Zobi tɛ o yaara yam taanɩ
3 «A lʋra dɛ dɩm ya na jigi kafɛ,
kʋ gara.
Tɩtɩɩ dɩlʋ wʋnɩ ba na tagɩ nɩ
ba lʋgɩ bəkərə tɩn,
dɩ taa yɩ kafɛ!
4 Kʋ maŋɩ sɩ dɛ dɩm kʋntʋ
wɩa kam pipiri ka ji lim mʋ.
Wɛ na wʋ wɛyuu nɩ tɩn daa yɩ guli
dɛ dɩm kʋntʋ gulə maŋa dɩ maŋa.
Pooni dɩ nan yɩ nyɩ dɩ wʋnɩ.
5 Pa lim yɔɔrɩ dɩ kwǝli
dɛ dɩm kʋntʋ liirǝ liirǝ,
yɩ kunkoŋo li tɩga kam maama,
pa je maama yɔɔrɩ sɩ zwəri tim-tim.
6 Ta pa tɩtɩɩ dɩm kʋntʋ maama
taa yɩ lim-nyɔrɩsɩ yɩranɩ.
Dɩ daɩ sɩ dɩ tɔgɩ dɩ gwaanɩ
bɩnɩ dɩm da wʋnɩ,
sɩ ba yɩ jeeli-dɩ canɩ dɩ canɩ da yam wʋnɩ.
7 Yɩ sɛ sɩ kaanɩ daa ja pugə
tɩtɩɩ dɩm kʋntʋ nɩ.
Kʋ daɩ sɩ nɔɔna bagɩ wʋpolo sɔɔ kʋ wʋnɩ.
8 Nɔɔna balʋ na sɔɔlɩ daa balɔrɔ tɩn,
nan sɔɔlɩ tɩtɩɩ dɩm kʋntʋ.
Bantʋ waɩ ba pa nɩnɩʋ wʋ juru
Prənyoŋo zaŋɩ mʋ.
9 Naŋɔgɔ ya ba maŋɩ sɩ kʋ nuŋi
a lʋra dɛ dɩm nɩ,
sɩ tɩga yɩ ba ka pʋʋrɩ,
dɩ tɩtɩɩ dɩm na maŋɩ dɩ daanɩ te maama dɩ.
10 Bɛŋwaanɩ, dɛ dɩm kʋntʋ wʋ pɛ
sɩ a nu pugə kam kwaalɩ-nɩ
ka yagɩ da.
Kʋntʋ yaá pa a yɩ taa nii
a naɩ cam dɩntʋ.
11 Bɛŋwaanɩ mʋ yɩ a wʋ tɩgɩ
a lʋra maŋa nɩ,
sɩ a ya yɔɔrɩ a maŋɩ jana wʋnɩ?
12 Bɛɛ mʋ kɩa yɩ a nu te o joŋi-nɩ
o tiŋi o nɛ baŋa nɩ,
yɩ o daarɩ o ja yɩlɩ o kɩ a ni nɩ
sɩ a taa ŋɔga?
13 A ya na tɩga a lʋra maŋa nɩ mʋ tɩntʋ,
a zɩm ya ba tigi curu nɩ a sin na?
14 Amʋ yaá taa je dɩ tɩga baŋa pwa dɩ ba nakwa mʋ.
Bantʋ ya lɔgɩ sɔ-fwaarʋ
yɩ tɩ laan ba tɩ cɔgɩ.
15 Tɩntʋ a ya tigi a sin dɩ nadunə
balʋ səbu-sɩŋa dɛɛn na daga
yɩ ba sam dɩm dɩ su
dɩ səbu-poŋo wǝǝnu zanzan tɩn mʋ.
16 Kʋ dɛɛn na kɩ nɩ ba lʋgɩ-nɩ
ba dɩ bu-tʋʋ mʋ, kʋ gara.
Ba yaá kɩ-nɩ tɩga nɩ,
nɩ bu-sɩsɩŋa kalʋ na wʋ nɛ
lʋgʋ pooni tɩn doŋ.
17 Curu nɩ, nɔn-balwaarʋ yǝni
ba sin dɩ ba liǝ yam.
Balʋ yɩra ya na cɛ tɩn
dɩ laan sin mʋ falalala.
18 Pɩɩna tɩtɩ dɩ je daanɩ
dɩ bɩcar-zuru mʋ,
balʋ ya na fɩn-ba tɩn daa na ba bagɩ-ba tɩn ŋwaanɩ.
19 Nɔɔna maama wʋ dáanɩ mʋ,
nabwənə dɩ nadunə.
Gambɛ dɩ yɔɔrɩ sɩ te sɩ tɩtɩ mʋ
je sɩm kʋntʋ nɩ.
20 Kʋ na yɩ wʋlʋ cam na jɩg-o tɩn,
bɛɛ mʋ yɩ Wɛ yǝni DƖ pa kʋ tu na wɩa pooni?
Bɛŋwaanɩ mʋ Wɛ paɩ balʋ tɩɩna na ti tɩn daa taa ŋwɩ?
21 Nɔɔna bantʋ doŋ yɔɔrɩ ba cəgi tʋʋnɩ mʋ sɩ dɩ ba dɩ ja-ba,
yɩ dɩ vɩn sɩ dɩ ba.
Ba ma kwaanɩ ba beeri tʋʋnɩ ba ga,
nɩ nɔɔnʋ na wʋ́ kʋ bɔɔnɩ
o beeri jɩjɩgɩrʋ na səgi tɩga nɩ te tɩn.
22 Ba ŋwɩa nan na tu ka ti
pa ba kɩ-ba yibeelə tɩga kuri nɩ,
ba laan wʋ́ di ywəəni lanyɩranɩ mʋ.
23 Kʋ na yɩ nɔɔnʋ wʋlʋ Wɛ na cɩgɩ o cwǝŋǝ
pa o yǝri o na wʋ́ vu mɛ tɩn,
bɛɛ mʋ yɩ Wɛ pa kʋ tu daa taa jɩgɩ ŋwɩa?
24 Suurə yam mʋ ləri a ni-wʋdiu yuu nɩ.
A ta yɔɔrɩ a suuri mʋ,
nɩ na na cuuri ba nuŋǝ
a ni nɩ te tɩn.
25 Amʋ ya na kwarɩ nɩ kʋlʋ wʋ́ yi-nɩ tɩn mʋ tu amʋ baŋa.
A maa na liǝ dɩ woŋo kʋlʋ tɩn mʋ yɔɔrɩ kʋ yi-nɩ.
26 A brɩ a ba naɩ a tɩtɩ.
A wʋʋ dɩ nan ba tigə.
A bá wanɩ a sin.
Liǝ yɩranɩ mʋ yɔɔrɩ ya jɩgɩ-nɩ taan.»