Yi-pʋrʋ cɩga cɩga taanɩ
28
Səbu-poŋo yɩ ba kʋ-tɩ
ba lɩ tɩga kuri nɩ mʋ.
Je maa wʋra ba na ve
ba kwɛ səbu-sɩŋa da
sɩ ka taa yɩ lanyɩranɩ.
2 Luuru dɩ yɩ ba kʋ-tɩ
ba lɩ tɩga kam nɩ mʋ.
Ba maa nyɩɩnɩ canna-sɩŋa
ba lɩ pweeru yɩra nɩ.
3 Nabiinǝ nan lui tɩga kam mʋ
ba zʋʋrɩ kuri kuri,
yɩ ba ze min-zwǝǝnu sɩ ba taa paɩ pooni nyɩ lim wʋnɩ,
sɩ ba beeri jɩjɩgɩrʋ tɩm kʋntʋ lim-nyɔrɩsɩ je nɩ.
4 Ba ve yigə yigə dɩ nabiinǝ
na zʋʋrɩ mɛ tɩn mʋ,
ba lui bɔɔnɩ ba zʋʋrɩ
tɩga kam kuri nɩ.
Ba maa kwe ŋʋnɩ ba dɩ da
ba zuulə yɩ ba tʋŋa.
Vələ na tɔgɩ je sɩm kʋntʋ
ba maa kɛa,
ba yǝri tɩtʋŋa yam kʋntʋ ni nɩ.
5 Kʋ na yɩ tɩga kam baŋa,
wʋdiiru yǝni tɩ kɩ da mʋ.
Ka kuri dɩm seeni nan yɩ
ba kwe mim mʋ
ba ma ba yarɩ kandwa yam.
6 Dáanɩ mʋ baá lɩ Safiiri
kandwa-ŋʋna pweeru tɩm nɩ.
Səbu-sɩŋa kandwa dɩ maa wʋ
ka kasʋlʋ kʋm wʋnɩ.
7 Maarʋ dɩ kawuli yiǝ warɩ ya na
ya yi je sɩlʋ nɔɔna bam kʋntʋ
na ve ba tʋŋɩ da tɩn.
8 Nywəənu dɩ ga-vara tɩtɩ
ba nɔnɩ tɩ nɛ
cwe sɩm kʋntʋ baŋa nɩ.
9 Nabiinǝ maɩ ba jɩa
ba yarɩ kandwa-kamunə,
yɩ ba daarɩ ba guri pweeru
tɩ kugu je nɩ ba dʋlɩ ba yaga.
10 Ba ta waɩ ba lui bɔɔna
ba tɔgɩ pweeru wʋnɩ ba kɛa.
Ba maa nii ba naɩ jɩjɩgɩrʋ tɩga kam kandwa wʋnɩ sɩ ba lɩ-tɩ.
11 Ba ta pɛ sɩ na balʋ na soe tɩn zɩgɩ mʋ.
Ba maa jaanɩ wǝǝnu tɩlʋ
ya na səgi tɩn
ba pa tɩ nuŋi pooni.
12 Kʋ nan na yɩ swan cɩga cɩga,
yən nɩ mʋ dɩ́ wʋ́ vu
sɩ dɩ́ na-ya?
Yən mʋ dɩ́ wʋ́ vu
sɩ dɩ́ beeri yi-pʋrʋ jǝgǝ?
13 Nabiinǝ nan warɩ
sɩ ba lwarɩ kʋ kuri ba ti.
Ba maa bá na-kʋ lʋgʋ baŋa nɩ
mɛ nɔɔna na ŋwɩ tɩn.
14 Dʋ-fara tɩlʋ na wʋ tɩga kuri nɩ tɩn wɩ:
«Á bá na-kʋ yo seeni.»
Nɩnɩʋ kʋm dɩ maa tɛ kʋ wɩ:
«Kʋ tǝri amʋ tee nɩ.»
15 Nabiinǝ bá wanɩ ba ga səbu-sɩŋa
ba ma ba yəgi-kʋ,
naa ba kwe səbu-poŋo
ba ma ba ləni-kʋ.
16 Kʋ na maŋɩ kʋ yɩ səbu-sɩŋa kalʋ
na lana yɩ ka nuŋi Ofiiri tɩn,
naa kandwa-ŋʋna dwi dwi,
n bá n wanɩ n kwe-tɩ
n maŋɩ dɩ yi-pʋrʋ.
17 Səbu-sɩŋa dɩ vɛɛrɩ
dɩ wʋ yi-kʋ.
N ta bá n wanɩ n kwe səbu-sɩŋa zʋŋa n ma n ləni-kʋ.
18 Kʋ maa na yɩ Koralɩ kandwa-ŋʋna,
naa kandwa-ŋʋna dwi maama,
tɩ duuni bá maŋɩ dɩ yi-pʋrʋ
na yɩ te tɩn.
19 Topazɩ kandwa-ŋʋna tɩlʋ
na nuŋi Kusi tɩn
bá wanɩ ya maŋɩ dɩ-kʋ.
Səbu-sɩŋa na maŋɩ ka lana te,
n bá wanɩ n kwe-ka
n ma n lǝni yi-pʋrʋ.
 
20 Swan cɩga cɩga kuri nan puli
yən mʋ?
Yən mʋ dɩ́ wʋ́ vu
sɩ dɩ́ beeri yi-pʋrʋ jǝgǝ?
21 Kʋ səgi nabiinǝ dɩ vara dwi maama yibiyə nɩ mʋ,
dɩ zunə balʋ na kaagɩ ba jaanɩ wɛyuu nɩ tɩn dɩ yibiyə nɩ.
22 Curu dɩ tʋʋnɩ dɩ yǝni ba tɛ nɩ:
«Yi-pʋrʋ sɩswɩa yɩranɩ mʋ
tɩn dɩ́ zwa nɩ.»a
23 Wɛ yɩranɩ nan mʋ ye
cwǝŋǝ kalʋ na yi-kʋ tɩn.
Dɩntʋ mʋ ye kʋ kuri
na nuŋi mɛ tɩn.
24 Bɛŋwaanɩ DƖ nii DƖ naɩ tɩga baŋa
niə yam maama mʋ.
DƖ maa maanɩ kʋlʋ maama
na kɩ lʋgʋ baŋa nɩ tɩn.
25 Wɛ dɛɛn pɛ viu kʋm dam
sɩ kʋ taa dʋla,
yɩ DƖ fɔgɩ DƖ maŋɩ dʋa na bam
sɩ DƖ nii ba na wʋ́ taa yɩ te tɩn.
26 DƖ ma lɩ ni o pa dʋa kam
sɩ ka taa sɛ ka nɩ,
yɩ DƖ daarɩ DƖ lɔ cwǝŋǝ DƖ tiŋi
sɩ dʋ-baga taa tɔgɩ da
yɩ ka baga.
27 Maŋa kam kʋntʋ nɩ mʋ DƖ nii DƖ na
yi-pʋrʋ na yɩ te tɩn,
yɩ DƖ maanɩ nɩ kʋ tiini
kʋ jɩgɩ kuri lanyɩranɩ.
28 Wɛ laan ma ta dɩ nabiinǝ DƖ wɩ:
«Nii-na! Nɔɔnʋ wʋlʋ na kwarɩ Baŋa-Wɛ,
kʋ tu sɩɩnɩ o yɩ swan tu mʋ.
Wʋlʋ maa na cɩ o tɩtɩ dɩ lwarɩm tɩn
mʋ brɩ nɩ o yi pʋʋrɩ.»b