Tɩsofaarɩ na puli o ta kʋlʋ tɩn
11
Naama tu Tɩsofaarɩ dɩ ma ləri o wɩ:2 «Dɩ́ bá ləri nɔɔnʋ wʋm ta-fara yam kʋntʋ mʋ na?
O kamun-ŋwɛ dɩm brɩ nɩ
o jɩgɩ bʋra na?
3 Zobi, nmʋ bʋŋɩ nɩ bɩtar-yɔɔrʋ tɩlʋ
n na jɩgɩ n ŋɔɔnɩ tɩn
wʋ́ pa dɩ́ pu dɩ́ niə mʋ na?
Nɔɔn-nɔɔnʋ bá zaŋɩ o bwɛ‑m,
dɩ n na jɩgɩ nɔɔna n mwana te tɩn na?
4 N tagɩ nɩ: n taanɩ dɩm lana fasɩ mʋ,
yɩ n tɩtɩ dɩ kikiə tɔgɩ cwǝŋǝ Wɛ yigə nɩ.
5 Amʋ nan ya lagɩ sɩ Wɛ puri DƖ ni mʋ
DƖ ta taanɩ dɩ nmʋ.
6 DƖ yaá brɩ-m yi-pʋrʋ
kʋlʋ na səgi n tee nɩ tɩn.
Bɛŋwaanɩ swan yalʋ na yɩ cɩga cɩga tɩn
cwe sɩm yɩ yɩra yɩra mʋ.
Nan lwarɩ nɩ Wɛ wʋ waarɩ-m
sɩ kʋ maŋɩ dɩ n lwarɩm dɩm ni
na maɩ te tɩn.
7 Nmʋ wʋ́ wanɩ n yɛ sɩ n lwarɩ
Dam-fɔrɔ Tu Wɛ bʋbʋŋ-kalunnu tɩm na yɩ te tɩn na?
N ta wʋ́ wanɩ n lwarɩ
DƖ swan yam kweelim je
na wʋ mɛ tɩn na?
8 Ya diini wɛ-baŋa sɩ kʋ dwǝni
wɛyuu kʋm na yɩ te tɩn.
Nmʋ nan wʋ́ kɩ bɛɛ mʋ kʋ wʋnɩ?
Ya ta luunə sɩ kʋ dwǝni
curu na luunə te tɩn.
Nmʋ wʋ́ kɩ tɩta mʋ sɩ n lwarɩ-ya?
9 Wɛ wʋbʋŋa yam dwara
ya dwe tɩga baŋa kam ni dɩdwarɩm.
Ya ta maa yalma ya dwe
nɩnɩʋ kʋm na yɩ te tɩn.
10 DƖ nan na tu sɩ DƖ ja wʋlʋ DƖ pɩ,
naa sɩ DƖ saŋɩ wʋlʋ taanɩ dim baŋa nɩ,
wɔɔ mʋ wʋ́ wanɩ DƖ yigə o cɩ?
11 DƖ waɩ o lwarɩ balʋ na yɩ nɔn-yɔɔrʋ tɩn.
DƖ na nɛ lwarɩm kikiə,
DƖ bá maanɩ ya ni nɩ na?
12 Kagʋa wʋ bɩnaga wʋ́ wanɩ
ka lʋ nabiinu,
yɩ nɔn-joro ta wʋ wanɩ o ja swan.
13 Nan sɛ sɩ n kwe n bɩcarɩ maama n pa Wɛ,
sɩ n daarɩ n twɩ n jɩn
n jeeri-DƖ wɛ-loro baŋa nɩ.
14 N jɩn sɩm na tʋŋɩ lwarɩm,
sɩ n dʋlɩ-dɩ n yagɩ.
Ta yɩ pa kǝm-balwaarʋ cwǝŋǝ
sɩ ya taa zʋʋrɩ n sɔŋɔ nɩ.
15 Nmʋ na ləni n wʋbʋŋa kʋntʋ doŋ,
cavɩɩra daa bá ja‑m.
N ma n wʋ́ joori n kwǝni
n yuu wɛɛnɩ.
N ta wʋ́ taa zɩgɩ dɩ baarɩ
yɩ n ba kwarɩ fʋʋnɩ.
16 Nmʋ wʋ́ swe n yaara yam swiə.
Ya gulə maa wʋ́ je lɩla,
nɩ na na duri ba kɛ te tɩn.
17 Kʋntʋ wʋ́ pa n ŋwɩa taa nyɩɩnɩ
nɩ wɩa tɩtarɩ pooni na yɩ te tɩn.
Lim na tu dɩ kwǝli‑m,
dɩ wʋ́ pipiri dɩ ji tɩ-pʋra.
18 Nmʋ wʋ́ ta n jɩgɩ baarɩ,
n tɩɩna na wʋ́ taa daga tɩn ŋwaanɩ.
Kʋlʋkʋlʋ bá daanɩ‑m.
N ma n wʋ́ sin yɩ liǝ tǝrǝ.
19 Nmʋ wʋ́ ta n tigi n sara nɩ mʋ,
yɩ nɔɔn-nɔɔnʋ tǝrǝ
o na wʋ́ pa fʋʋnɩ ja‑m.
Nɔɔna zanzan nan wʋ́ ja n naga
sɩ n wǝli-ba mʋ.
20 Kʋ nan na yɩ nɔn-balwaarʋ tɩm,
ba yiǝ wʋ́ dwe mʋ
yɩ ba bá na cwǝŋǝ sɩ ba lu.
Ba tɩɩna maa wʋ́ taa wʋ tʋʋnɩ wʋnɩ sɩ dɩ ja-ba.»