Bilidadɩ na sɩŋɩ o ta kʋlʋ tɩn
8
Suha tu Bilidadɩ ma ləri o wɩ:2 «Nmʋ brɩ n lagɩ n ŋɔɔnɩ
taana yantʋ
n vu n maŋɩ yən nɩ mʋ?
Nmʋ ni bɩtarɩ sɩm nyɩ dɩ viu
na fufugi te tɩn mʋ.
3 Dam-fɔrɔ Tu Wɛ dɩm wʋ́ sɛ
DƖ ja cɩga kam DƖ ju na?
Wɛ wʋ́ wanɩ DƖ kwɩɩlɩ cɩga kam
DƖ sɩn tɩga nɩ na?
4 Nmʋ biə bam na kɩ ba cɔgɩ DƖ yigə tɩn,
kʋntʋ ŋwaanɩ mʋ DƖ pɛ ba na ba lwarɩm dɩm ŋwɩɩrʋ.
5 Nan ja n tɩtɩ n kwǝni n nii
Dam-fɔrɔ Tu Wɛ dɩm,
sɩ n daarɩ n magɩ a japoori a loori DƖ yigə nɩ
sɩ DƖ duri n ŋwaŋa.
6 Nmʋ na kɩ kʋntʋ,
yɩ n na yɔɔrɩ n kɩ n tɔgɩ cwǝŋǝ,
Wɛ wʋ́ zaŋɩ sɩ DƖ jaŋɩ DƖ pa‑m,
yɩ DƖ pa n sɔŋɔ kʋm joori
kʋ zɩgɩ dɩ cɩga.
7 Nmʋ jwa wʋ́ ba n duni zanzan,
sɩ kʋ dwǝni n faŋa kam na yɩ te tɩn.
8 Bʋŋɩ n nii kʋ na yɩ te
faŋa kam nɩ tɩn,
sɩ n lwarɩ swan yalʋ
dɩ́ nabaara dɛɛn na nɛ tɩn.
9 Dɩbam ŋwɩa yɩ kukugə mʋ
yɩ dɩ́ yǝri kʋlʋkʋlʋ.
Dɩ́ ŋwɩa da yam ba daanɩ yɩ ya jeə,
nɩ lunluŋu na yɩ te tɩn.
10 Kʋ nan na yɩ faŋa tiinə bam,
bantʋ wʋ́ wanɩ ba brɩ-m yǝno,
yɩ ba ta taana kʋ nuŋi
ba yi-pʋrʋ wʋnɩ.
11 Kʋ na daɩ bolo tɩga nɩ
mɛ na na wʋra tɩn,
sangɛ ba zaŋa sɩ kɩ dɩdwaarʋ,
nancan-gullu dɩ nan ba fɔgɩ
tɩ bra.
12 Na na tǝrǝ, tɩ wʋ́ kwaarɩ lɩla mʋ
yɩ tɩ ta wʋ bɩgɩ,
sɩ kʋ dwǝni ga-lɛɛrʋ na wʋ́ kwaarɩ te tɩn.
13 Wʋlʋ maama na swe Wɛ swiə tɩn
wʋ́ guri kʋntʋ mʋ,
pa o tɩɩna yam ti,
o na vɩn Wɛ cwǝŋǝ tɔgɩm tɩn ŋwaanɩ.
14 Kʋ tu na kwe o tɩɩna o daŋɩ mɛ tɩn tiini kʋ bwǝnǝ,
nɩ o na bʋŋɩ sɩ o salɩ
didoŋkogo pogo yɩra nɩ te tɩn mʋ.
15 O na salɩ o sɔŋɔ kʋm yɩra nɩ,
kʋʋ́ tʋ kʋ daarɩ‑o mʋ.
O maa na ze o jɩjɩgɩrʋ,
tɩ wʋ́ je lɩla.
16 Balʋ na vɩn Wɛ tɩn nyɩ dɩ ga-lɛɛrʋ
tɩlʋ na nɛ na zanzan
yɩ wɩa nyɩ tɩ baŋa nɩ tɩn mʋ.
Tɩ ma bɩ lanyɩranɩ
yɩ tɩ jagɩ tɩ yi gaarɩ dɩm ni maama.
17 Tɩ bʋnnʋ ma zʋ kandwa-pɩsɩɩnɩ
tɩ milimi-ya,
pa tɩ na kugu je ya tɩtarɩ nɩ.
18 Ba nan na vaŋɩ-tɩ tɩ kuru seeni
ba gɔ ba yagɩ,
jǝgǝ kam kʋntʋ wʋ́ vɩ-tɩ mʋ
yɩ ka ta dɩ-tɩ nɩ:
ka ya maŋɩ ka wʋ fɔgɩ ka lwarɩ-tɩ.
19 Gaarʋ tɩm kʋntʋ maa wʋ́ kʋ tɩ tɩ,
sɩ gaarʋ tɩdonnǝ dɩ daa puli tɩga kam kʋntʋ nɩ.
20 Wɛ bá fɔgɩ DƖ vɩn cɩga tu wʋlʋ
na ba jɩgɩ tusim tɩn.
DƖ nan bá ja nɔn-balɔrɔ jɩŋa
sɩ DƖ zən‑o.
21 DƖ daa wʋ́ pa n ni su dɩ mwaanʋ,
sɩ n di ywəəni
yɩ n bagɩ wʋpolo sɔɔ.
22 Kʋ nan na yɩ balʋ na culi‑m tɩn,
cavɩɩra mʋ lagɩ ya di-ba.
Nɔn-balwaarʋ sam dɩm dɩ wʋ́ tʋ
dɩ saarɩ.»