Zobi ni-taanɩ
23
Zobi ma ləri o wɩ:2 «Zɩm tɩntʋ tɩn,
a yɔɔrɩ a pʋʋnɩ zanzan mʋ,
a banɩ na wɔɛ tɩn ŋwaanɩ.
Wɛ tiini o pa kʋ zʋ a yɩra,
dɩ a na suuri te maama tɩn.
3 Amʋ ya na ye mɛ a na wʋ́ vu
sɩ a na‑DƖ,
a yaá vu DƖ na zʋʋrɩ mɛ seeni tɩn,
4 sɩ a tʋlɩ a taanɩ dɩm a brɩ-DƖ,
sɩ DƖ lwarɩ kʋ na sɩɩnɩ kʋ kɩ amʋ te tɩn.
5 A laan maa wʋ́ lwarɩ DƖ na jɩgɩ kʋlʋ
sɩ DƖ ləri DƖ pa-nɩ tɩn,
yɩ a ni DƖ ni-taanɩ dɩm kuri.
6 Amʋ ya na zɩgɩ Wɛ yigə nɩ,
DƖ yaá kwe DƖ dam-fɔrɔ kʋm
DƖ ma DƖ magɩ ni-kantɔgɔ dɩ amʋ na?
Kɔtaa! DƖ nan wʋ́ cəgi kʋlʋ
a na jɩgɩ sɩ a ta dɩ DƖ tɩn mʋ.
7 Dáanɩ mʋ wʋlʋ na jɩgɩ cɩga tɩn
wʋ́ na cwǝŋǝ
sɩ o tʋlɩ o taanɩ o brɩ Wɛ.
Kʋntʋ tɩn, Wɛ laan wʋ́ bʋrɩ DƖ pa-nɩ,
sɩ a taa te a tɩtɩ maŋa maama.
8 Nii-na! Amʋ na ve wa-puli seeni
sɩ a beeri‑DƖ, a bá na‑DƖ da.
A maa na kɛ wa-zʋʋrɩ seeni dɩ,
DƖ tǝrǝ dáanɩ.
9 O ta na ve jagwiə seeni naa jazɩm seeni sɩ DƖ taa tʋŋa,
amʋ ba na‑DƖ dáanɩ dɩ.
10 Dɩntʋ nan ye amʋ na-vəli maama.
DƖ wʋra DƖ makɩ-nɩ mʋ DƖ niə,
yɩ DƖ na kɩ kʋntʋ DƖ ti,
amʋ wʋ́ taa yɩ lanyɩranɩ mʋ
nɩ səbu-sɩŋa doŋ tɩn.
11 Amʋ dɩ nan tɔgɩ DƖ na-bwərə kam lanyɩranɩ mʋ.
A maa wʋ ywəri DƖ cwǝŋǝ kam wʋnɩ.
12 A yǝni a kɩ a tɔgɩ DƖ niə yam
na brɩ te tɩn mʋ.
A maa kɩ DƖ ni-bɩtarɩ sɩm
a wʋbʋŋa nɩ,
nɩ sɩ yɩ a ni-wʋdiu mʋ te.
13 Wɛ nan yɩ DƖ yɩra mʋ,
yɩ nɔɔn-nɔɔnʋ warɩ DƖ yigə
sɩ o cɩ.
DƖ kɩ kʋlʋ maama DƖ wʋbʋŋa
na lagɩ tɩn mʋ.
14 DƖ wʋ́ kɩ kʋlʋ maama DƖ na bʋŋɩ DƖ ja
sɩ DƖ kɩ dɩ amʋ tɩn mʋ DƖ ti.
Wǝǝnu zanzan daa ta daarɩ
sɩ DƖ kɩ amʋ baŋa nɩ,
nɩ DƖ wʋbʋŋa yam na yɩ te tɩn.
15 Kʋntʋ nan mʋ paɩ a tiini
a fʋna DƖ yigə nɩ.
A na bʋŋɩ wʋbʋŋa DƖ seeni,
fʋʋnɩ wʋ́ ja-nɩ mʋ.
16 Dam-fɔrɔ Tu Wɛ dɩm pɛ sɩ
amʋ baarɩ mʋ ti,
DƖ na jɩgɩ-nɩ DƖ fugə tɩn ŋwaanɩ.
17 Amʋ nan na je lim-nyɔrɩsɩ wʋnɩ
yɩ lim kwǝli a yibiyə maama tɩn,
a ta bá maŋɩ da cɩmm.»