Zobi daa na ləri te tɩn
6
Zobi ma ləri o wɩ:2 «Kʋ na yɩ amʋ ban-zɔŋɔ kʋm,
dɩ a wʋ-cɔgɔ kʋm,
ba ya na waɩ-tɩ ba kwe
ba maŋɩ tɩ duuni,
3 tɩ yaá dwǝni nɩnɩʋ ni kasʋlʋ kʋm maama na maɩ te tɩn.
Kʋntʋ ŋwaanɩ mʋ nan pɛ
a lɔgɩrɩ a ŋɔɔnɩ yɔɔ yɔɔ.
4 Dam-fɔrɔ Tu Wɛ dɩm mʋ kwe
cɩna DƖ zɔ-nɩ,
pa ya vɩan kam yɔɔrɩ
ka zʋʋrɩ a yɩra.
Wɛ jeeri amʋ mʋ dɩ DƖ can-nɛɛra yam pa ya fugi-nɩ.
5 Kʋ na yɩ bɩnɛ sɩlʋ na warɩ sɩ ja tɩn,
sɩ na nɛ ga-lɛɛrʋ sɩ sɩ di,
sɩ ta wʋ́ taa kaagɩ sɩ keeri mʋ na?
Naanɩ dɩ na nɛ wʋdiu,
dɩ wʋ́ taa yɩ cɩmm mʋ.
6 Wʋdiu kʋlʋ na ba jɩgɩ yɛ tɩn
zʋʋrɩ ni na?
Cɩcarɩ napoŋo je sɩm ywəəni
nan wʋ yən nɩ mʋ?
7 Wʋdiu na yɩ kʋntʋ doŋ
a warɩ-kʋ sɩ a di.
Kʋ yɔɔrɩ kʋ lwe a mʋmwa nɩ mʋ.
8 Kʋ ya na waɩ sɩ Wɛ kɩ amʋ na loori‑DƖ kʋlʋ tɩn DƖ pa-nɩ na!
Kʋntʋ mʋ yaá pa a na je
a tɩɩnɩ kʋlʋ tɩn sɩɩnɩ kʋ kɩ.
9 DƖ ya na sɛ sɩ DƖ yɔɔrɩ DƖ mɩɩrɩ-nɩ,
pa a ŋwɩa guri, kʋ gara.
10 Kʋntʋ mʋ yaá pa a wʋʋ taa tigə.
A yaá di ywəəni,
dɩ a na maŋɩ a na zʋnnɩ zanzan
a yɩra nɩ te maama dɩ.
Bɛŋwaanɩ, a cam dɩm maama wʋnɩ,
a wʋ vɩn Wʋ-poŋo Tu
Wɛ dɩm ni maŋa dɩ maŋa!
11 Amʋ dam daa wʋ yən nɩ mʋ,
sɩ a ta taa jɩgɩ tɩɩna?
Bɛ nyɔɔrɩ daa mʋ wʋra sɩ amʋ na,
pa kʋ maŋɩ sɩ a taa pɩɩna
a banɩ tɩn?
12 Amʋ brɩ a jɩgɩ piu dam doŋ mʋ na?
A yɩra yam nan yɩ canna mʋ
ba mɛ ba kɩ-ya na?
13 A dam ti yɩ a daa warɩ a tɩtɩ
sɩ a joŋi a yagɩ.
A ya na tɩɩgɩ mɛ maama tɩn
kɛ kʋ daarɩ-nɩ.
14 Nɔɔnʋ tɩɩna na ti,
o badonnǝ ta maŋɩ
sɩ ba ta taa soe‑o mʋ,
dɩ o na maŋɩ o yagɩ
Dam-fɔrɔ Tu Wɛ fʋʋn-kɔrɔ kʋm dɩ.
15 Amʋ yuudonnə bam bɩcwaanʋ
nan baŋwɛ zanzan.
Ba nyɩ dɩ nabarɩ sɩlʋ
na ba daanɩ sɩ wɩ tɩn mʋ.
Sɩ wʋ́ su sɩ pɛɛlɩ
yɩ sɩ na bam laan duri ba kɛ.
16 Yadɛ nɩ sɩ maa yǝni sɩ su,
yɩ kunu dɩ kwǝli-sɩ.
17 Sɩ na bam nan wɩ mʋ tɩ-pwəŋə nɩ.
Fʋnyʋgʋ maŋa nɩ sɩ bu-tʋlɩ sɩm dɩ maa ga na.
18 Pipimpiinə na kaagɩ kagʋa yuu nɩ
ba ve tɩn mʋ wʋ́ ywəri
ba cwǝŋǝ kam nɩ sɩ ba beeri na.
Ba maa beeri na bam ba ga
yɩ ba je kagʋa kam wʋnɩ.
19 Tema tɩʋ pipiu tiinə bam kaagɩ
ba beeri na mʋ.
Seba tɩʋ cwə-vələ bam
dɩ jɩgɩ na tɩɩna mʋ.
20 Ba wʋbʋŋa ya jaanɩ nɩ
baá na na mʋ.
Cwə-vələ bam nan gɛ tɩɩna mʋ
maŋa kalʋ ba na tu ba ba ba yi tɩn.
21 Nan nii-na!
Abam dɩ maŋɩ á ba sin zʋrɩ.
Á na yɔɔrɩ á na cam dɩlʋ
na yi amʋ tɩn,
mʋ fʋʋnɩ tiini dɩ ja abam.
22 Amʋ nan wʋ fɔgɩ a ta dɩ abam nɩ:
‹Kwe-na woŋo á pa-nɩ,
sɩ á lɩ á jɩjɩgɩrʋ wʋnɩ á ma
á tiŋi daarɩ amʋ ŋwaanɩ.›
23 A ta wʋ tagɩ a wɩ: á joŋi-nɩ-na
á yagɩ a dʋna jɩŋa nɩ,
naa á ŋwɩ-na səbu sɩ á vrɩ-nɩ
á ja á nuŋi nɔn-balwaarʋ jɩŋa nɩ.
24 Nan ta-na á brɩ-nɩ
mɛ seeni a na cɔgɩ tɩn,
sɩ a pu a ni yɩ a daa bá ta taanɩ.
25 Bɩtarɩ sɩlʋ na yɩ cɩga tɩn ba wɔɛ nɔɔn-nɔɔnʋ yɩra,
kʋ daarɩ abam coom dɩm nan maa brɩ kɔɔ tɩtɩ mʋ?
26 Á bʋŋɩ sɩ á yaalɩ-nɩ a ni-taanɩ dɩm ŋwaanɩ mʋ na?
Amʋ tɩɩna maama je mʋ,
yɩ á gooni amʋ ni-taanɩ nɩ
kʋ yɩ viu yɩranɩ.
27 Cɩga tɩn, abam wʋ́ wanɩ á ta jɔrɔ
sɩ á ma á yəgi bɩtarʋ.
Á ta wʋ́ kwe á badonnǝ á pa
sɩ á ma-ba á joŋi wo-gɛ.
28 Nan pipiri-na á nii amʋ seeni!
Bɛŋwaanɩ, amʋ bá ganɩ abam.
29 Yagɩ-na á bwɛa yam!
Yɩ kweeli-na a cɩga kam
á sɩn tɩga nɩ.
Kʋ nan maŋɩ sɩ a na a bʋra mʋ.
30 Vwan mʋ a jɩgɩ a fɔɩ na?
Lɛɛrʋ yi-nɩ yɩ a wʋ wanɩ-tɩ a lwarɩ na?»