Zobi na ləri te tɩn
9
Zobi ma ləri o wɩ:2 «Cɩga ŋwaanɩ tɩn,
nmʋ na tagɩ kʋlʋ tɩn
ba jɩgɩ digiru.
Nabiinu nan wʋ́ kɩ tɩta mʋ
sɩ o na cɩga Wɛ yigə nɩ?a
3 Nabiinu na bʋŋɩ sɩ o saŋɩ Wɛ,
Wɛ wʋ́ wanɩ DƖ bwe‑o
kuni mʋrʋ mʋ,
sɩ kʋ tu yɩ wanɩ o lǝri-DƖ
kuni dɩdʋa tɩtɩ dɩ.
4 Dɩntʋ swan yam mʋ gaalɩ,
yɩ DƖ dam dɩm ba tiə!
Wɔɔ mʋ wʋ́ wanɩ o dwəni dɩ Wɛ
yɩ o bá tʋ?
5 Wɛ yǝni DƖ da DƖ guri pweeru!
DƖ ma daarɩ DƖ tɔgɩ DƖ banɩ baŋa nɩ
DƖ vuvugi-tɩ DƖ dʋlɩ DƖ yagɩ.
6 DƖ ta waɩ DƖ sisiŋi tɩga kam baŋa maama
pa ka na cwi mɛ tɩn dɩ bibigi.
7 DƖ wʋ́ bagɩ wapuli dɩm
pa ka daa ba nyɩ,
yɩ DƖ ta pa calɩcwɩ sɩm
yɩ taa nyɩ sɩ paɩ pooni.
8 Wɛ yɩranɩ nan ta mʋ lwarɩ wɛyuu kʋm
pa kʋ tigi palalala.
DƖ ta maa nɔnɩ nɩnɩʋ na-ŋʋnɩ sɩm baŋa nɩ DƖ veǝ.b
9 DƖ ma kɩ calɩcwɩ sɩm yɩra yɩra
DƖ tigisi wɛyuu kʋm nɩ.c
DƖ ta ma pa tɩga-kuri seeni calɩcwɩ sɩm wʋra.
10 DƖ ta tʋŋɩ wo-kamunnu tɩlʋ
dɩ́ na ba ni tɩ kuri tɩn,
dɩ wo-kɩnkagɩla yalʋ dɩ́ na warɩ
ya ni dɩ́ ga dɩ́ ti tɩn mʋ.
11 Wɛ tɔgɩ a je seeni mʋ DƖ veǝ
yɩ a ta ba na‑DƖ.
DƖ na maa kɛ tɩn, amʋ wʋ lwarɩ nɩ
Dɩntʋ mʋ maa kɛa.
12 Wɔɔ mʋ nan yi sɩ o joori o ja
kʋlʋ Wɛ na jaanɩ DƖ gɔ tɩn o ja o ba?
Wɔɔ nan mʋ jɩgɩ cwǝŋǝ
sɩ o bwe‑DƖ wɩ:
‹Bɛɛ mʋ n wʋra n kɩ?›
13 Wɛ banɩ na zaŋɩ, dɩ ba gwiə.
Nɩnɩʋ wʋ juru Rahabɩ dɩ kʋ kwaga kɔgɔ kʋm maama mʋ
DƖ cɩcʋgɩ DƖ nɛ kuri nɩ.d
14 Kʋntʋ tɩn, amʋ nan wʋ́ wanɩ
a ləri Wɛ taanɩ dɩm na?
Amʋ lagɩ a kuri bɩtarɩ biə tɩta mʋ sɩ a lǝri-DƖ?
15 Amʋ na maŋɩ a jɩgɩ bʋra
te maama dɩ,
a bá joori a ləri DƖ taanɩ dɩm.
Amʋ na jɩgɩ kʋlʋ yɩranɩ sɩ a wanɩ a kɩ tɩn maa yɩ
sɩ a loori yibwənə DƖ tee nɩ,
DƖ na yɩ dɩlʋ na di a taanɩ tɩn ŋwaanɩ.e
16 Amʋ na waɩ Wɛ a saŋɩ mʋ,
yɩ DƖ na sɛ sɩ DƖ jeeri dɩ,
a ba bʋŋɩ nɩ
DƖ wʋ́ cəgi taanɩ dɩlʋ
a na jɩgɩ a saŋɩ-DƖ dɩ baŋa nɩ tɩn.
17 DƖ nan wʋ́ kwe vu-fɔrɔ DƖ ma
DƖ magɩ-nɩ DƖ cɩcʋgɩ,
yɩ DƖ pa a fufwələ yam
dɩ puli kafɛ ŋwaanɩ.
18 Sɩ a taa tɛ nɩ a daa waɩ a sin
a yi a tɩtɩ tɩn,
dɩ DƖ daa pɛ a yigə tiini ka nywanɩ.
19 Kʋ na yɩ dam taanɩ mʋ dɩ́ tɛa,
Wɛ dam ba tiə.
Kʋ nan na yɩ ka-di-bʋra taanɩ mʋ,
wɔɔ mʋ wʋ́ wanɩ o saŋɩ Wɛ?
20 Amʋ na maŋɩ a jɩgɩ cɩga
te maama dɩ,
a ni-taanɩ mʋ lagɩ dɩ pa
sɩ a tʋ bʋra dim baŋa nɩ.
A nan na ba jɩgɩ tusim dɩ,
a ni bɩtarbiǝ wʋ́ dɩ-nɩ tɩga nɩ.
21 Amʋ sɩɩnɩ a wʋ cɔgɩ DƖ yigə nɩ.
A yigə nan tǝrǝ dɩ kʋlʋ
na wʋ́ yi-nɩ tɩn.
A ŋwɩa kam yɩ wo-yɔɔ mʋ
kʋ pa-nɩ.
22 Cwe sɩm maama ba garɩ daanɩ.
Mʋ amʋ na tɛ te tɩn.
Kʋ na yɩ balʋ na yɔɔrɩ cwǝŋǝ tɩn,
dɩ nɔn-balwaarʋ tɩm,
Wɛ ba pɔɔrɩ-ba daanɩ
dɩ DƖ na cɔgɩ-ba te tɩn.
23 Lɛɛrʋ na yi nɔɔna pa ba da ba tɩ,
Wɛ je DƖ nii balʋ na jɩgɩ cɩga tɩn mʋ yɩ DƖ mwanɩ-ba.
24 Nɔn-balwaarʋ mʋ vrɩ tɩga baŋa
ba jɩgɩ ba te.
Wɛ laan ma yǝni DƖ kwǝli balʋ
na jɩgɩ taana ba di tɩn yiǝ
pa ba kwɩɩlɩ cɩga kam.
Kʋ na daɩ Wɛ mʋ kɩ kʋntʋ,
wɔɔ mʋ kɩa?
25 Amʋ ŋwɩa da yam wʋra ya ti mʋ lɩla,
nɩ nɔɔnʋ na duri lɩla lɩla te tɩn.
Ya maa kɩ lɩla ya je
yɩ wʋpolo tǝrǝ a tee nɩ.
26 Dɛ maama duri dɩ kɛ mʋ,
nɩ ba na yɛ nabwǝǝru na wʋnɩ
ba ve te tɩn.
Ya maa wuurǝ ya tiə,
nɩ maarʋ na fʋʋrɩ te tɩ cʋɩ
sɩ tɩ ja tɩ ni-wʋdiu tɩn.
27 Amʋ nan na bʋŋɩ a tɩtɩɩ nɩ a wɩ:
‹Yagɩ sɩ a swe a cam dɩm swiə,
sɩ a pa a yi-nywana ləri ya ji wʋpolo,›
28 a yaara yam daa ta pa-nɩ fʋʋnɩ mʋ,
bɛŋwaanɩ amʋ ye nɩ n bá ta wɩ:
a jɩgɩ bʋra.
29 Wʋlʋ na tʋ o tigi tɩga nɩ tɩn
daa ba kwarɩ ba dɩ wɔ.
Bɛŋwaanɩ mʋ a daa wʋ́ pa
kʋ cɛ a yɩra kafɛ ŋwaanɩ?
30 A na maŋɩ a kwe canfɩm dɩ sɩan
sɩ a ma a swɛ a yɩra yɩ a sanɩ a jɩn,
31 n ta wʋ́ kwe-nɩ mʋ
n dɩ goŋo kʋlʋ na su dɩ digiru tɩn wʋnɩ.
A yɩra digiru tɩm wʋ́ pa a tɩtɩ yɩra gwaarʋ tɩm cɛɛsɩ-nɩ mʋ.
32 Wɛ nan daɩ nabiinu
nɩ amʋ tɩtɩ na yɩ te tɩn.
Tɩntʋ amʋ dɩ Dɩntʋ ya diini
daa baŋa
sɩ dɩ́ ŋɔɔnɩ dɩ́ ləri dɩ́ pa daanɩ.
33 Nɔɔn-nɔɔnʋ tǝrǝ o na wʋ́ wanɩ o zʋ
amʋ dɩ Wɛ taanɩ dɩm wʋnɩ,
sɩ o tɔgɩ o dam ŋwaanɩ
o di sarɩya dɩbam laŋa nɩ.
34 Kʋ tu yaá wanɩ o pa
Wɛ dwanɩ DƖ jɩn DƖ daarɩ-nɩ,
sɩ DƖ daa yɩ yaarɩ-nɩ,
naa DƖ fugi-nɩ dɩ DƖ cana yam.
35 Amʋ yaá na cwǝŋǝ
sɩ a ŋɔɔnɩ jaja yɩ fʋʋnɩ tǝrǝ.
Kʋ nan na yɩ te tɩn,
a bá wanɩ kʋntʋ a kɩ.»