩ mʋ,
yɩ nankwɩn sɩm dɩ zaŋɩ
sɩ zɩgɩ wɛɛnɩ.
9 Pabiə dɩ yəni ba yagɩ kʋlʋ kʋm ba ya na zɩgɩ ba
ŋɔɔnɩ tɩn mʋ, ba daarɩ ba ma ba jɩan ba pu ba niə.
10 Ba dɩdɛɛra bam tɩtɩ dɩ kɩ yirr mʋ
yɩ ba cǝgǝ.
Ba niə maa yǝni ya məəri
pa ba daa warɩ ba ŋɔɔnɩ.
11 Wʋlʋ maama dɛɛn na je
o cəgi a taanɩ tɩn tɛ o wɩ:
a jɩgɩ yu-yoŋo mʋ.
Wʋlʋ yi na nɛ a kikiə tɩn dɩ tɛ nɩ:
a kɩ cɩga.
12 Bɛŋwaanɩ, nabwənə na loori zǝnǝ,
a yǝni a joŋi-ba a yaga.
A maa wǝli bɩtara balʋ
na ba jɩgɩ fara tɩn dɩ.
13 Balʋ na je ba cəgi ba tʋʋnɩ tɩn
dɩ zuli-nɩ,
yɩ kadənə dɩ di ywəəni
amʋ zǝnǝ ŋwaanɩ.
14 Amʋ dɛɛn zɩgɩ a nɔn-ŋʋnnɩ nɩ,
nɩ a jɩgɩ gwar-laa mʋ a zʋʋra tɩn.
Cɩga sarɩya dɩ maa yɩ a yipugə mʋ
a jɩgɩ a pui a yuu.
15 Amʋ dɛɛn mʋ jigi yiǝ a pa lilwǝ,
yɩ a ta yɩ gwaarʋ dɩ nɛ a pa-ba.
16 Amʋ maa yɩ nabwənə ko,
yɩ a daarɩ a joŋi vərə taanɩ
a ŋɔɔnɩ a pa-ba.
17 Kʋ na yɩ lwarɩm-kərə balʋ
na tʋŋɩ nɩ ga-vara te tɩn,
amʋ dɛɛn yǝni a bwəri
ba yələ mʋ,
yɩ a daarɩ a vrɩ balʋ ba na jɩgɩ
ba tʋrɩ ba ni nɩ tɩn a yagɩ.a
18 Amʋ dɛɛn bʋŋɩ a tɩtɩ nɩ a wɩ:
‹Amʋ ŋwɩa da yam wʋ́ taa daga
nɩ kasʋlʋ biə na yɩ te tɩn,
yɩ a daarɩ a tɩ a tɩtɩ tʋʋnɩ
a sɔŋɔ kʋm nɩ.
19 A ŋwɩa kam jɩgɩ dam,
nɩ tiu kʋlʋ bʋnnʋ na kwaarɩ
tɩga nɩ pa na yi-kʋ lanyɩranɩ,
yɩ nyɔnɔ dɩ tʋɩ tɩtɩɩ nɩ kʋ pəni
kʋ nɛ sɩm baŋa nɩ tɩn mʋ.
20 Nɔɔna yǝni ba pa-nɩ zulə mʋ
ba ba yaga,
yɩ a dam dɩm jiri dam-dʋʋrɩ
maŋa maama wʋnɩ.›
21 Nɔɔna dɛɛn yɔɔrɩ ba je cɩmm mʋ ba cǝgǝ,
sɩ ba ni a na wʋ́ pa-ba
kwiə yalʋ tɩn.
22 Amʋ maa na ŋɔɔnɩ a ti,
nɔɔn-nɔɔnʋ daa ba tɛ taanɩ,
a bɩtarbiǝ na tʋ ba zwa nɩ
dɩ ywəəni tɩn ŋwaanɩ.
23 Ba yɔɔrɩ ba je ba tɩɩnɩ a ni-taanɩ
nɩ nɔɔna na tɩɩnɩ dʋa te tɩn mʋ.
Ba maa joŋi a ni-taanɩ
dɩ wʋpolo,
nɩ duum dʋa na jaanɩ wʋpolo
kʋ tui te tɩn.
24 A dɛɛn na yǝni a mwanɩ a jeeri-ba,
kʋ sʋ-ba mʋ.
A na bwǝli a yibiyə dɩ ba tɩn,
kʋ maa paɩ ba naɩ baarɩ.
25 Amʋ dɛɛn mʋ brɩ-ba cwǝŋǝ
sɩ ba taa tɔga,
nɩ a yɩ ba pɛ mʋ te.
Ba maa sɛ a ni, nɩ pɛ wʋlʋ na tʋ
o jar-kərə yigə nɩ tɩn.
A ta maa paɩ ba bɩcara
pəni tɩga nɩ,
nɩ a na weeri balʋ na keeri luə yi-na te tɩn.»