Zobi daa ta ma ta o wɩ:
14
«Kaanɩ na lʋgɩ nabiinu wʋlʋ maama,kʋ tu ŋwɩa yɩ kukugə mʋ
yɩ ka su dɩ cam yɩranɩ.
2 O maa nyɩ dɩ ga-puŋu kʋlʋ na puli
yɩ kʋ laan daarɩ kʋ kwaarɩ
lɩla tɩn mʋ.
O ta yɩ nɩ lunluŋu na yɩ te tɩn mʋ.
O ba daana yɩ o jeə.a
3 Wɛ, nabiinǝ na bwǝnǝ kʋntʋ tɩn,
bɛɛ mʋ te yɩ n kɩ n yigə ba wʋnɩ?
Bɛŋwaanɩ mʋ n lagɩ n saŋɩ amʋ
sɩ n daarɩ n di a taanɩ?
4 Nɔn-diku wʋ́ wanɩ o lʋ nɔn-ŋʋm na?
Kʋ bá wanɩ kʋ kɩ.
5 Nmʋ wuuri n jeeli nabiinǝ ŋwɩa da yam mʋ,
pa ya ba ya kweeli ya maŋa nɩ.
Nɔɔna warɩ sɩ ba gaalɩ
ba maŋa kam cɩga cɩga.
6 Kʋntʋ ŋwaanɩ nan yagɩ ba yɩra,
sɩ ba wanɩ ba tʋŋɩ
yɩ ba daarɩ ba sin,
nɩ ba na jɩnɩ nɔɔna balʋ
sɩ ba taa tʋŋɩ tɩn.
7 Ba na goni tiu ba dɩ tɩga nɩ,
tɩɩna ta wʋra nɩ
kʋʋ́ joori kʋ kwin,
sɩ kʋ nɛ-dʋnnʋ tɩm daa yɩ tɩ.
8 Kʋ bʋnnʋ tɩm waɩ tɩ pɔɩ
tɩga kuri nɩ,
pa kugu kʋlʋ na daarɩ tɩn dɩ tɩ.
9 Sɩ na fɩnfɩɩn na yɔɔrɩ ba dwe
tiu kʋm yɩra,
kʋʋ́ joori kʋ kwi nɛ-dʋnnʋ
dɩ vɔɔrʋ mʋ.
10 Kʋ nan na yɩ nabiinǝ,
ba na yɔɔrɩ ba tɩ,
ba dam wʋ́ ti mʋ.
Ba mʋmwɛ nan na tu dɩ ti,
ba laan wʋ́ vu yən mʋ?
11 Bugə wʋ na yǝni ba wɩ
ba daarɩ-ka,
pa ka tigi tɩ-kʋra yɩranɩ mʋ,
12 kʋntʋ doŋ mʋ, nɔɔnʋ na tɩga,
o daa warɩ sɩ o zaŋɩ.
Wɛyuu kʋm maama wʋ́ ba kʋ je
yɩ kʋ tu ta wʋ zaŋɩ.
Nɔɔn-nɔɔnʋ bá wanɩ o pɩɩs‑o
sɩ o zaŋɩ dɔɔnɩ nɩ.
13 A loori-m! Amʋ Tu Wɛ, kwe-nɩ
n səgi curu nɩ,
sɩ kʋlʋkʋlʋ yɩ yi-nɩ,
kʋ taa nii dɛ dɩm
n banɩ na zuri tɩn.
Nan kuri dɛ sɩ n laan joori
n guli amʋ gulə.
14 Nɔɔnʋ na tɩga, o daa wʋ́ joori
o na ŋwɩa na?b
Amʋ lʋgʋ baŋa tɩtʋŋ-cɛɛra
maŋa kantʋ maama wʋnɩ,
a wʋ́ taa tʋŋa yɩ a tɩɩna
a vrɩm maŋa kam mʋ.
15 Nmʋ na bəŋi a yɩrɩ,
a wʋ́ ləri‑m.
Nmʋ wʋbʋŋa maa wʋ́ taa tigi
amʋ wʋlʋ n tɩtɩ jɩn na mɔɔnɩ tɩn wʋnɩ.
16 Nmʋ laan wʋ́ ta n yɩrɩ
a na-vəli maama,
yɩ n nan bá jeeli
a lwarɩm dɩm na yɩ te tɩn.
17 Nmʋ ma n wʋ́ kwǝli a lwarɩm dɩm,
nɩ nɔɔnʋ na səgi wǝǝnu
tampɔgɔ wʋnɩ te tɩn.
18-19 Kʋ nan na yɩ te tɩn,
nmʋ jaanɩ nabiinǝ tɩɩna yam mʋ
n cɔgɩ n yaga.
Kʋ maa nyɩ nɩ pweeru na waɩ
tɩ sirimi tɩ tʋɩ te,
yɩ kandwa-zana dɩ guri
ya na tigi mɛ tɩn mʋ.
Na-fara dɩ wʋ́ wanɩ kandwa
ba cɩcʋgɩ,
yɩ ba cuuri ba coori
tɩga kasʋlʋ ba ja ba kɛ.
Kʋntʋ mʋ nmʋ dɩ cɔgɩ
nabiinu ŋwɩa.
20 N yǝni n ma n dam mʋ
n dwəni dɩd‑o,
pa o yɔɔrɩ o je wuu.
O yibiyə wʋ́ ləri mʋ,
yɩ n laan daarɩ n zǝl-o sɩ o viiri.
21 Kʋ tu kwaga kam na nɛ zulə
tɩga baŋa nɩ, o yǝri kʋ ni nɩ.
Ba nan na jɩgɩ cavɩɩra mʋ
ba di dɩ,
o bá wanɩ o lwarɩ kʋ na kɩ-ba te tɩn.
22 Kʋlʋ yɩranɩ o na ye tɩn mʋ yɩ
o tɩtɩ yɩra na nɛ zʋnnɩ te tɩn.
O maa wʋ́ taa keeri o tɩtɩ kərə.»