Elifaazɩ na tagɩ kʋlʋ o kɩ bɩle tɩn
15
Teman tu Elifaazɩ daa ma ləri Zobi o wɩ:2 «Viu yɩranɩ mʋ nuŋi n ni nɩ!
Wʋbʋŋa tu nan ba ŋɔɔnɩ bɩtar-yɔɔrʋ.
3 Swan tu ba kaagɩ o ŋɔɔnɩ wo-kʋrrʋ,
dɩ taanɩ dɩlʋ na ba jɩgɩ kuri tɩn,
nɩ nmʋ na kɩ te tɩn.
4 Nii mʋ! N bʋŋɩ sɩ n dʋlɩ Wɛ fʋʋn-kɔrɔ
n yagɩ mʋ.
N ta ma n lagɩ n cɩ sɩ nɔɔna
yɩ taa bʋŋɩ Wɛ wʋbʋŋa cɩga cɩga.
5 N lwarɩm kikiə yam
dɩ n pipiri tɩtʋŋa yam,
mʋ pa n jɩgɩ ni sɩ n ŋɔɔnɩ
n cɔgɩ Wɛ yɩrɩ.
6 Kʋ daɩ amʋ mʋ ŋɔɔnɩ
a vanɩ nmʋ bʋra.
Sɩ n tɩtɩ ni-taanɩ mʋ lɩ‑m
dɩ zɩgɩ dáa nɩ.
7 Nmʋ mʋ puli nabiinǝ maama kuri na?
Naa n kʋɩ lʋgʋ baŋa pweeru tɩm mʋ?
8 Wɛ kɔgɔ kʋm na yǝni
ba jeeri daanɩ wɛyuu nɩ,
nmʋ dɩ wʋ́ tɔgɩ n gwaanɩ
ba wʋnɩ na?
Nmʋ bʋŋɩ nɩ nmʋ yɩranɩ yi mʋ pʋʋrɩ na?
9 N ye wǝǝnu yɩ dɩbam yəri-tɩ na?
Naa n ni wǝǝnu kuri mʋ
yɩ dɩbam warɩ-tɩ sɩ dɩ́ lwarɩ?
10 Balʋ yum na pɩɩrɩ tɩn mʋ
zɩgɩ dɩ́ kwaga nɩ.
Ba maa yɩ nankwɩn
sɩlʋ na kʋɩ nmʋ ko tɩn.
11 Wɛ kwe bɩcar-zuru taanɩ mʋ
DƖ ta dɩ nmʋ.
DƖ na zuri DƖ yɩra dɩ nmʋ kʋntʋ tɩn,
kʋ ba jɩgɩ kuri kʋ pa‑m na?
12 Bɛŋwaanɩ mʋ nmʋ warɩ n banɩ
sɩ n ja pa n yibiyə ləni?
13 Nmʋ nan pɛ n banɩ zaŋɩ dɩ Wɛ,
yɩ bɩtar-yɔɔrʋ yɩranɩ tɔgɩ n ni nɩ
ya nuŋǝ.
14 Nabiinu wʋ́ wanɩ o taa yɩ lanyɩranɩ fasɩ na?
Kaana na lʋgɩ balʋ maama tɩn wʋnɩ
wɔɔ mʋ jɩgɩ cɩga Wɛ yigə nɩ?a
15 Kʋ na maŋɩ kʋ yɩ
Wɛ malɛksɩ tɩtɩ dɩ,
DƖ ba kɩ DƖ tɩɩna sɩ wʋnɩ.
DƖ maa wʋ sɛ nɩ wɛyuu baŋa
je sɩm yɩ lanyɩranɩ fasɩ DƖ yigə nɩ.
16 Nabiinǝ laan wʋ́ taa yɩ tɩta mʋ
DƖ tee nɩ?
Ba wʋbʋŋa tiini ya pɔ mʋ,
yɩ ba tʋŋɩ lwarɩm
nɩ na mʋ ba jɩgɩ ba nyɔ tɩn.
17 Jǝni kʋntʋ cɩmm sɩ a maŋɩ wǝǝnu sɩ n ni tɩ kuri.
Yagɩ sɩ a ta a yi na nɛ kʋlʋ tɩn
a brɩ-m.
18 Kʋ nan yɩ swan tiinə na nɛ kʋlʋ faŋa
yɩ ba ta kʋ taanɩ jaja tɩn mʋ.
Ba kwə dɩ dɛɛn ma brɩ-ba
swan yam kʋntʋ.
19 Bantʋ yɩranɩ mʋ joŋi tɩga kam
Wɛ tee nɩ.
Vərə maa ba jɩgɩ cwǝŋǝ
sɩ ba ganɩ-ba.
20 Nɔn-balwaarʋ dɩ wʋ-lʋn-nyɩna
wʋ́ na yaara mʋ taan,
sɩ ba ŋwɩa bɩna yam maama
ba ya ti.
21 Ba ni kwǝri mʋ ba zwa wʋnɩ
pa fʋʋnɩ zʋ-ba.
Yazurə na yi-ba dɩ,
vɩnvɩrna mʋ bɩɩnɩ ba baŋa.
22 Ba maa ba jɩgɩ tɩɩna
sɩ ba lu lim wʋnɩ,
sʋ-lwaanʋ na jaanɩ cɔgɩm
tɩ ba ba baŋa tɩn ŋwaanɩ.
23 Duurə mʋ wʋ́ taa kaagɩ ba jaanɩ
je maama nɩ
sɩ ba di nɔɔna bam kʋntʋ ya-nwana.
Ba maa ye nɩ ba ba jɩgɩ jwa,
sɩ lim yɩranɩ mʋ lagɩ
dɩ kwǝli-ba.
24 Liǝ zanzan jɩgɩ-ba,
pa ba tiini ba kwarɩ fʋʋnɩ.
Fʋʋnɩ maa wʋ́ wanɩ-ba dɩ di,
nɩ pɛ wʋlʋ na zaŋɩ najara
dɩ o dʋna tɩn.
25 Nɔn-balwaarʋ tɩm twɩ o jɩŋa mʋ sɩ ba ja dɩ Baŋa-Wɛ,
yɩ ba dwəni dɩ Dam-fɔrɔ Tu
Wɛ dɩm mʋ.
26 Ba maa jɩgɩ dɩ Wɛ
nɩ jar-kərə balʋ na duri
sɩ ba ja najara yam ba yi‑DƖ te tɩn.
27 Nɔn-balwaarʋ tɩm yɔɔrɩ ba nu mʋ
bigilə bigilə, yɩ ba yɩra dunǝ.
28 Ba nan zʋʋrɩ tɩɩnɩ dɩlʋ na jigi di-dwəənu tɩn wʋnɩ mʋ,
mɛ seeni na wʋ maŋɩ sɩ nɔɔn-nɔɔnʋ taa zʋʋrɩ da tɩn.
Ba sam dɩm lagɩ dɩ tʋ tɩga nɩ
dɩ ji weeru yɩranɩ mʋ.
29 Ba daa bá taa yɩ nadunə.
Ba jɩjɩgɩrʋ tɩm dɩ maa bá daanɩ
yɩ tɩ je.
Ba wǝǝnu tɩm bá puli
sɩ tɩ yi tɩga kam ni maama.
30 Ba bá na cwǝŋǝ sɩ ba lu
lim dɩm wʋnɩ.
Ba nan wʋ́ taa yɩ nɩ tweeru tɩlʋ nɛ
na jaanɩ mim tɩn mʋ.
Wɛ na sin DƖ yagɩ ba yɩra nɩ,
baá yɔɔrɩ ba je mʋ.
31 Nɔn-balɔrɔ nan yɩ ganɩ o tɩtɩ
sɩ o kwe o tɩɩna o daŋɩ wo-yɔɔrʋ baŋa nɩ.
Bɛŋwaanɩ o na wʋ́ na nyɔɔrɩ dɩlʋ tɩn
yɩ wo-kʋrrʋ yɩranɩ mʋ.
32 O bá yi o maŋa dɩ o na kwaarɩ,
nɩ kʋrʋ tiu nɛ sɩlʋ daa
na bá kwin vɔɔrʋ tɩn.
33 Kʋ tu ta wʋ́ taa yɩ nɩ vinyə tiu
na yagɩ kʋ biə yɩ ba wʋ bɩgɩ
kʋ dɩ tɩga nɩ te tɩn mʋ,
dɩ Olivi tiu punnu na kwǝri
tɩ tʋɩ tɩga nɩ te tɩn.
34 Kʋ na yɩ balʋ na vɩn Wɛ cwǝŋǝ tɔgɩm tɩn,
ba kɔgɔ kʋm bá daarɩ dwi
tɩga kam baŋa nɩ.
Mim mʋ wʋ́ zwɛ ba sam dɩm maama,
ba na lɔgɩ-dɩ vwa-tɩtʋŋa baŋa nɩ tɩn ŋwaanɩ.
35 Ba yǝni ba ja cam pugə mʋ,
yɩ ba pugə kam vri lwarɩm.
Bu wʋlʋ ba na wʋ́ lʋ tɩn
maa yɩ gɩngana.»