27
Zobi ta ma tʋlɩ o taanɩ dɩm o wɩ:
2 «Amʋ dugi Ŋwɩa Tu Wɛ dɩm yɩrɩ ŋwaanɩ wɩ:
a bá sɛ vwan kɔtaa.
Dam-fɔrɔ Tu Wɛ dɩm nan vɩn
sɩ DƖ bʋrɩ cɩga mʋ DƖ pa-nɩ.
DƖ ma pa a yɩra laan mʋ gɛa a tɩtɩ.
3 Amʋ ta na loori a ŋwɩ:
yɩ a sin Wɛ viu tɩn,
4 amʋ bá sɛ sɩ bɩtar-yɔɔrʋ
tɔgɩ a ni ya nuŋi,
naa sɩ a ma a ni a fɔ vwan.
5 Amʋ bá fɔgɩ a sɛ nɩ abam mʋ tɛ cɩga amʋ baŋa nɩ.
Kʋ na maŋɩ sɩ a tɩ mʋ dɩ,
amʋ ta wʋ́ taa zɩgɩ dɩ a cɩga mʋ.
6 Amʋ ta wʋ́ taa brɩ nɩ
a jɩgɩ bʋra mʋ yɩ a bá yagɩ.
A ŋwɩa maama wʋnɩ,
a wʋbʋŋa tɛ ya brɩ-nɩ nɩ
a jɩgɩ cɩga mʋ.
7 Wɛ wʋ́ pa a dʋna ji
nɩ nɔn-balwaarʋ na yɩ te tɩn,
sɩ balʋ na dwəni dɩ amʋ tɩn
dɩ yaarɩ nɩ lwarɩm-kərə mʋ te.
8 Nɔn-balwaarʋ bam kʋntʋ tɩɩna
nan wʋ́ ti mʋ
ba ŋwɩa kweelim maŋa nɩ,
Wɛ na lagɩ DƖ lɩ ba mʋmwa
sɩ ba tɩ tɩn ŋwaanɩ.
9 Ba lɛɛrʋ maŋa kam kʋntʋ nɩ,
Wɛ daa wʋ́ cəgi ba kərə na?
10 Bantʋ yǝni ba di ywəəni Dam-fɔrɔ Tu Wɛ dɩm ŋwaanɩ na?
Ba keeri ba loori-DƖ maŋa dɩ maŋa mʋ na?
11 Amʋ wʋ́ maŋɩ Dam-fɔrɔ Tu Wɛ dɩm
na tʋŋɩ te tɩn a brɩ abam.
A nan bá səgi DƖ wʋbʋŋa yam
á yigə nɩ.
12 Nii-na! Abam tɩtɩ nan maŋɩ
á na wǝǝnu tɩntʋ.
Bɛɛ mʋ kɩa yɩ á daa jɩgɩ bɩtar-yɔɔrʋ á ŋɔɔna?
13 A lagɩ a brɩ abam Dam-fɔrɔ Tu
Wɛ dɩm na jɩgɩ wʋbʋŋa
sɩ DƖ kɩ nɔn-balwaarʋ te tɩn.
Wʋ-lʋn-nyɩna na wʋ́ guri te tɩn
mʋ tɩntʋ.
14 Ba biə kɔgɔ na maŋɩ
kʋ daga te maama dɩ,
ba maama wʋ́ tɩ najara wʋnɩ mʋ.
Ba kwaga kam dɩ nan bá taa naɩ wʋdiiru ba di ba sui.
15 Ba biə balʋ ta na daarɩ,
yawɩɩrʋ mʋ wʋ́ gʋ-ba,
yɩ ba kadənə bá keeri ba lwi.
16 Nɔn-balwaarʋ waɩ ba laɩ
səbu-poŋo wǝǝnu,
pa tɩ daga nɩ tɩga kasʋlʋ te tɩn.
Ba ta waɩ ba kwalɩmɩ
gwaarʋ zanzan ba tiŋə.
17 Nɔn-ŋʋna nan mʋ wʋ́ kwe
ba gwaarʋ tɩm ba zʋ,
yɩ ba daarɩ ba pɔɔrɩ ba səbu-poŋo
wǝǝnu tɩm ba pa daanɩ.
18 Ba na yǝni ba lɔ sam dɩlʋ tɩn
nyɩ dɩ kunkwiu na lɔgɩ tɩte tɩn mʋ.
Dɩ bá daanɩ nɩ vwə yalʋ
yɩrɩna na cwi tɩn mʋ.
19 Lwarɩm-kəru kʋntʋ doŋ
wʋ́ wanɩ o pəni sɩ o dɔ.
O maa yɩ nadum
yɩ o jɩjɩgɩrʋ tɩm daga.
O nan daa bá taa yɩ kʋntʋ.
O na wʋ́ puri o yiǝ maŋa kalʋ nɩ tɩn,
dɩ o jɩjɩgɩrʋ tɩm ti tɩ daarɩ‑o.
20 Cam wʋ́ ba o baŋa,
nɩ na-fara na wuuri ba kɛ te tɩn mʋ.
Vu-fɔrɔ dɩ maa wʋ́ ba tɩtɩɩ nɩ
kʋ caal‑o kʋ ja je.
21 Viu mʋ wʋ́ nuŋi wa-puli seeni
kʋ ba kʋ kal‑o kʋ ja kʋ kɛ,
pa o daa tǝri o ya na wʋ mɛ tɩn.
22 Viu kʋm nan wʋ́ taa tiini
kʋ mag-o kʋ ba yaga,
nɩ o na maŋɩ o kwaanɩ
o duri te maama sɩ o lu dɩ!
23 Ba magɩ japoorə mʋ o tʋm dɩm ŋwaanɩ,
ba zɩgɩ jəgə kalʋ o ya na zʋʋrɩ tɩn nɩ mʋ,
ba foolə o yaara yam ŋwaanɩ.