Elifaazɩ na sɩŋɩ o ta kʋlʋ tɩn
4
Teman tu Elifaazɩ ma ləri Zobi o wɩ:2 «Nɔɔnʋ na tagɩ taanɩ dɩ nmʋ,
n bá zuri n yɩra na?
Amʋ nan daa warɩ sɩ a taa yɩ cɩmm.
3 Jeeli n nii nmʋ daama na brɩ nɔɔna zanzan te tɩn.
N ta pɛ balʋ vwana na parɩ tɩn mʋ joori ba na dam.a
4 N ni-taanɩ wǝli balʋ ya na saarɩ ba tʋɩ tɩn mʋ,
pa ba joori ba zɩgɩ dəki.
Balʋ nagwələ na tɩgɩ tɩn dɩ ma na baarɩ.b
5 Cam laan na yi nmʋ tɩtɩ baŋa tɩn,
n dɛ kʋ baŋa nɩ mʋ yɩ n wʋʋ ga baarɩ.
Kʋ na zʋʋrɩ n yɩra tɩn, n nagwələ tɩgɩ mʋ.
6 Nmʋ nan na kwarɩ Wɛ te tɩn mʋ
bá pa‑m baarɩ na?
N ma n na ba jɩgɩ tusim
Wɛ cwǝŋǝ wʋnɩ tɩn mʋ
bá pa n tɩɩna taa wʋ DƖ wʋnɩ na?
7 Nan fɔgɩ n jeeli n nii:
Wɔɔ mʋ sɩɩnɩ o jɩgɩ bʋra
pa o da o tɩ lɩla?
Yən nɩ mʋ nmʋ wʋ́ na nɩ
cɔgɩm yi balʋ na yɔɔrɩ ba tɔgɩ cwǝŋǝ tɩn?
8 Amʋ na maanɩ te tɩn,
balʋ na dugi lwarɩm naa cam tɩn
wʋ́ zagɩ-tɩ mʋ.
9 Wɛ na sin DƖ yagɩ ba yɩra nɩ,
baá cɔgɩ ba ti mʋ.
10 Nywəənu mʋ yǝni tɩ suuri
yɩ tɩ ŋuuni dɩ dam.
Dɩ kʋ dɩ, Wɛ mʋ paɩ nyon-kamunə yələ gurə.
11 Kʋntʋ tɩn, nyoŋo na gɛ varɩm sɩ kʋ ja kʋ di,
kʋʋ́ tɩ mʋ, yɩ kʋ biə dɩ jagɩ.
Mʋ kʋ na wʋ́ kɩ nɔn-balwaarʋ te tɩn.
12 Ba daanɩ ba waasɩ taanɩ
ba brɩ-nɩ,
pa a wʋ ni-dɩ a ti.
13 Dɔɔnɩ ya tiini dɩ jɩgɩ-nɩ tɩtɩɩ nɩ,
yɩ a dwɛ dɩndwɩa yalʋ
na daanɩ-nɩ tɩn.
14 Fʋʋnɩ ma yɔɔrɩ dɩ ja-nɩ,
yɩ a yɩra saɩ pa a nagwələ magɩ daanɩ.
15 Kʋ kɩ nɩ viu mʋ dʋlɩ
a yibiyə seeni,
pa waarʋ da tɩ zʋ-nɩ
fʋʋnɩ ŋwaanɩ.
16 Kʋ laan ma zɩgɩ da cɩmm.
A maa wʋ lwarɩ kʋ na yɩ woŋo kʋlʋ tɩn.
Kʋ nyɩnyʋgʋ wʋ a yigə nɩ mʋ,
yɩ a ni kwǝrǝ na waasɩ ka wɩ:
17 ‹Nabiinu wʋ́ wanɩ o yɔɔrɩ o taa jɩgɩ cɩga Wɛ tee nɩ na?
O ta wʋ́ wanɩ o taa yɩ lanyɩranɩ fasɩ
o Kəru wʋm yigə nɩ na?
18 Kʋ na maŋɩ kʋ yɩ Wɛ malɛsɩ tɩtɩ,
DƖ ba kɩ DƖ tɩɩna sɩ wʋnɩ,
DƖ na nɛ nɩ sɩ kɩ sɩ sa sɩ cwǝŋǝ tɩn ŋwaanɩ.
19 Nabiinǝ nan yɩ dɔgɔ mʋ Wɛ mɛ
DƖ kɩ ba yɩra yam,
yɩ ba kuri nuŋi tɩɩrʋ wʋnɩ.
Bantʋ yɔɔrɩ ba bwǝnǝ
ba dwe tʋ́a na yɩ te tɩn mʋ.
20 Tɩga na yǝni ka pʋʋrɩ,
nabiinu ŋwɩ mʋ,
yɩ tɩga na bɩɩnɩ sɩ ka yi tɩn,
dɩ kʋ tu nɛ cɔgɩm.
O laan yǝni o je mʋ
yɩ nɔɔna daa ba guli o gulə.
21 Ba maa vaŋɩ kʋ tu wǝǝnu maama
ba lɩ ba daarɩ‑o.
O laan ma ba o tɩ
yɩ o wʋ nɛ yi-pʋrʋ.› »