Sʋtaanɩ pɛ daa ta na maŋɩ Zobi te tɩn
2
Maŋa daa ma yi sɩ wɛyuu nɔɔna bam jeeri Baŋa-Wɛ yigə nɩ. Sʋtaanɩ pɛ dɩ ma da o zʋ ba wʋnɩ o zɩgɩ Baŋa-Wɛ yigə nɩ. 2 Baŋa-Wɛ ma bwe Sʋtaanɩ pɛ o wɩ: «Nmʋ zɩgɩ yən mʋ n ba yo?»Sʋtaanɩ pɛ dɩ ma ləri Baŋa-Wɛ o wɩ: «A yɔɔrɩ a kaagɩ tɩga kam baŋa nɩ mʋ a kɩkara.»
3 Baŋa-Wɛ daa ma ta DƖ wɩ: «N nan maanɩ n nii a tɩntʋŋnʋ Zobi na yɩ te tɩn na? Tɩga baŋa nɔɔna maama wʋnɩ nɔɔn-nɔɔnʋ tǝrǝ o na yɩ nɔn-ŋʋm nɩ wʋntʋ na yɩ te tɩn. O kikiə tɔgɩ cwǝŋǝ mʋ, yɩ o ba jɩgɩ tusim. O maa kwarɩ Wɛ, pa o yɔɔrɩ o cʋ o tɩtɩ dɩ lwarɩm. Nmʋ nan sʋgɩ-nɩ pa a yagɩ cwǝŋǝ sɩ o na cɔgɩm kafɛ ŋwaanɩ. Dɩ kʋ dɩ, Zobi ta zɩgɩ dɩ o cɩga mʋ, nɩ o na maŋɩ o yɩ te tɩn.»
4 Sʋtaanɩ pɛ ma ləri o wɩ: «Nɔɔnʋ ya-nwana jɩgɩ kuri ya pa‑o! Kʋntʋ tu wʋ́ kwe o woŋo maama o dʋlɩ o yagɩ sɩ o wanɩ o joŋi o ŋwɩa. 5 N nan na twɩ n jɩŋa n pa o na zʋnnɩ o yɩra yam wʋnɩ, o laan wʋ́ yɔɔrɩ o sɔɔlɩ‑m jaja.»
6 Baŋa-Wɛ ta ma ta dɩ Sʋtaanɩ pɛ DƖ wɩ: «Tɔ! A kwe o maama a kɩ n dam kuri nɩ. Nan yɩ lɩ o ŋwɩa kam.»
7 Sʋtaanɩ pɛ ma yagɩ Baŋa-Wɛ te. O ma vu o kwe ŋwan-balwaarʋ o kɩ Zobi yɩra yam maama nɩ, kʋ zɩgɩ o napra yam nɩ sɩ kʋ vu kʋ yi o yuu kʋm maama. 8 Zobi maa je tɩntwarɩm wʋnɩ wʋ-cɔgɔ ŋwaanɩ. O ma kwe kacuə o jɩgɩ o zaɩ o yɩra yam.
9 O kaanɩ ma yi o te yɩ o bwe‑o o wɩ: «Nmʋ ta zɩgɩ dɩ n cɩga mʋ na? Nan yɔɔrɩ n lwɛ Wɛ, sɩ n na wʋ́ tɩ sɩ n tɩ.»
10 Zobi ma lǝr-o o wɩ: «Ja n jwərim dɩm n lagɩ je! Wɛ na pɛ dɩbam wo-laarʋ, dɩ́ bá te jɩn sɩle mʋ dɩ́ joŋi-tɩ na? Bɛŋwaanɩ mʋ DƖ na tʋŋɩ lɛɛrʋ DƖ pa dɩbam, sɩ dɩ́ vɩn?»
Dɩ Zobi na zʋ cam dɩm maama wʋnɩ tɩn dɩ, o wʋ kɩ lwarɩm o ni-taanɩ baŋa nɩ.
Zobi badonnǝ batɔ bam yɩra taanɩ
11 Zobi dɛɛn jɩgɩ badonnǝ batɔ, ba na yɩ Teman tu Elifaazɩ, dɩ Suha tu Bilidadɩ, dɩ Naama tu Tɩsofaarɩ. Ba ma ni lɛɛrʋ tɩlʋ na yi Zobi tɩn ni nɩ. Ba ma zaŋɩ ba sam nɩ ba tɔgɩ daanɩ dɩ ni dɩdwɩ sɩ ba vu ba ŋwanɩ ba pa Zobi, sɩ ba daarɩ ba zuri o bɩcarɩ. 12 Ba ta na ve ba bɩɩnɩ o te yɩ ba tʋlɩ ba na‑o tɩn, ba wʋ lwar-o lɩla. Ba laan ma sɩŋɩ sɩ ba kaasɩ dɩ kwǝr-dɩa. Ba ma kaarɩ ba gwaarʋ tɩm, yɩ ba daarɩ ba mɔɔnɩ kasʋlʋ ba caarɩ ba yagɩ ba yum nɩ. 13 Ba ma fʋfɔ ba yi o yɩra ba jǝni tɩga nɩ, da yarpɛ wɩa dɩ tɩtɩɩ maama. Ba wʋlʋwʋlʋ wʋ wanɩ sɩ o ta taanɩ dɩd-o, ba na nɛ o na tiini o yaarɩ tɩn ŋwaanɩ.