Zobi ta ma ta o wɩ:
7
«Nabiinu yǝni o tʋŋɩ tɩtʋŋ-cɛɛra mʋo lʋgʋ baŋa ŋwɩa maama wʋnɩ.
O yɩra ma cɛ dɛ maama wʋnɩ,
nɩnɛɛnɩ ba na jɩnɩ nɔɔnʋ wʋlʋ
sɩ o taa tʋŋɩ tɩn.
2 Gambaa yɔɔrɩ o tɩɩna
sɩ wɛ dɩm guni yɩ tɩga yi.
Tɩntʋŋnʋ dɩ maa je o tɩɩna
sɩ o joŋi o ŋwɩɩrʋ.
3 Kʋntʋ mʋ amʋ dɩ tʋŋɩ kafɛ ŋwaanɩ cana maama wʋnɩ.
Ŋwɩɩrʋ tɩlʋ a na yǝni a joŋi tɩn
yɩ wʋ-cɔgɔ yɩranɩ mʋ
tɩtɩɩ maama nɩ.
4 Tɩtɩɩ nɩ a tigi a sara nɩ
yɩ a bʋŋɩ mʋ a wɩ:
‹Tɩga wʋ́ pʋʋrɩ lɩla sɩ a zaŋɩ na?›
Tɩga dɩ ma vɩn sɩ ka pʋʋrɩ,
pa a tigi a sara kam nɩ
a pipirǝ taan.
5 Amʋ yɩra maama nuŋi kanzwa mʋ,
yɩ ya su dɩ ŋwana yalʋ na kuuri tɩn.
Mwana dɩ maa nuŋǝ.
6 Amʋ ŋwɩa da yam wʋra ya ti mʋ lɩla,
nɩ garyi dʋlɩnʋ na dʋlɩ
o garyi te lɩla lɩla tɩn.
Ya maa wʋ́ yi ya kweelim je
yɩ tɩɩna tǝrǝ ya pa-nɩ.
7 Amʋ Tu Wɛ, popo guli
amʋ ŋwɩa kam gulə
nɩ ka na lagɩ ka je lɩla
nɩ viu te tɩn.
Amʋ maa da bá fɔgɩ a na
ŋwɩa ywəəni.
8 Cɩga tɩn, yiǝ yalʋ zɩm na naɩ amʋ tɩn daa bá na-nɩ.
Nmʋ tɩtɩ dɩ wʋ́ beeri amʋ je n ga mʋ,
a na tǝrǝ tɩn ŋwaanɩ.
9 Kʋ nyɩ dɩ kunkoŋo na wʋra
pa kʋ da kʋ jagɩ kʋ je te tɩn mʋ.
Wʋlʋ maama na tɩga yɩ o zʋ tɩga kuri,
kʋ tu daa bá joori tɩga baŋa.
10 O daa bá wanɩ o sɔŋɔ sɩ o joori.
Nɔɔna ma swe o ni nɩ,
nɩnɛɛnɩ o ya ga maŋɩ o tǝrǝ mʋ tɩn.
11 Kʋntʋ ŋwaanɩ nan mʋ pɛ
a bá taa cɩm.
Amʋ nan wʋ́ tʋlɩ a yaara yam taanɩ jaja,
a bɩcarɩ na tiini dɩ di tɩn ŋwaanɩ.
A maa wʋ́ magɩ a japoori a loori Wɛ yigə nɩ,
a banɩ na wɔɛ tɩn ŋwaanɩ.a
12 Bɛɛ mʋ kɩ yɩ n yɔɔrɩ n yɩrɩ-nɩ kʋntʋ sɩ a yɩ lu?
Nmʋ paɩ amʋ yɩ nɩnɩʋ tɩtɩ mʋ
naa kʋ wʋʋ jur-kamunu mʋ,
pa n yɔɔrɩ n pɩ-nɩ kʋntʋ doŋ?
13 Amʋ nan yǝni a tɩɩna nɩ:
a na zʋ sɩ a pəni a sara nɩ,
kʋʋ́ garɩ kʋ pa-nɩ.
14 Nmʋ nan yǝni n kwe dɩndwɛ-balwaarʋ mʋ n ma n fugi-nɩ,
yɩ n daarɩ n lɩ wǝǝnu tɩlʋ
na jɩgɩ fʋʋnɩ tɩn n brɩ-nɩ.
15 Kʋntʋ ŋwaanɩ mʋ a bʋŋɩ nɩ:
nɔɔnʋ na tu o pɩɩnɩ a mʋmwa sɩ a tɩ,
kʋ garɩ a ta na jɩgɩ ŋwɩa kantʋ doŋ a ŋwɩ.
16 A ŋwɩa kam yɩ wo-yɔɔ mʋ
amʋ tee nɩ.
A ba lagɩ sɩ a taa ŋwɩ maŋa maama.
Nan dwanɩ n jɩŋa a baŋa nɩ,
sɩ a ŋwɩa kam daa ba jɩgɩ kuri
ka pa-nɩ.
17 Nabiinǝ brɩ ba yɩ bɛɛ mʋ
pa n yigə wʋ ba wʋnɩ?
Bɛɛ mʋ yɩ n yɔɔrɩ n nii
ba kikiə yam kʋntʋ?
18 Tɩtɩɩtɩ maama nɩ,
nmʋ yǝni n maanɩ
ba na jɩgɩ kʋlʋ ba kɩ tɩn mʋ.
Ba ŋwɩa maŋa maama wʋnɩ
n ma n jɩgɩ-ba n maŋɩ n niə.
19 N nan bá dwanɩ n yiǝ n daarɩ-nɩ
maŋa fɩnfɩɩn wʋnɩ dɩ na?
N brɩ n bá pa-nɩ pwələ
sɩ a fin a mʋmwa dɩ?
20 Nmʋ wʋlʋ na yɩrɩ nabiinǝ tɩn,
amʋ na maŋɩ a kɩ lwarɩm mʋ dɩ,
kʋntʋ lagɩ kʋ kɩ-m bɛɛ mʋ?
Bɛŋwaanɩ mʋ n yɔɔrɩ n jeeri amʋ
sɩ n zɔ-nɩ kʋntʋ?
Amʋ nan jigi zɩlɩ-zanɩ dɩlʋ
na daanɩ‑m tɩn mʋ na?
21 A na sɩɩnɩ a cɔgɩ, bɛɛ mʋ kɩ
pa nmʋ warɩ a lwarɩm dɩm
sɩ n yagɩ n ma n cɛ-nɩ?
Kʋ nan bá daanɩ sɩ a tɩ
yɩ a daarɩ a zʋ tɩga.
Nmʋ ma n wʋ́ yɔɔrɩ n beeri a je
n ga, a na tǝrǝ tɩn ŋwaanɩ.»