Zobi na ləri te tɩn
19
Zobi ma ləri o wɩ:2 «Abam lagɩ sɩ á tɔgɩ
á bɩtarɩ biə bam ŋwaanɩ
á pa kʋ zʋ a yɩra
á vu á maŋɩ yən nɩ mʋ?
3 Cavɩɩra ta ba jɩgɩ abam
dɩ á na bwɛ-nɩ kuni fugə tɩntʋ tɩn na?
4 Kʋ nan na sɩɩnɩ kʋ yɩ cɩga nɩ
amʋ tusi mʋ,
kʋʋ́ taa yɩ amʋ yu-wɔrɔ mʋ,
sɩ kʋ daɩ abam yigə.
5 Abam bʋŋɩ sɩ á brɩ á tɩtɩ mʋ
amʋ baŋa nɩ.
Á ta maa paɩ kʋ yɩ amʋ tusim ŋwaanɩ mʋ a nɛ a cavɩɩra.
6 Nan lwarɩ-na nɩ kʋ yɩ Wɛ yigə mʋ
pa yaara yantʋ maama ba a baŋa.
Dɩntʋ mʋ cɩgɩ cɩkʋ
sɩ DƖ ma DƖ ja-nɩ.
7 Amʋ na kaasɩ mʋ a wɩ:
‹Vuvugə tu a baŋa!›
nɔɔn-nɔɔnʋ ba ləri-nɩ.
A nan na beeri zǝnǝ,
ba ba paɩ a jɩgɩ cɩga.
8 Wɛ cɩgɩ a yigə mʋ sɩ a yɩ na cwǝŋǝ a tɔgɩ da a kɛ.
DƖ ma daarɩ DƖ pa lim kwǝli
a cwe sɩm maama.
9 DƖ jaanɩ a zulə maama mʋ DƖ joŋi
DƖ daarɩ-nɩ DƖ zɩgɩ bwəri,
sɩ a daa yɩ taa jɩgɩ paarɩ a di.
10 DƖ maa yɔɔrɩ DƖ magɩ-nɩ DƖ dɩ tɩga nɩ,
pa a je.
Kʋ ta na yɩ tɩɩna yalʋ a ya na jɩgɩ tɩn,
DƖ vaŋɩ-ya DƖ gɔ DƖ yagɩ mʋ,
nɩ ba na kɩ te dɩ tiu kʋlʋ
ya na jəri kʋ zɩgɩ tɩn.
11 DƖ ban-lʋm dɩm wʋ amʋ baŋa nɩ mʋ,
yɩ DƖ jeeli amʋ DƖ kɩ balʋ
na yɩ DƖ dʋna tɩn wʋnɩ.
12 DƖ jar-kərə bam nuŋi dɩ dam mʋ
ba bɩɩna.
Ba yɔɔrɩ ba kwɛ cwǝŋǝ mʋ
ba tiŋi sɩ ba yi amʋ,
yɩ ba cwi ba vwə
ba gilimi-nɩ ba kɩ tɩtarɩ nɩ.
13 Wɛ ta kɩ sɩ amʋ dɩ a cʋrrʋ tɩm
taa warɩ daanɩ mʋ,
sɩ a badonnǝ dɩ a fara
dɩ nuŋi a kwaga nɩ.
14 A cʋrrʋ maama duri ba daarɩ-nɩ mʋ.
A badonnǝ dɩ ma swe a swiə.
15 Amʋ sɔŋɔ vərə dɩ a tɩntʋŋ-kana bam maama laan nii-nɩ
sɩ a taa yɩ nɔn-vərə mʋ a pa-ba.
16 Amʋ na bəŋi a tɩntʋŋnʋ wʋlʋ,
kʋ tu bá sɛ sɩ o ləri-nɩ,
dɩ a na tiini a loori‑o
sɩ o duri a ŋwaŋa te tɩn dɩ.
17 A na sin a yɩra viu,
kʋ lwe a kaanɩ mʋmwa nɩ mʋ.
A digə tiinə maama dɩ nɩɩsɩ-nɩ
pa ba duri ba daarɩ-nɩ mʋ.
18 Bu-balwa tɩtɩ yigə təri a wʋnɩ mʋ.
A maa na zaŋɩ wɛɛnɩ,
ba jɩgɩ-nɩ ba kɩ ba mwana.
19 A cilon-sonnu maama dɩ
daa vaɩ a ni-taanɩ,
yɩ ba duri ba daarɩ-nɩ.
20 Amʋ yɔɔrɩ a di maama mʋ a ti
a daarɩ kwi yɩranɩ.
A mʋmwa ta na sin tɩn mʋ
sɩ kʋ daa daɩ ŋwɩa mʋ amʋ jɩga.
21 Amʋ badonnǝ bam, A loori popo!
Kwaanɩ-na sɩ á duri a ŋwaŋa,
sɩ Wɛ yɔɔrɩ DƖ magɩ-nɩ
DƖ dɩ tɩga nɩ mʋ.
22 Bɛŋwaanɩ mʋ abam dɩ zəli-nɩ
sɩ á ja nɩnɛɛnɩ Wɛ na kɩ te tɩn?
Kʋ na tiini kʋ cɛ amʋ yɩra nɩ te tɩn ta wʋ su abam yi na?
23 Nɔɔnʋ ya na wʋ́ wanɩ a ni-taanɩ
dɩntʋ o pʋpʋnɩ o tiŋi tɔnɔ wʋnɩ,
kʋ yaá taa lana zanzan.
24 Ba na kwe luu ba sarɩ-dɩ
ba kɩ piu yɩra nɩ,
a bɩtarɩ biə bam yaá taa wʋra
taan wuu.
25 Amʋ nan ye nɩ wʋlʋ na bʋrɩ
o pa-nɩ tɩn ŋwɩ.a
Wʋntʋ maa wʋ́ zaŋɩ o ŋɔɔnɩ
o pa-nɩ sɩ kʋ kweeli.
26 Yawɩʋ nan na di a ya-nwana yam mʋ kʋ ti dɩ,
amʋ ta wʋ́ na Wɛ
kʋ tɔgɩ a yɩra yantʋ wʋnɩ.
27 Cɩga tɩn, amʋ tɩtɩ mʋ lagɩ a na‑o
dɩ a yiǝ, sɩ kʋ daɩ nɩ nɔn-gaa.
A nan yɔɔrɩ a je a tɩɩna
sɩ a na‑o mʋ.
28 Abam tɛ á tɩtɩ nɩ á wɩ:
‹Pa-na dɩ́ yɔɔrɩ dɩ́ zəg-o dɩ́ ja.
O tɩtɩ mʋ jaanɩ cam dɩntʋ
o ba o pa o tɩtɩ.›
29 Nan kwarɩ-na fʋʋnɩ
dɩ Wɛ na lagɩ DƖ waarɩ abam te tɩn!
Wɛ wʋ́ tɔgɩ DƖ ban-lʋm dɩm baŋa
DƖ kwe DƖ sʋ-lɔŋɔ,
pa á lwarɩ nɩ
DƖ sɩɩnɩ DƖ di nabiinǝ taanɩ.»