Elifaazɩ ta ma ta dɩ Zobi o wɩ:
5
«Coosi n bəŋi n niinɔɔnʋ wʋ́ ba na?
Malɛsɩ sɩm wʋnɩ wɔɔ mʋ wʋ́ ba
o wəli‑m?
2 Ban-zɔŋɔ gʋɩ jwəəru mʋ lɩla,
yɩ kazwɩ dɩ cɔgɩ nayəri-nyɩna.
3 Amʋ yi nɛ jwəəru kugu
na jaanɩ tɩga lanyɩranɩ,
yɩ lɛɛrʋ laan yi-ba lɩla,
dɩ ba sɔŋɔ kʋm maama.
4 Ba biə daa ba jɩgɩ woro
sɩ ba jǝni kʋ kuri nɩ.
Ba maa wʋ́ vanɩ bantʋ bʋra,
yɩ nɔɔn-nɔɔnʋ tǝrǝ o na wʋ́ zɩgɩ ba kwaga nɩ.
5 Kana na jɩgɩ balʋ tɩn laan wʋ́ di
bantʋ kara wʋdiiru faa ni nɩ mʋ,
kʋ na maŋɩ kʋ yɩ tɩlʋ na cɩgɩ
sabarɩ wʋnɩ tɩn dɩ.
Na-nyɔm na jɩgɩ balʋ tɩn fra
wʋ́ zʋ ba jɩjɩgɩrʋ tɩm.
6 Bɛŋwaanɩ, cam ba kɩ tɩga nɩ,
nɩnɛɛnɩ wʋdiiru na kɩ tɩga nɩ te tɩn.
Yaara dɩ nan ba taɩ
ya nuŋi tɩga kam nɩ.
7 Dɩ kʋ dɩ, ba lʋrɩ nabiinǝ
ba dɩ cam wʋnɩ mʋ,
nɩ min-cɩnnʋ na zaŋɩ
kʋ jaanɩ wɛɛnɩ te tɩn.
8 Kʋ ya na yɩ amʋ mʋ tɩntʋ,
a wʋ́ ja Wɛ təŋə mʋ,
yɩ a kwe a taanɩ dɩm
a tiŋi DƖ yigə nɩ.
9 DƖ yǝni DƖ kɩ wo-kamunə
yɩ dɩ́ ba ni ya kurə dɩ́ tiə.
Dɩ́ maa bá wanɩ wo-kɩnkagɩla
yalʋ DƖ na kɩ tɩn dɩ́ ga dɩ́ ti.
10 Dɩntʋ mʋ pa dʋa nɩa
tɩga baŋa nɩ,
sɩ na wanɩ ba bugi pwələ ni maama.
11 Wɛ mʋ paɩ balʋ na zʋʋrɩ ba tɩtɩ tɩga nɩ tɩn
joori ba diini baŋa.
Balʋ dɩ na je ba keeri tɩn mʋ
DƖ pa ba naɩ dalɩm je.
12 DƖ maa vugimi balʋ na ye tɩga tɩn wʋbʋŋa yam,
pa ba na jeeli kikiə yalʋ tɩn
ba tʋŋa.
13 DƖ ta maa vugimi swan tiinə swan yam
pa ya joori ya ja-ba.a
Ba wʋbʋŋa yam maama jigi viu
ya je.
14 Lim mʋ kwǝli-ba wɩa tɩtarɩ nɩ,
yɩ ba kaagɩ wɩa tɩtarɩ maŋa nɩ
ba taana nɩ lilwǝ tɩn.
15 Wɛ joŋi nabwənə mʋ DƖ yaga
dɩ dɩdɛɛra bɩtar-balɔrɔ tɩm
na cɔgɩ-ba te tɩn.
DƖ maa vrɩ-ba DƖ jaanɩ DƖ nuŋǝ
balʋ na bɛɛsɩ-ba tɩn jɩŋa nɩ.
16 Kʋ maa paɩ yinigə tiinə jɩgɩ tɩɩna,
yɩ balʋ na kwɩɩlɩ cɩga kam tɩn
laan pu ba niə.
17 Dam-fɔrɔ Tu Wɛ dɩm na kʋrɩsɩ wʋlʋ tɩn jɩgɩ yu-yoŋo.
Kʋntʋ ŋwaanɩ yɩ gooni
DƖ kwiə yam.b
18 Bɛŋwaanɩ, DƖ yǝni DƖ kɩ zʋnnɩ
nɔɔna yɩra nɩ.
DƖ nan wʋ́ vɔ ba fufwələ yam.
DƖ maa na dɩ cam nɔɔnʋ wʋlʋ yɩra nɩ,
DƖ jɩn sɩm ta wʋ́ sooni kʋ tu.
19 Lɛɛrʋ na yi nmʋ kuni bɩrdʋ,
Wɛ wʋ́ taa kwǝli‑m.
Cam na maŋɩ dɩ yɩ te maama
dɩ daŋɩ da-baŋa nɩ,
dɩ bá di‑m.
20 Da-kʋrɩ maŋa nɩ
DƖ ta wʋ́ joŋi‑m o yagɩ,
sɩ kana yɩ gʋ-m.
Najara dɩ na tʋ lʋgʋ kʋm nɩ dɩ,
sʋ-lɔŋɔ bá di nmʋ.
21 Nɔɔna na jɩgɩ-m ba twɩa,
Wɛ wʋ́ kwǝli‑m
sɩ ba bɩtar-balwaarʋ tɩm yɩ wanɩ‑m kʋlʋkʋlʋ tɩ kɩ.
Cɔgɩm dɩ maa na lagɩ dɩ ba,
nmʋ bá ta n kwarɩ fʋʋnɩ.
22 Cɩga tɩn, cɔgɩm dɩ kana na yiǝ,
nmʋ wʋ́ ta n jɩgɩ-tɩ n goonə mʋ.
Kʋ ta na yɩ kagʋ-vara dɩ,
kʋ daɩ sɩ n ta n kwarɩ fʋʋnɩ dɩ ba.
23 Kʋ na yɩ te tɩn, nmʋ wʋ́ kɩ
ni-mɔrɔ dɩdaanɩ kandwa
yalʋ na tigi n kara kam wʋnɩ tɩn.
Kagʋ-vara dɩ nan bá taa daanɩ‑m.
24 Nmʋ wʋ́ ta n ye lanyɩranɩ nɩ
n kugu je sɩm tigi falalala mʋ.
N ta na jeeli n vara bam n nii,
ba dɩdʋa tɩtɩ dɩ bá je.
25 Nmʋ wʋ́ lwarɩ nɩ n biə kɔgɔ lagɩ kʋ gaalɩ,
yɩ n naarʋ dɩ puli mʋ,
nɩ tɩga baŋa gaarʋ tɩm na yɩ te tɩn.
26 Nmʋ ŋwɩa maa wʋ́ daanɩ
tɩga baŋa nɩ.
N ta wʋ́ ta n dana mʋ sɩ n vu n tɩ,
nɩ mɩna na yǝni ya bɩ
yɩ ba laan zagɩ-ya te tɩn.
27 Dɩ́ bʋŋɩ wǝǝnu tɩntʋ maama wʋbʋŋa mʋ
yɩ dɩ́ ye nɩ tɩ yɩ cɩga.
Kʋntʋ ŋwaanɩ,
cəgi dɩ́ na tagɩ kʋlʋ tɩn,
sɩ n daarɩ n ma-kʋ n tʋŋɩ.»