Tɩsofaarɩ ni-taanɩ
20
Naama tu Tɩsofaarɩ ma ta o wɩ:2 «Nmʋ taanɩ dɩm yɔɔrɩ
dɩ vɩvɩlɩ a wʋʋ mʋ,
yɩ kʋ maŋɩ sɩ a daa ta taanɩ
a wǝli da,
a wʋbʋŋa na daanɩ-nɩ tɩn ŋwaanɩ.
3 Nmʋ ni-taanɩ dɩm yɩ tʋrʋ mʋ
dɩ pa-nɩ.
Amʋ dɩ nan wʋ́ da yi-pʋrʋ ŋwaanɩ
a ta a ni a ləri‑m mʋ.
4 Nmʋ nan ye kʋ na maŋɩ
kʋ yɩ te faŋa faŋa,
yɩ ba puli ba kɩ nabiinǝ
ba yagɩ tɩga kam baŋa nɩ tɩn.
5 Wʋpolo kʋlʋ nɔn-balwaarʋ
na yǝni ba naɩ tɩn mʋ ti lɩla.
Wɛ-lwɛɛna dɩ na di ywəəni dɩlʋ tɩn
maa ba daana.
6 Ba waɩ ba zǝŋi ba vwana
sɩ ya di wɛ-baŋa,
naa ba kwǝni ba yum wɛɛnɩ
sɩ tɩ dwe wɛyuu kʋm dɩ.
7 Dɩ kʋ dɩ, ba lagɩ ba ba
ba ji tɩɩrʋ mʋ ba je wuu,
sɩ balʋ ya na ye-ba tɩn taa bwe ba wɩ:
‹Ba wʋ yən nɩ mʋ?›
8 Kʋʋ́ kɩ-ba nɩ nɔɔnʋ na dwɛ dɩndwɛ
yɩ dɩ kɛ lɩla te tɩn mʋ.
Ba lagɩ ba je mʋ,
nɩnɛɛnɩ tɩtɩɩ wʋʋ dɩndwɩa
na yɩ te tɩn.
9 Ba fara dɩ ba sɔŋɔ tiinə daa bá na-ba,
ba daa na tǝrǝ tɩn ŋwaanɩ.
10 Nɔn-balwaarʋ tɩm biə mʋ jɩgɩ
sɩ ba joori ba joori ba ŋwɩ jɩna yalʋ
ba kwə na vrɩ yinigə tiinə tee nɩ tɩn.
11 Cɩga ŋwaanɩ, ba ta na wʋ
ba nɔn-dʋnnɩ maŋa nɩ,
baá ba ba tɩ mʋ
dɩ ba dam maama.
12 Kʋ na yɩ sɩ lwarɩm na
ywəmmə o ni wʋnɩ,
o na səgi lwarɩm kəm o dindəlim kuri nɩ, yɩ o jɩgɩ-dɩ o muə.
13 O maa vaɩ sɩ ya ti o ni nɩ,
yɩ o laan liri-dɩ fɩɩn fɩɩn.
14 O wʋdiu kʋm kʋntʋ nan na yi o wʋʋ,
kʋʋ́ pipiri kʋ ji wo-gaa mʋ.
Kʋ maa wʋ́ ji bɩsankwɩa vɩan
o pugə nɩ.
15 Kʋ ta na yɩ jɩjɩgɩrʋ tɩlʋ
kʋ tu na ligi pu-sɩŋa baŋa nɩ tɩn,
Wɛ nan wʋ́ pa o twanɩ-tɩ o yagɩ.
16 Oó mu kapaa vɩan mʋ.
Bɩsankwɩa maa wʋ́ dʋn‑o ka gʋ.
17 Kʋ tu bá di ywəəni tɩga baŋa
wo-laarʋ tɩm baŋa nɩ,
nɩ tɩ na yɩ tʋʋrʋ dɩ nayɩl-pɩpala
na tigi yɔɔ nɩ bu-tʋla tɩn dɩ.
18 O nan ta wʋ́ ga wǝǝnu tɩlʋ maama
o na yaarɩ tɩ ŋwaanɩ
yɩ o wʋ di tɩ ywəəni tɩn mʋ.
O maa bá na o tɩtʋŋa yam nyɔɔrɩ.
19 Bɛŋwaanɩ, o tiini o bɛɛsɩ yinigə tiinə
yɩ o daarɩ-ba o zɩgɩ bwəri.
O ma vrɩ sam dɩlʋ o na wʋ lɔgɩ tɩn,
sɩ o taa zʋʋrɩ dɩ wʋnɩ.
20 O nan bá tʋŋɩ o su o fra pa o sin.
O maa yǝni o puuri wǝǝnu tɩlʋ maama o yi na su tɩn.
21 O na di o ti, kʋlʋkʋlʋ daa ba daara.
Kʋntʋ ŋwaanɩ, o wǝǝnu bá daanɩ
yɩ tɩ je.
22 O na maŋɩ o na kʋlʋ maama
o ya na beeri tɩn,
liǝ ta wʋ́ taa jɩg-o.
Wʋ-cɔgɔ dɩ maa wʋ́ tiini
kʋ ja-o.
23 Nɔn-balɔrɔ wʋm na wʋra o di
o su o fra,
Wɛ ban-lʋm dɩm wʋ́ ba o baŋa,
pa kʋ tiini kʋ cɛ o yɩra.
24 Kʋ tu na kwaanɩ sɩ o duri
o daarɩ luuru najara zɩla,
canna cicwe mʋ wʋ́ zɔ‑o.
25 Dɩ na mʋʋrɩ dɩ maŋɩ
o yɩra nɩ tɩn mʋ o vaŋɩ-dɩ
o lɩ o wʋʋ lʋrʋ nɩ,
yɩ dɩ ni dɩm nyɩɩna.
Fʋʋnɩ ma tiini dɩ zʋ-o.
26 Lim wʋ́ yɔɔrɩ dɩ kwǝli
o lʋnnɩ wǝǝnu tɩm maama.
Mim dɩlʋ nabiinǝ na wʋ kɩ tɩn
nan mʋ wʋ́ di‑o,
yɩ dɩ daarɩ dɩ zwɛ o jɩjɩgɩrʋ
tɩlʋ maama na daarɩ tɩn kulə.
27 Wɛyuu kʋm wʋ́ brɩ o tusim dɩm mʋ jaja.
Tɩga kam baŋa dɩ maa wʋ́ pa maana nɩ: o kɩ o cɔgɩ.
28 Na-fara mʋ lagɩ ba cuuri
ba coori o sɔŋɔ kʋm ba ja ba je
Wɛ ban-lʋm dɛ dɩm nɩ.
29 Nɔn-balɔrɔ kʋm na wʋ́ ba
kʋ guri te tɩn mʋ kʋntʋ.
Wɛ mʋ maŋɩ DƖ sɛ nɩ
kʋntʋ taa tigə kʋ tu ŋwaanɩ.»