Elifaazɩ ni-taanɩ
22
Teman tu Elifaazɩ daa ta ma ta o wɩ:2 «Nabiinu jɩgɩ bɛ nyɔɔrɩ mʋ o paɩ Wɛ,
o na maŋɩ o yɩ swan tu
te maama dɩ?
3 Nmʋ na yɔɔrɩ n yɩ cɩga tu,
Dam-fɔrɔ Tu wʋm yigə
wʋ́ taa wʋ n wʋnɩ mʋ na?
Tusim na tǝrǝ n ŋwɩa maama wʋnɩ,
Wɛ wʋ́ na nyɔɔrɩ n baŋa nɩ na?
4 Wɛ na bwɛ nmʋ te tɩn,
kʋ yɩ n na kwarɩ-DƖ tɩn ŋwaanɩ mʋ na?
Kʋntʋ ŋwaanɩ mʋ DƖ lagɩ
DƖ di n taanɩ na?
5 Kʋ nan daɩ kʋntʋ!
Cɩga tɩn, n balɔrɔ kəm tiini
dɩ daga,
yɩ n lwarɩm dɩ gaalɩ.
6 Nmʋ fɩn n cʋrrʋ sɩ ba tiŋi daarɩ
n jɩnɩ ŋwaanɩ,
yɩ n vrɩ ba gwaarʋ kafɛ ŋwaanɩ
n daarɩ-ba pa ba zɩgɩ bwəri.
7 Kʋ ta na yɩ balʋ na-nyɔm na jɩgɩ-ba tɩn,
n vɩn sɩ n pa-ba na sɩ ba nyɔ.
N ma n vanɩ balʋ kana na jɩgɩ-ba tɩn wʋdiu.
8 Nmʋ ya sɩɩnɩ n yɩ dɩdɛɛrʋ
yɩ n te tɩga.
N ma n zʋʋrɩ ka baŋa nɩ
yɩ nɔɔna nɩgɩ‑m.
9 Dɩ kʋ dɩ, n vɩn sɩ n wǝli kadənə,
yɩ n pa ba viiri dɩ jɩ-kʋrɩ.
N ma n bɛɛsɩ bɩtara n wǝli da.
10 Kʋntʋ nan mʋ te paɩ n cam ba fɔgɩ dɩ tiə,
yɩ fʋʋnɩ da dɩ ja‑m.
11 Kʋ ma pa lim kwǝli‑m
pa n ba naɩ cwǝŋǝ.
Na-fara dɩ maa yǝni kʋ ba
kʋ li n je sɩm.
12 Wɛ sɩɩnɩ DƖ wʋ wɛyuu nɩ mʋ
baŋa baŋa.
Ta fɔgɩ n nii calɩcwɩ sɩm
na wʋ wɛɛnɩ te maama tɩn.
13 Nmʋ nan tɛ n wɩ:
‹Wɛ wʋ́ wanɩ DƖ lwarɩ kʋlʋ
na jɩgɩ kʋ tʋŋɩ tɩn na?a
DƖ wʋ́ kɩ tɩta mʋ DƖ di dɩbam taanɩ,
lim-nyɔrɩsɩ na kwǝli‑DƖ tɩn ŋwaanɩ?
14 Kunkwən-luluru kwǝli‑DƖ mʋ
pa DƖ ba naɩ dɩbam.
DƖ ta maa kaagɩ wɛyuu sisənə yam nɩ DƖ veǝ.›
15 Nmʋ nan bá yagɩ faŋa faŋa cwe sɩm tɔgɩm,
nɩ lwarɩm-kərə na maŋɩ ba kɩ te tɩn na?
16 Bantʋ tɩgɩ mʋ yɩ ba dɛ wʋ yi.
Na-fara mʋ tu kʋ coori-ba
kʋ ja je,
pa ba daa ba jɩgɩ zɩga je.
17 Ba dɛɛn vɩn Wɛ mʋ yɩ ba wɩ:
‹Yagɩ dɩ́ yɩra cɩmm!
Dam-fɔrɔ Tu wʋm wʋ́ wanɩ dɩbam
o kɩ bɛɛ mʋ?›
18 Kʋ dɛɛn nan yɩ Wɛ mʋ pɛ-ba wo-laarʋ,
yɩ tɩ su ba sam dɩm maama.
Amʋ nan bá sɛ sɩ a tɔgɩ nɔn-balwaarʋ tɩm kʋntʋ kwiə.
19 Nɔn-ŋʋna wʋ́ na nɔn-balwaarʋ cɔgɩm,
sɩ ba taa caka dɩ wʋpolo.
Balʋ na jɩgɩ cɩga tɩn
wʋ́ taa mwanɩ-ba yɩ ba wɩ:
20 ‹Dɩ́ dʋna bam je,
yɩ mim zwɛ ba jɩjɩgɩrʋ
tɩlʋ na daarɩ tɩn maama.›
21 Kʋntʋ ŋwaanɩ, sɛ n pa Wɛ
sɩ kʋ pa n bɩcarɩ zuri.
Kʋntʋ baŋa nɩ mʋ
n wǝǝnu maama wʋ́ yɔɔrɩ cwǝŋǝ
tɩ pa‑m.
22 Sɛ sɩ n joŋi Wɛ zaasɩm dɩm,
sɩ n daarɩ n kwe DƖ ni-taanɩ dɩm
n kɩ n bɩcarɩ nɩ.
23 Nmʋ na pipiri n joori
Dam-fɔrɔ Tu wʋm tee nɩ mʋ,
nmʋ wʋ́ na n tɩtɩ.
N nan maŋɩ sɩ n lɩ kǝm-balwaarʋ maama n sɔŋɔ nɩ,
24 sɩ n daarɩ n kwe n səbu-sɩŋa
n dʋlɩ n yagɩ tɩga nɩ.
Ka na maŋɩ ka lana
yɩ ka nuŋi Ofiiri dɩ,
kwe-ka n yagɩ bugə kandwa
tɩtarɩ nɩ.
25 Dam-fɔrɔ Tu wʋm tɩtɩ laan mʋ
wʋ́ ləri o ji n səbu-sɩŋa,
dɩ n səbu-poŋo kʋlʋ na sɩɩnɩ
kʋ yɩ lanyɩranɩ tɩn.
26 Nmʋ na kɩ kʋntʋ,
n laan wʋ́ di ywəəni
Dam-fɔrɔ Tu Wɛ dɩm ŋwaanɩ,
yɩ n yuu zǝŋi wɛɛnɩ DƖ yigə nɩ.
27 Nmʋ na loori kʋlʋ maama DƖ tee nɩ,
DƖ wʋ́ cəgi n loro kʋm.
N ta wʋ́ kɩ n su n na goni ni
sɩ n kɩ kʋlʋ maama n pa‑DƖ tɩn.
28 Nmʋ ma n na bʋŋɩ n ja sɩ kʋlʋ kɩ,
kʋ je da mʋ.
Pooni wʋ́ taa tigi n yigə nɩ
sɩ n ta n waɩ n tɔgɩ cwǝŋǝ.
29 Nɔɔna na tʋ tɩga nɩ, yɩ n na tagɩ nɩ:
‹Pa ba zaŋɩ wɛɛnɩ›,
Wɛ wʋ́ sɩɩnɩ DƖ zǝŋi balʋ
na tu ba tɩtɩ tɩn wɛɛnɩ.
30 Kʋ na maŋɩ kʋ yɩ wʋlʋ
na ba jɩgɩ bʋra tɩn,
Wɛ wʋ́ joŋ-o DƖ yagɩ,
nmʋ jɩn sɩm na tʋŋɩ dɩ cɩga tɩn ŋwaanɩ.»