Zobi na ləri o badonnǝ bam te tɩn
12
Zobi daa ta ma ləri o wɩ:2 «Abam bʋŋɩ nɩ
á dwe nɔɔna maama mʋ,
yɩ á na tɩga, yǝno wʋ́ tɔgɩ
dɩ abam kʋ tɩ mʋ!
3 Nan taá ye-na nɩ:
amʋ dɩ jɩgɩ wʋbʋŋa,
nɩ abam na jɩgɩ te tɩn mʋ.
Abam dɩ amʋ ba garɩ daanɩ.
Abam na tagɩ wǝǝnu tɩlʋ maama tɩn,
wɔɔ nan mʋ yǝri tɩ ni nɩ?
4 Amʋ badonnǝ dɩ laan jɩgɩ-nɩ mʋ ba mwana,
dɩ a na yǝni a loori Wɛ
pa DƖ dɩ ləri a wɛ-loro te maama tɩn.
Ba yɔɔrɩ ba mwanɩ-nɩ mʋ,
dɩ a na jɩgɩ cɩga yɩ kəm-balwaarʋ tǝrǝ tɩn.
5 Nɔɔna balʋ kʋlʋkʋlʋ na ba yaarɩ-ba tɩn
yǝni ba gooni cam na jɩgɩ balʋ tɩn mʋ.
Ba maa yǝni ba yigi
balʋ na seeri sɩ ba tʋ tɩga nɩ tɩn.
6 Kʋ nan na yɩ vɩnvɩrna,
ba sam yɔɔrɩ dɩ zɩga dɩ dam mʋ.
Kʋlʋkʋlʋ ba yi balʋ na dwəni dɩ Wɛ tɩn dɩ.
Ba nan tɩɩna nɩ
ba tɩtɩ dam mʋ yɩ ba wɛ.
7 Nan bwe-na vara bam,
dɩ wɛyuu zunə bam,
sɩ baá ta cɩga ba brɩ abam.
8 Abam ta na laga,
bwe-na tɩga baŋa wǝǝnu,
naa nɩnɩʋ wʋ kale sɩm,
sɩ sɩ brɩ abam yǝno taanɩ.
9 Wǝǝnu tɩm kʋntʋ maama ye nɩ:
kʋ yɩ Baŋa-Wɛ dam dɩm mʋ kɩ kʋntʋ.
10 Wǝǝnu tɩlʋ maama na wʋ
tɩga baŋa nɩ tɩn
wʋ Wɛ dam dɩm kuri nɩ mʋ.
Nabiinǝ maama ŋwɩa
dɩ maa wʋ Dɩntʋ jɩŋa nɩ.
11 Nabiinǝ zwa cəgi taana
sɩ ba lwarɩ mʋ,
nɩ ba dindəlimə na yǝni
ya laŋɩ wʋdiiru te tɩn.
12 Kʋkwɩɩrʋ paɩ nɔɔna jaanɩ swan mʋ.
Mʋmwɛ-dɛɛrɩ dɩ jaanɩ yi-pʋrʋ mʋ
dɩ tui.
13 Swan dɩdaanɩ dam yɩ Wɛ mʋ te-tɩ.
DƖ maa brɩ kwiə,
dɩ yi-pʋrʋ maama dɩ.
14 Dɩntʋ na yigi woŋo kʋlʋ
DƖ dɩ tɩga nɩ,
nɔɔn-nɔɔnʋ warɩ-kʋ
sɩ o joori o lɔ o zɩgɩ.
DƖ nan na jaanɩ wʋlʋ DƖ pɩ,
nɔɔn-nɔɔnʋ warɩ kʋ tu
sɩ o pʋrɩ o yagɩ.
15 DƖ na yǝni o cɩ dʋa sɩ ka yɩ nɩa,
da-kʋrɩ mʋ wʋ́ zɩgɩ.
DƖ maa na yǝni DƖ pa cwǝŋǝ
sɩ ka tiini ka nɩ,
ka dɩ yɔɔrɩ ka cɔgɩ tɩga baŋa wǝǝnu zanzan mʋ.
16 Dam-fɔrɔ dɩ wɔnɔ yɩ Wɛ mʋ te-tɩ.
Balʋ na tusi tɩn, dɩ balʋ na sʋgɩ ba donnǝ pa ba cɔgɩ tɩn
maama wʋ DƖ jɩŋa nɩ mʋ.
17 DƖ maa kalɩ dɩdɛɛra dɩ cavɩɩra
DƖ ja viiri,
yɩ DƖ daarɩ DƖ paɩ balʋ na jɩgɩ taana ba di tɩn dɩ yirisi.
18 DƖ yǝni DƖ puri pwa yipwi o tiŋə,
pa ba gaɩ ba paarɩ dɩm,
yɩ DƖ daarɩ DƖ paɩ ba jiri gambɛ.
19 DƖ ta kalɩ kaanɩm tiinə
dɩ cavɩɩra DƖ ja viiri,
yɩ DƖ daarɩ DƖ paɩ nadunə
jiri nabwənə.
20 DƖ maa paɩ balʋ nɔɔna na jɩgɩ ba cɩga tɩn niə pui,
yɩ DƖ paɩ nakwa wʋbʋŋa vugimə.
21 DƖ paɩ nɔn-yum di ba cavɩɩra mʋ,
yɩ DƖ vrɩ nɔn-babɛ dam DƖ daarɩ-ba
DƖ zɩgɩ bwəri.
22 DƖ yǝni DƖ lɩ wǝǝnu tɩlʋ na səgi
lim wʋnɩ tɩn mʋ DƖ brɩ nɔɔna.
DƖ maa paɩ pooni nyɩ yi-bri je nɩ.
23 DƖ yǝni DƖ pa tɩɩnɩ dɩdonnǝ yɩrɩ zaŋɩ wɛɛnɩ,
yɩ DƖ daa ta cɔgɩ dɩdonnǝ dɩ.
DƖ maa na pɛ dɩ yalɩ dɩ kɩ kamunnu,
DƖ laan yǝni o jagɩ-dɩ mʋ
DƖ yagɩ je maama nɩ.
24 DƖ paɩ tɩga baŋa tɩɩnɩ dɩm
yuutiinə tʋŋɩ jwərim mʋ,
DƖ daarɩ DƖ pa ba kaagɩ kagʋa yuu nɩ
ba beeri yɔɔ yɩranɩ.
25 Ba kaagɩ ba taanɩ lim wʋnɩ mʋ
yɩ pooni tǝrǝ ba tee nɩ.
DƖ ta ma pa ba karɩ ba yuŋi
je maama,
nɩ sa-nyɔra na yǝni ba ve te tɩn.»