Zobi ni-taanɩ
21
Zobi ma ləri o wɩ:2 «Fɔgɩ á cəgi-na taanɩ dɩlʋ a na maŋɩ sɩ a ta tɩn,
sɩ kʋ pa amʋ bɩcarɩ zuri.
3 Zuri-na á yɩra sɩ á cəgi a taanɩ dɩm.
Kʋ kwaga seeni, á laan waɩ
á daa taá jɩgɩ-nɩ á mwana.
4 Amʋ dɩ nabiinǝ mʋ jɩgɩ
ni-kantɔgɔ daanɩ na?
A na warɩ a tɩtɩ sɩ a ja tɩn,
kʋ daɩ kʋ cwǝŋǝ nɩ na?
5 Yɔɔrɩ á nii-na amʋ,
sɩ á daarɩ á ja á niə,
sɩ á daarɩ á kwe á jɩan á ma á pu á niə.
6 Amʋ na bʋŋɩ kʋlʋ na yi-nɩ tɩn wʋbʋŋa,
a nagwələ wʋ́ tɩ mʋ.
A yɩra maa saɩ pɔm-pɔm dɩ fʋʋnɩ.
7 Bɛɛ mʋ te pa nɔn-balwaarʋ taa ŋwɩ
ba daana tɩga baŋa nɩ,
yɩ ba fɔgɩ ba naɩ dam
pa dɩ puli dɩ pa-ba?
8 Ba je mʋ yɩ ba naɩ ba biə nɔn-kəri,
pa ba dwi dɩm puli dɩ pa-ba.
9 Kʋlʋkʋlʋ ba yaarɩ-ba ba sam wʋnɩ.
Wɛ banɩ dɩ nan ba zaŋɩ dɩ ba
sɩ DƖ waarɩ-ba.
10 Ba naanɩ tɩtɩ dɩ puli zanzan mʋ
dɩ pa-ba,
yɩ dɩ dɩdʋa dɩ bá caarɩ
kʋ pugə kʋ yagɩ.
11 Ba maa paɩ ba biə kaagɩ ba kwɛɛrɩ mʋ
nɩ pe-kɔgɔ doŋ te tɩn.
Ba bu-balwa bam saɩ mʋ
yɩ kʋlʋkʋlʋ ba yaarɩ-ba.
12 Ba maa jɩgɩ sɩnyɛ dɩ kwaanʋ
ba leeni le.
Ba ta wui wi mʋ ba kɩ sɔɔ
ba ma di ywəəni.
13 Pusɩŋ-nyɩna bam ŋwɩa maama wʋnɩ,
ba yɔɔrɩ ba jɩgɩ wo-laarʋ mʋ ba di,
yɩ ba laan ba ba tɩ ba tɩtɩ tʋʋnɩ.
14 Dɩ kʋ dɩ, ba ta tɛ dɩ Wɛ mʋ ba wɩ:
‹Yagɩ dɩ́ yɩra!
Dɩ́ yigə tǝrǝ dɩ n kwiə yam.
15 Dam-fɔrɔ Tu wʋm yɩ wɔɔ mʋ
pa kʋ maŋɩ sɩ dɩ́ taa zul‑o?
Dɩ́ na ve o te dɩ́ war‑o,
bɛ nyɔɔrɩ mʋ dɩ́ wʋ́ na?›
16 Kʋ nan daɩ ba tɩtɩ tɩtʋŋa
baŋa nɩ mʋ
ba wǝǝnu ve yigə tɩ pa-ba.
Amʋ nan bá sɛ sɩ a tɔgɩ nɔn-balwaarʋ tɩm kʋntʋ kwiə yam.
17 Nɔn-balwaarʋ tɩm ŋwɩa pooni nan yǝni dɩ dwe
dɩ pa-ba mʋ na?
Ba yǝni ba zʋ lɛɛrʋ wʋnɩ na?
Wɛ yǝni DƖ tɔgɩ DƖ ban-lʋm dɩm ŋwaanɩ
DƖ pa kʋ ni-ba mʋ na?
18 Kʋ yǝni kʋ kɩ-ba nɩ ga-kʋrrʋ
naa swannʋ tɩlʋ viu na kalɩ
kʋ jɩgɩ kʋ maa jeə te tɩn mʋ na?
19 Abam tɛ nɩ:
‹Wɛ wʋ́ pa lwarɩm-kəru biə
ŋwɩ ba ko lwarɩm jɩnɩ.›
Kʋ ya maŋɩ sɩ Wɛ yɔɔrɩ DƖ waarɩ
lwarɩm-kəru tɩtɩ mʋ
sɩ o lwarɩ kʋ ni nɩ.
20 Kʋ nan maŋɩ sɩ kʋ tu tɩtɩ yiǝ
mʋ na o waarɩm,
sɩ o nyɔ Dam-fɔrɔ Tu dɩm
ban-zɔŋɔ na-zʋŋa kam wʋnɩ.
21 Bɛŋwaanɩ o ŋwɩa da yam na tu
ya kweeli yɩ o tɩ,
o yigə daa tǝri o kwaga kam wʋnɩ.
22 Wɔɔ mʋ yi sɩ o wanɩ
o brɩ Wɛ yǝno?
Bɛŋwaanɩ Wɛ mʋ bʋrɩ nɔɔna maama,
dɩ wɛyuu dɩdɛɛra bam dɩ.
23 Nɔɔnʋ wʋdoŋ waɩ
o jɩgɩ o yazurə taan,
sɩ o laan vu o tɩ dɩ ya
yɩ kʋlʋkʋlʋ ba fɔgɩ kʋ daanɩ‑o.
24 Kʋ tu yɩ-daa ta nugi lanyɩranɩ,
yɩ o yɩra dɩ dana cɩga cɩga
nɩ nɔn-dʋŋʋ te.
25 Nɔɔnʋ wʋdoŋ dɩ maa wʋ́ wanɩ o tɩ
yɩ o ya maŋɩ o ba jɩgɩ tɩɩna.
Kʋ tu wʋ di ywəəni o ŋwɩa wʋnɩ
dɩ fɩnfɩɩn dɩ.
26 Kʋ nan na yɩ te tɩn,
ba maama tɩgɩ mʋ,
yɩ ba tigi daanɩ tɩga kuri nɩ.
Tʋ́a mʋ wʋra ka mu
ba maama yɩra yam.
27 Amʋ nan lwarɩ wʋbʋŋa yalʋ
á na bʋŋɩ á pa-nɩ tɩn.
A ye nɩ á yɔɔrɩ
á bʋŋɩ amʋ cɔgɩm mʋ.
28 Abam nan kaagɩ á tɛ nɩ:
‹Nɔn-kamunu sɔŋɔ kʋm laan
wʋ yən nɩ mʋ?
Nɔn-balwaarʋ tɩm ya na zʋʋrɩ mɛ tɩn daa bɛ?›
29 Abam ta wʋ larɩ dɩ balʋ na kaagɩ
ba beeri je maama nɩ tɩn
sɩ ba ta kʋlʋ na wʋra tɩn
ba brɩ abam na?
30 Ba wʋ pɛ á maanɩ nɩ:
Wɛ na pɛ lɛɛrʋ ba nɔɔna baŋa
DƖ ban-lʋm dɩm ŋwaanɩ,
nɔn-balwaarʋ yǝni ba lu
DƖ waarɩm dɩm wʋnɩ mʋ na?
31 Wɔɔ mʋ nan wʋ́ zɩgɩ nɔn-balɔrɔ yigə nɩ, o có-o?
Wɔɔ mʋ tini o jɩm o pa-o, o tɩtʋŋ-balwaarʋ tɩm ŋwaanɩ?
32 O nan na tɩga, ba yǝni ba keeri
o luə lanyɩranɩ,
yɩ ba fɔgɩ ba yɩrɩ o yibeeli.
33 Baá kɩ kʋ tu bol-laa wʋnɩ mʋ,
yɩ tɩga kasʋlʋ kʋm tɩtɩ bá daanɩ‑o.
O luə kam dɩ wʋ́ nɩɩnɩ mʋ
dɩ kɔ-fɔrɔ.
34 Kʋ na sɩɩnɩ kʋ yɩ kʋntʋ tɩn,
abam nan wʋ́ kɩ tɩta mʋ
á da á bɩtar-yɔɔrʋ tɩm ŋwaanɩ
á zuri amʋ bɩcarɩ?
Á na ləri a taanɩ te maama tɩn
yɩ á ganɩ-nɩ mʋ!»