Zobi ni-taanɩ
26
Zobi ma ləri Bilidadɩ o wɩ:2 «Nmʋ bʋŋɩ nɩ n zǝni
balʋ vwana na parɩ tɩn mʋ na?
N ma n pa balʋ na bwǝnǝ tɩn
dam joori na?
3 Nii kwiə yalʋ dwi n na kwe
n pa wʋlʋ swan na muri tɩn!
N sɩɩnɩ n brɩ nɩ
n yi pʋʋrɩ lanyɩranɩ!
4 Wɔɔ zǝnǝ mʋ pɛ n ta
n ni-bɩtarɩ sɩntʋ maama?
Wɔɔ wʋbʋŋa mʋ n tɔgɩ ya ŋwaanɩ
n ŋɔɔnɩ kʋntʋ?
5 Cirǝ tigi curu nɩ mʋ
yɩ ba yɩra saɩ.
Ba maa wʋ na-fara bam kuri nɩ
yɩ fʋʋnɩ jɩgɩ-ba.
6 Curu tɩtɩ tigi bwəri mʋ Wɛ yigə nɩ.
Cɔgɩm je sɩm kʋntʋ
maa wʋ səgi DƖ yiǝ nɩ.
7 Wɛ lwarɩ wɛyuu kʋlʋ na jeeri baŋa seeni tɩn DƖ kɩ kʋ jǝgǝ nɩ,
yɩ kʋ wʋ daŋɩ kʋlʋkʋlʋ baŋa nɩ.
DƖ ta ma kwe lʋgʋ baŋa DƖ palɩ da,
yɩ kʋ wʋ cəli kʋlʋkʋlʋ yɩra nɩ.
8 Wɛ nan ta lagɩ dʋa na bam maama mʋ
DƖ vɔ DƖ kɩ kunkwǝǝnu tɩm wʋnɩ.
Dɩ kʋ dɩ, tɩ ba piə
sɩ tɩ na bam taa nuŋǝ.
9 DƖ ta maa yǝni DƖ pa kunkoŋo
li cana kam na pɩɩrɩ tɩn.
10 Nɩnɩʋ kʋm baŋa nɩ mʋ
DƖ lɔ sisəm DƖ kaagɩ-kʋ,
sɩ kʋ pɔɔrɩ pooni dɩ lim daanɩ.
11 Wɛ na bagɩ DƖ kwǝrǝ,
ywə yalʋ na təli wɛyuu kʋm tɩn
yǝni ya sisiŋi mʋ,
kʋ na sɔɔrɩ ya yɩra tɩn ŋwaanɩ.
12 DƖ mɛ DƖ dam dɩm mʋ DƖ
wanɩ nɩnɩʋ kʋm DƖ ja.
DƖ ta ma tɔgɩ DƖ yi-pʋrʋ kʋm baŋa nɩ
DƖ magɩ nɩnɩʋ wʋʋ juru Rahabɩ
DƖ cɩcʋgɩ.
13 DƖ na sin DƖ mʋmwa viu tɩn,
tɩga yibiyə pɩɩrɩ mʋ.
DƖ jɩŋa ta ma zɔ nɩnɩʋ wʋʋ
bɩsankwe-kɩnkagelɩ dɩm
na duri sɩ ka lu tɩn ka gʋ.
14 Wɛ kikiə yam kʋntʋ nan brɩ
DƖ dam cicoro yɩranɩ mʋ.
Kʋ brɩ nɩ DƖ waasɩ tɩga-tɩga
sɩ dɩ́ wanɩ dɩ́ ni kʋ kuri.
Sɩ DƖ laan na bagɩ dɩ kwǝr-dɩa,
DƖ dam dɩm wʋ́ kɛ jɩŋa mʋ.»