Zobi na ləri te tɩn
16
Zobi ma ləri o wɩ:2 «Amʋ maŋɩ a ni bɩtarɩ-cɛ
yalʋ abam na tɛ dɩ amʋ tɩn zanzan.
Á taana yam nan ba zuri
amʋ bɩcarɩ kɔtaa!
3 Abam na tiini á ŋɔɔnɩ bɩtar-yɔɔrʋ
tɩlʋ tɩn bá kweeli na?
Bɛɛ mʋ daanɩ abam
pa á ba yagɩ tɩ ŋwaŋa?
4 Abam ya na nɛ cam
nɩ amʋ na nɛ te tɩn,
a yaá wanɩ a ŋɔɔnɩ
nɩ abam na kɩ dɩ amʋ te tɩn.
A yaá ma ta-farɩ a bwɛ abam,
yɩ a dʋlɩ a yuu abam yigə nɩ.
5 Amʋ ni-taanɩ nan yaá kɩ dam
dɩ kɩ á kuri nɩ mʋ,
sɩ á bɩcara zuri a ŋwaŋa kam ŋwaanɩ.
6 Kʋ nan na yɩ te tɩn,
amʋ na puri a ni a ŋɔɔnɩ,
a ba sin dɩ zʋnnɩ dɩlʋ na jɩgɩ-nɩ tɩn.
A ya zɩ na cɩm dɩ,
amʋ cam dɩm yɔɔrɩ
dɩ wʋra mʋ maŋa maama.
7 Cɩga tɩn, Wɛ yɔɔrɩ DƖ pa
a yɩra cɛ mʋ,
yɩ DƖ daarɩ DƖ cɔgɩ
amʋ sɔŋɔ tiinə maama.
8 DƖ ma ja-nɩ DƖ vɔ
pa kʋ zʋ a yɩra zanzan.
Amʋ na tiini a bugi te tɩn mʋ paɩ
nɔɔna tɛ ba wɩ: a ba jɩgɩ cɩga.
9 Wɛ ma yɔɔrɩ DƖ culi-nɩ
yɩ DƖ tɔgɩ DƖ ban-lʋm baŋa nɩ
DƖ ja-nɩ DƖ tʋrɩ,
nɩ ga-varɩm na kɩ te tɩn.
DƖ nii-nɩ dɩ yi-sʋŋʋ sɩ DƖ cɔge-nɩ mʋ.
10 Nɔɔna kaagɩ ba jɩgɩ-nɩ ba mwana mʋ,
yɩ ba daarɩ ba lɔɛ a pʋpwaanʋ.
Ba maa kɩ ni daanɩ
sɩ ba dwəni dɩ amʋ.
11 Wɛ yɔɔrɩ DƖ kwe amʋ DƖ kɩ
nɔn-balwaarʋ jɩŋa nɩ mʋ,
pa a tʋ pusɩŋ-nyɩna jɩŋa nɩ.
12 Amʋ dɛɛn je dɩ bɩcar-zuru,
yɩ DƖ laan ba DƖ cɔge-nɩ.
DƖ ma sɔ a ban nɩ yɩ DƖ daarɩ
DƖ dʋlɩ-nɩ DƖ dɩ tɩga nɩ.
Wɛ fufugi amʋ mʋ.
13 DƖ taŋa cɩna fʋʋrɩ
ya tui amʋ baŋa.
DƖ ma ta-nɩ DƖ zɔ
a tapwal-biə bam seeni,
yɩ yibwənə tǝrǝ.
A wʋʋ lʋrʋ tɩtɩ tagɩ tɩ nuŋi
tɩ tʋ tɩga nɩ mʋ.
14 DƖ yɔɔrɩ DƖ zaŋɩ amʋ baŋa nɩ mʋ
kuni zanzan,
nɩ babɩa na zʋ najara wʋnɩ te tɩn.
DƖ ma ba o nuŋi sɩ o jeeri-nɩ dɩ najara.
15 Amʋ tiini a wʋ kərə nɩ mʋ,
yɩ a daarɩ a zʋ gwar-zɩnzwara
a je.
A kwe a dam maama
a suli tɩga kuri nɩ.
16 A yɔɔrɩ a keeri mʋ taan
pa a yiǝ ba ya sɩɩnɩ.
A yibiyə maama fʋlɩ mʋ
a kərə kam ŋwaanɩ.
17 Dɩ kʋ maama dɩ,
amʋ wʋ kɩ nakɔɔrɩ
a ma a cɔgɩ nɔɔn-nɔɔnʋ yigə.
A maa na loori Wɛ,
a wʋ cɔgɩ DƖ yigə.
18 Kʋ wʋ maŋɩ sɩ a jana bam ba
ba suli tɩga nɩ,
yɩ nɔɔn-nɔɔnʋ wʋ lwarɩ kʋ ni nɩ.
A kərə kam ba maŋɩ sɩ ka səgi.
19 Wʋlʋ na zɩgɩ amʋ kwaga nɩ tɩn
nan maŋɩ o wʋ wɛyuu nɩ.
Wʋntʋ mʋ wʋ́ ŋɔɔnɩ o pa-nɩ.
20 Amʋ badonnǝ bam gooni-nɩ mʋ.
Amʋ nan keeri zanzan
a kanɩ yi-na a loori Wɛ,
21 sɩ nɔɔnʋ mʋ zʋ nabiinu dɩ Wɛ
tɩtarɩ laŋa nɩ,
sɩ o kwɛ dɩbam daanɩ,
nɩ nabiinu na ŋɔɔnɩ
o pa o doŋ te tɩn.a
22 Bɛŋwaanɩ bɩna fɩnfɩɩn yɩranɩ mʋ daarɩ,
sɩ amʋ laan kwe cwǝŋǝ
a vu mɛ nɔɔna na ve
yɩ ba daa ba joori tɩn.»