Zobi ta ma ta o wɩ:
24
«Bɛŋwaanɩ mʋ Dam-fɔrɔ Tu Wɛ dɩm wʋ kwe maŋa DƖ tiŋisɩ DƖ ma DƖ di nɔn-balwaarʋ taanɩ?
Bɛɛ mʋ kɩ yɩ balʋ na sɛ‑DƖ tɩn
beeri DƖ sarɩya da yam ba ga?
2 Nɔɔna soe sɩ ba taa di ba zʋʋrɩ
ba donnǝ sisənə wʋ,
yɩ ba daarɩ ba vrɩ ba donnǝ vara ba jɩgɩ ba kɔna.
3 Ba ta vrɩ bɩtara bɩnɛ mʋ
ba kalɩ ba ja viiri,
yɩ ba daarɩ ba joŋi kadənə nabɛ jɩna ŋwaanɩ.
4 Ba yǝni ba yigi nabwənə mʋ
sɩ ba ywəri cwǝŋǝ nɩ,
yɩ ba fɩn yinigə tiinə maama
pa ba duri ba səgə.
5 Yinigə tiinə wʋ́ taa kaagɩ kagʋa yuu nɩ ba beeri wʋdiu,
sɩ ba dɩ ba biə taa di,
nɩnɛɛnɩ kagʋa wʋʋ bɩnɛ
dɩ na kɩ te tɩn.
6 Ba laan maa wʋ́ taa ve pwəli wʋnɩ
sɩ ba zagɩ sɩ wʋdiiru tɩm.
Ba ta maa ve nɔn-balwaarʋ karɩ nɩ
ba larɩ mɩna.
7 Tɩtɩɩ nɩ ba ta tigi waarʋ yigə nɩ mʋ bwəri,
ba na ba jɩgɩ woŋo sɩ ba ma kwǝli ba tɩtɩ tɩn ŋwaanɩ.
8 Baá taa kaagɩ pweeru tɩm
gugwəəru nɩ mʋ ba səgə,
yɩ dʋ-fara magɩ-ba, ba na ba jɩgɩ dalɩm je tɩn ŋwaanɩ.
9 Nɔɔna na jɩnɩ səbu ba pa yinigə tiinə,
ba laan wʋ́ vrɩ ba biə mʋ
jɩnɩ dɩm ŋwaanɩ,
kʋ na maŋɩ kʋ yɩ kadəm bu dɩ.
10 Yinigə tiinə kaagɩ ba ve bwəri mʋ,
kʋlʋkʋlʋ tǝri ba yɩra nɩ.
Ba maa tʋŋɩ karɩ wʋnɩ
yɩ kana yagɩ ka jɩgɩ-ba.
11 Ba yǝni ba kanɩ Olivi tiu biə
sɩ nugə nuŋi,
yɩ ba daarɩ ba ŋʋkɩ vinyə tiu biə
sɩ dɩvɛn taa nuŋǝ.
Dɩ kʋ dɩ, na-nyɔm ta jɩgɩ-ba mʋ.
12 Nɔɔna zanzan mʋ tigi tɩʋ kʋm pwəli nɩ,
yɩ ba ŋʋʋsa dɩ cam,
ba na nɛ zʋnnɩ yɩ ba lagɩ ba tɩ tɩn ŋwaanɩ.
Dɩ kʋ maama dɩ,
Wɛ ba bwɛ lwarɩm-kərə bam.
13 Nɔɔna badonnǝ yɔɔrɩ ba culi pooni dɩm mʋ.
Ba maa vaɩ sɩ ba taa tɔgɩ
dɩ cwe sɩm.
14 Wɛ dɩm na yǝni dɩ zwəri dɩ ti,
nɔn-gʋra jɩgɩ yinigə tiinə
dɩ nabwənə mʋ ba gʋɩ.
Badaara maa kaagɩ ba ŋɔnɩ
nɔɔna wǝǝnu tɩtɩɩ nɩ.
15 Baara badonnǝ maa je
ba cǝgǝ sɩ tɩga yi,
sɩ ba beeri nɔɔnʋ wʋdoŋ kaanɩ ba pəni dɩd-o.
Bɛŋwaanɩ ba bʋŋɩ nɩ tɩtɩɩ nɩ mʋ
nɔɔn-nɔɔnʋ bá na-ba,
ba na səgi ba yibiyə tɩn ŋwaanɩ.
16 Tɩtɩɩ nɩ mʋ vɩnvɩrna zʋʋrɩ
nɔɔna sam wʋnɩ ba vrɩ-ba.
Sɩ kʋ na yɩ wɩa nɩ,
ba pɩ ba ni mʋ digə nɩ,
ba na vaɩ pooni dɩm tɩn ŋwaanɩ.
17 Bantʋ maama soe lim-nyɔrɩsɩ maŋa mʋ
ba dwe pooni dɩm,
Ba nan mɩ dɩ lɛɛrʋ tɩlʋ na yǝni tɩ tɔgɩ dɩ lim-nyɔrɩsɩ tɩ tui tɩn mʋ.
18 Abam nan tɛ wɩ:
Nɔn-balwaarʋ tɩm nan ba daana,
dɩ na-fara na kalɩ-ba ba ja ba je.
Kʋ na yɩ tɩga kalʋ
ba na jɩgɩ ba varɩ tɩn,
Wɛ sɔɔlɩ lwarɩm mʋ DƖ yagɩ
ka baŋa nɩ.
Nɔɔn-nɔɔnʋ ba ve o tʋŋɩ
ba karɩ sɩm nɩ.
19 Nɩ tɩga kam fʋnyʋgʋ na paɩ nyɔnɔ wɩ te tɩn,
kʋntʋ mʋ tʋʋnɩ dɩ yǝni dɩ li
lwarɩm-kərə dwi maama.
20 Kaana balʋ na lʋgɩ-ba tɩn tɩtɩ
dɩ yǝni ba swe ba ni nɩ mʋ.
Tʋ́a mʋ mu-ba tɩga kuri nɩ,
yɩ nɔɔn-nɔɔnʋ daa ba guli ba gulə.
Kʋntʋ tɩn, nɔn-balwaarʋ naɩ ba cɔgɩm,
nɩ tweeru tɩlʋ ba na goni
ba dɩ tɩga nɩ tɩn mʋ.
21 Nɔn-balwaarʋ tɩm kʋntʋ
kɩ ba cɔgɩ kadənə yigə.
Ba ba fɔgɩ ba duri ba ŋwaŋa kɔtaa!
22 Wɛ nan mʋ maɩ DƖ dam
DƖ jaanɩ dɩdɛɛra.
DƖ na zaŋɩ ba baŋa nɩ,
ba ŋwɩa daa daɩ kʋlʋkʋlʋ.
23 Wɛ waɩ DƖ yagɩ-ba
pa ba je dɩ wʋ-zuru.
DƖ yi nan pagɩ ba baŋa nɩ mʋ
yɩ DƖ yɩrɩ ba kikiə maama.
24 Baá taa diini baŋa
maŋa fɩɩn wʋnɩ mʋ,
yɩ ba da ba je bɩdwɩ baŋa nɩ!
Ba laan maa wʋ́ tʋ tɩga nɩ,
nɩ vɔɔrʋ tɩlʋ na siiri tɩn,
naa ba na zagɩ wʋdiu kʋlʋ ba dɩ tɩga nɩ yɩ kʋ kwaarɩ tɩn mʋ.
25 Amʋ nan na tagɩ kʋlʋ maama tɩn
na daɩ cɩga,
wɔɔ mʋ waɩ o brɩ nɩ
a yɩ vwa-fɔrʋ?
Á bʋŋɩ nɩ a ni-taanɩ yɩ kafɛ mʋ na?»