Zobi ta ma ta o wɩ:
13
«Amʋ yiǝ mʋ yɔɔrɩya na tɩntʋ maama.
A zwa dɩ ma ni-tɩ, yɩ a ni tɩ kuri.
2 Abam dɩ amʋ ba garɩ daanɩ.
Abam maa na ye wǝǝnu tɩlʋ tɩn,
amʋ dɩ ye-tɩ mʋ.
3 A nan lagɩ sɩ a ŋɔɔnɩ
dɩ Dam-fɔrɔ Tu Wɛ dɩm mʋ.
A wʋ́ yi DƖ te mʋ
sɩ a tʋlɩ a taanɩ dɩm.
4 Abam nan yǝni á fɔ vwa-dɛɛra mʋ
á daŋɩ amʋ yuu nɩ.
Á nyɩ dɩ liri-kərə balʋ na warɩ
nɔɔn-nɔɔnʋ sɩ ba yɔɔrɩ tɩn mʋ.
5 Abam na pugi á niə, kʋʋ́ taa gara!
Kʋntʋ yaá brɩ nɩ:
á jɩgɩ swan cɩga cɩga.
6 Nan cəgi-na taanɩ dɩlʋ
a na maŋɩ sɩ a ta tɩn.
Cəgi-na amʋ ni na ŋɔɔnɩ kʋlʋ tɩn.
7 Abam bʋŋɩ sɩ á tɔgɩ tusim baŋa nɩ
á joŋi Wɛ taanɩ á ta á pa‑DƖ mʋ na?
Á wʋ́ fɔ vwan á ma á joŋi DƖ taanɩ
á ta na?
8 Abam wʋ́ sɛ sɩ á zɩgɩ á pa Wɛ mʋ,
sɩ á joŋi DƖ taanɩ saŋa baŋa nɩ
á ŋɔɔnɩ na?
9 DƖ nan na joori DƖ bwe abam,
á wʋ́ lu taanɩ nɩ na?
Á wʋ́ wanɩ Wɛ á ganɩ,
nɩ á na jɩgɩ nabiinǝ á ganɩ
te tɩn na?
10 Cɩga na tǝri abam taanɩ dɩm wʋnɩ,
á yǝri nɩ DƖ wʋ́ bwɛ abam
kʋ ŋwaanɩ na?
11 DƖ paarɩ-zulə yam bá fugi abam,
pa DƖ fʋʋnɩ taa jɩgɩ abam na?
12 Mɩmaŋa yalʋ abam na jɩgɩ
á maŋɩ tɩn ba jɩgɩ kuri,
nɩ tɩntwarɩm na yɩ te tɩn mʋ.
Á swan yam warɩ abam ya cɩ
kantɔgɔ wʋnɩ,
nɩ dɔgɔ na yarɩ lɩla te tɩn mʋ.
13 Nan pu-na á niə
sɩ kʋ pa-nɩ cwǝŋǝ sɩ a ŋɔɔnɩ.
Pa-na sɩ dɩ́ nii bɛɛ mʋ lagɩ kʋ ba
amʋ baŋa.
14 Yagɩ-na sɩ kʋlʋ na wʋ́ yi-nɩ,
sɩ kʋ yi.
Amʋ dʋlɩ a ŋwɩa mʋ a yagɩ.
15 Wɛ na laga dɩ, DƖ wʋ́ gʋ-nɩ,
sɩ a tɩɩna nan tigi Dɩntʋ wʋnɩ mʋ.a
Amʋ wʋ́ zɩgɩ DƖ yigə nɩ
a tʋlɩ a taanɩ dɩm,
sɩ a wanɩ a na a bʋra.
16 Kʋntʋ baŋa nɩ mʋ Wɛ wʋ́ wanɩ
DƖ joŋi-nɩ DƖ yagɩ.
Bɛŋwaanɩ, wʋlʋ na vɩn Wɛ cwǝŋǝ tɔgɩm tɩn bá na cwǝŋǝ
sɩ o zɩgɩ Wɛ yigə nɩ.
17 Fɔgɩ á cəgi-na taanɩ dɩlʋ
a na maŋɩ sɩ a ta tɩn.
Pa-na sɩ kʋlʋ a na tɛ tɩn tʋ á zwa nɩ.
18 Nii-na! A yɔɔrɩ a jeeli taanɩ dɩlʋ
a na wʋ́ ta tɩn mʋ.
A nan ye lanyɩranɩ nɩ
a wʋ́ di bʋra.
19 Wɔɔ mʋ wʋra sɩ o saŋɩ-nɩ wɩ a cɔgɩ?
A nan na sɩɩnɩ a cɔgɩ,
amʋ wʋ́ taa cɩm mʋ sɩ a laan tɩ.
20 Amʋ Tu Wɛ, wǝǝnu tɩle yɩranɩ mʋ
a lagɩ a loori n tee nɩ
sɩ n kɩ n pa-nɩ.
Kʋntʋ na kɩa, amʋ daa bá taa kaagɩ a səgi nmʋ yigə nɩ.
21 Dwanɩ n jɩn n daarɩ-nɩ.
Daa yɩ ta n jɩgɩ-nɩ n fugə
dɩ n cana yam.
22 Nan bǝŋi-nɩ, sɩ a wanɩ
a ləri n taanɩ dɩm,
naa pa-nɩ cwǝŋǝ sɩ a ŋɔɔnɩ,
sɩ nmʋ dɩ ləri a taanɩ dɩm.
23 A tiini a kɩ lwarɩm a cɔgɩ n yigə
sɩ kʋ vu kʋ maŋɩ yən mʋ?
Ta a lwarɩm dɩm dɩ a tusim dɩm
n brɩ-nɩ sɩ a lwarɩ-ya.
24 Bɛŋwaanɩ mʋ n yigə tǝri amʋ wʋnɩ?
Bɛɛ mʋ yɩ n yɔɔrɩ n dʋnɩ-nɩ?
25 Vɔɔ yɩ bɛɛ mʋ yɩ n lagɩ sɩ n fugi-kʋ?
Bɛɛ mʋ yɩ n zəli-nɩ,
nɩ viu na kalɩ swannʋ
kʋ ja je te tɩn?
26 N nan pʋpʋnɩ wo-cɛɛrʋ
n tiŋi tɔnɔ nɩ
wɩ tɩ yɩ amʋ yigə.
Kʋ ta na yɩ lwarɩm yalʋ a na kɩ
a nɔn-dʋnnɩ maŋa nɩ tɩn,
n laan ma n pa ya jɩnɩ
wʋ a yuu nɩ.
27 Nmʋ kwe capʋnnʋ mʋ
n vɔ a nɛ nɩ diŋ-diŋ.
N yǝni n yɩrɩ a na-vəli maama,
yɩ n lɔ sisəm n pa-nɩ
sɩ a yɩ gaalɩ-dɩ.
28 Kʋntʋ tɩn, a wʋra a je mʋ,
nɩ woŋo na yɔɔrɩ kʋ pɔɩ te tɩn.
A ŋwɩa tiini ka cɔgɩ,
nɩ gɔrɔ kʋlʋ tʋ́a na mugi tɩn.»