Zobi ta ma ta o wɩ:
10
«Amʋ culi ŋwɩa kalʋa na jɩgɩ a ŋwɩ tɩn.
Kʋntʋ ŋwaanɩ mʋ a wʋ́ taa pʋʋna jaja,
yɩ a yɔɔrɩ a tɛ kʋlʋ na daanɩ-nɩ tɩn.
2 A nan wʋ́ ta dɩ Wɛ mʋ nɩ:
Yɩ di bʋra n vanɩ-nɩ lɩla!
Nan ta n brɩ-nɩ sɩ a lwarɩ
a na kɩ kʋlʋ a cɔgɩ
pa taanɩ wʋra dɩbam laŋa nɩ tɩn.
3 A yɩ wʋlʋ n tɩtɩ jɩn na mɔɔnɩ tɩn mʋ.
N wʋʋ nan tigi
dɩ n na jɩgɩ-nɩ n bɛɛsa
yɩ n ta dʋlɩ-nɩ n yagɩ te tɩn mʋ na?
Kʋ nan na yɩ nɔn-balwaarʋ tɩm,
n yi yǝni dɩ su ba tɩtʋŋa yam mʋ.
4 N yǝni n nii n naɩ wǝǝnu
nɩ nabiinǝ na naɩ-tɩ te tɩn mʋ na?
5 Nmʋ ŋwɩa dɩ yɩ nɩ nabiinǝ ŋwɩa
na yɩ te,
pa ka ba daana yɩ ka ti tɩn mʋ na?
6 Kʋntʋ ma pa n beeri je maama nɩ
sɩ n na a na cɔgɩ mɛ seeni,
yɩ n lwarɩ a lwarɩm dɩm maama
na yɩ te tɩn.
7 Nmʋ nan ye nɩ a jɩgɩ bʋra.
Nɔɔn-nɔɔnʋ nan tǝrǝ
o na wʋ́ wanɩ o joŋi-nɩ
o yagɩ nmʋ jɩŋa nɩ.
8 Nmʋ tɩtɩ mʋ mɛ n jɩn
n fɔgɩ n naanɩ-nɩ.
N daa wʋ́ pipiri sɩ n ja-nɩ
n cɔgɩ mʋ na?
9 Guli nɩ n naanɩ-nɩ nɩ dɔgɔ mʋ te.
Nmʋ nan lagɩ n pa a joori
a ji tɩɩrʋ mʋ na?
10 Nmʋ mʋ wʋ pɛ amʋ cirimi a nu wʋnɩ
nɩ nayɩla na cirimi tɩte tɩ na?
Nmʋ mʋ wʋ pɛ amʋ dɔ nɩnɛɛnɩ nayɩl-nugə tɩte na?
11 Nmʋ laan ma n kwe ya-tana
dɩ ya-nwana n daŋɩ da,
yɩ n pa ŋwannʋ dɩ kwi
toŋi daanɩ a yɩra yam nɩ.
12 Kʋntʋ baŋa nɩ mʋ n pɛ a na ŋwɩa,
yɩ n ta duri a yibwənə.
N ma n yɔɔrɩ n yɩrɩ-nɩ
sɩ a ŋwɩa kɩ dam.
13 Amʋ laan tu a lwarɩ kʋlʋ nmʋ ya na səgi n wʋbʋŋa nɩ tɩn.
N na jaanɩ wʋbʋŋa sɩ n kɩ-nɩ
te tɩn mʋ tɩntʋ:
14 Nmʋ bʋŋɩ sɩ n yɔɔrɩ n nii amʋ,
sɩ a na cɔgɩ, sɩ n yaarɩ-nɩ
a lwarɩm dɩm ŋwaanɩ.
15 A na tʋŋɩ wo-balɔrɔ tɩtʋŋɩ,
lɛɛrʋ lagɩ tɩ yi-nɩ!
A na wʋ kɩ a cɔgɩ mʋ dɩ,
wʋ-cɔgɔ dɩ cavɩɩra
ta wʋ́ ja-nɩ,
dɩ cam dɩlʋ maama
na daanɩ-nɩ tɩn.
16 A nan na kwaanɩ sɩ a joori a zaŋɩ,
nmʋ yɔɔrɩ n zəli-nɩ mʋ sɩ n ja,
nɩ nyoŋo na zəli varɩm
sɩ kʋ ja kʋ di te tɩn.
Kʋntʋ doŋ mʋ n kɩ wo-kɩnkagɩla
n ma n cɔge-nɩ.
17 N yǝni n pa yaara tui
ya cɔgɩ a yigə,
yɩ n banɩ fɔgɩ dɩ zaŋa a baŋa nɩ.
Kʋ nyɩ nɩ n tʋŋɩ jar-kərə mʋ
sɩ ba taa jeeri-nɩ dɩ najara taan taan.
18 Bɛŋwaanɩ mʋ n pɛ cwǝŋǝ
sɩ a nu lʋ-nɩ?
A ya na tɩgɩ lɩla yɩ nɔɔn-nɔɔnʋ wʋ nɛ-nɩ,
kʋntʋ ya brɩ kʋ gara.
19 Amʋ ya na maŋɩ a wʋ nɛ ŋwɩa mʋ,
naa ba na jaanɩ-nɩ a lʋra dɛ nɩ
ba yɔɔrɩ yibeelǝ ba kɩ,
kʋntʋ gara.
20 A ŋwɩa da yam daa ba daga.
A loori-m, yagɩ a yɩra sɩ a wanɩ
a sin fɩnfɩɩn dɩ wʋpolo,
21 yɩ a laan daarɩ a vu
mɛ na yɩ lim yɩranɩ tɩn
sɩ a daa yɩ joori.
22 Lim maa kwǝli je sɩm kʋntʋ liirǝ liirǝ.
Vuvugə dɩ lim-nyɔrɩsɩ maa wʋra bɩramm.
Dáanɩ mʋ wɩa pooni
yɩ lim yɩranɩ.»