Bilidadɩ na ləri te tɩn
18
Suha tu Bilidadɩ ma ləri o wɩ:2 «Nmʋ lagɩ n ŋɔɔnɩ tɩntʋ
n vu n maŋɩ yən nɩ mʋ?
Ja swan sɩ dɩ́ laan taa ŋɔɔnɩ daanɩ.
3 Nmʋ bʋŋɩ nɩ dɩbam yɩ vara mʋ
n yigə nɩ na?
N paɩ dɩ́ yɩ nɔn-jwəəru mʋ na?
4 N tɔgɩ n ban-zɔŋɔ kʋm ŋwaanɩ mʋ
n frɩ n tɩtɩ n kɩ zʋnnɩ.
N nan bʋŋɩ nɩ tɩga baŋa kam
wʋ́ da nmʋ ŋwaanɩ sɩ ka pa
nabiinǝ viiri ba daarɩ-ka na?
Kandwa-zana dɩ maa wʋ́ guri
ya na tigi mɛ tɩn,
sɩ ya vu ya tʋ je-gaa nɩ na?
5 Kʋ na yɩ nɔn-balwaarʋ tɩm,
ba ŋwɩa pooni dɩm
wʋ́ da dɩ dwe mʋ.
Ba min-vʋgʋ pooni daa bá zaŋɩ wɛɛnɩ.
6 Ba vwə yam wʋ pooni
yǝni dɩ ji lim mʋ,
yɩ ba min-zoŋo kʋm dɩ dwe.
7 Ba daanɩ ba nɔnɩ ba na-baara yam
bwəm yɩranɩ mʋ.
Ba kwiə yam mʋ dɩ-ba tɩga nɩ.
8 Ba nɛ sɩm yǝni sɩ ja-ba sɩ vu
sɩ dɩ goŋo wʋnɩ,
pa ba maŋɩ da.
9 Cɩkʋ mʋ yɔɔrɩ
kʋ sɔ ba nagwələ,
pa ba warɩ ba tɩtɩ sɩ ba vrɩ.
10 Ŋʋna kalʋ ba na lagɩ ba ma ba ja-o tɩn,
ba səgi-ka tɩga nɩ mʋ,
cɩkʋ kʋlʋ na lagɩ kʋ ja-o tɩn
wʋ o cwəŋə kam yuu nɩ mʋ kʋ cəg-o.
11 Lɛɛrʋ dwi dwi mʋ fugi-ba
je maama nɩ,
pa fʋʋnɩ tiini dɩ jɩgɩ-ba.
12 Ba dam maa lagɩ dɩ je,
kana na jɩgɩ-ba tɩn ŋwaanɩ.
Ba na tri ba tʋ tɩga nɩ,
lɛɛrʋ mʋ wʋ́ ba ba baŋa.
13 Yawɩ-cɛɔ wʋ́ di ba yɩra yam
daa kadoŋ,
pa ba ya-nwana yam mʋʋrɩ,
yɩ tʋʋnɩ dɩ ja-ba.
14 Ba yɔɔrɩ ba fɩn-ba mʋ
pa ba nuŋi ba vwə nɩ,
mɛ ba ya na je dɩ yazurə tɩn,
sɩ ba vu ba tɩ dam tʋʋnɩ.
15 Nɔn-gɛ maa zʋʋrɩ
ba vwə yam wʋnɩ,
yɩ ciribi mʋ ba kwe ba lo da.
16 Nɔn-balwaarʋ tɩm nyɩ dɩ
tweeru tɩlʋ kuru dɩ dɩ nɛ sɩm
na kwaarɩ tɩn mʋ.
17 Ba yɩrɩ yɔɔrɩ dɩ saarɩ mʋ
lʋgʋ baŋa nɩ,
yɩ nɔɔn-nɔɔnʋ daa ba guli ba gulə.
18 Ba zəli-ba mʋ
pa ba nuŋi pooni wʋnɩ,
yɩ ba zʋ lim wʋnɩ.
Ba yɔɔrɩ ba lɩ-ba lʋgʋ kʋm wʋnɩ mʋ.
19 Ba maa wʋ daarɩ dwi ba tɩʋ kʋm nɩ,
sɩ kʋ jwa bəŋi ba yɩrɩ.
20 Nabiinǝ maama yɩ yǝǝu mʋ
dɩ kʋlʋ na yi nɔn-balwaarʋ tɩm tɩn,
kʋ na yɩ balʋ na zʋʋrɩ
wa-zʋʋrɩ seeni tɩn
dɩ balʋ na zʋʋrɩ
wa-puli seeni tɩn dɩ.
21 Cɩga ŋwaanɩ tɩn,
lwarɩm-kərə na wʋ́ guri te tɩn
mʋ kʋntʋ.
Ba sam dɩm wʋ́ cɔgɩ mʋ,
ba na yǝri Wɛ tɩn ŋwaanɩ.»