Zobi Tɔnɔ
Sʋtaanɩ pɛ na maŋɩ Zobi te tɩn
1
Nɔɔnʋ dɛɛn mʋ wʋra, o yɩrɩ mʋ Zobi. O maa zʋʋrɩ Utsi tɩʋ kʋm wʋnɩ. O kikiə dɛɛn tɔgɩ cwǝŋǝ mʋ, yɩ tusim tǝrǝ. O maa kwarɩ Wɛ, pa o yɔɔrɩ o cʋ o tɩtɩ dɩ lwarɩm.a 2 O dɛɛn jɩgɩ bəkəri sɩrpɛ dɩ bukwa batɔ mʋ. 3 O maa jɩgɩ peeni mʋrrʋ tɩrpɛ (7,000), dɩ yogondə mʋrrʋ tɩtɔ (3,000), dɩ nabɛ mʋrʋ (1,000), dɩ bɩnɛ biə-yanu (500). O ta maa jɩgɩ tɩntʋŋna zanzan pa ba tʋŋɩ ba pa‑o. Cɩga tɩn, wʋntʋ dɛɛn mʋ yɩ nadum o dwe wa-puli je sɩm nɔɔna maama.4 Zobi bəkəri sɩm dɛɛn yǝni ba kɩ candi-fara mʋ ba lərə ba pa daanɩ. Ba ma yǝni ba bəŋi daanɩ sɩ ba maama jeeri ba di wʋdiu ba daarɩ ba nyɔ sana ba dɩdʋa sɔŋɔ nɩ, yɩ ba ta ba nakwa batɔ bam sɩ ba dɩ da ba jeeri. 5 Zobi biə bam na yǝni ba di kuri ba ti, o laan wʋ́ bǝŋi-ba mʋ sɩ o kwɛ-ba dɩ cullu tɩm. O ma yǝni o zaŋɩ tɩtɩɩtɩ o kwe vara o kɩ zwɛɛm kaanɩm bu maama ŋwaanɩ. Maŋa maama o yǝni o kɩ kʋntʋ doŋ, bɛŋwaanɩ o yǝni o bʋŋɩ o tɩtɩ nɩ mʋ o wɩ: «Dɛdoŋ a biə bam cɔgɩ mʋ yɩ ba lwɛ Wɛ ba bɩcwaanʋ wʋnɩ.»
6 Dɛ dɩdwɩ mʋ wɛyuu nɔn-kɔgɔ kʋm tu ba jeeri Baŋa-Wɛ yigə nɩ. Sʋtaanɩ pɛ dɩ ma da o zʋ ba wʋnɩ. 7 Baŋa-Wɛ ma bwe‑o o wɩ: «Nmʋ zɩgɩ yən mʋ n ba yo?»
Sʋtaanɩ pɛ dɩ ma ləri Baŋa-Wɛ o wɩ: «A yɔɔrɩ a kaagɩ tɩga kam baŋa nɩ mʋ a kɩkara.»b
8 Baŋa-Wɛ daa maa wɩ: «N nan maanɩ n nii a tɩntʋŋnʋ Zobi na yɩ te tɩn na? Tɩga baŋa nɔɔna maama wʋnɩ nɔɔn-nɔɔnʋ tǝrǝ o na yɩ nɔn-ŋʋm nɩ wʋntʋ na yɩ te tɩn. O yɔɔrɩ o tɔgɩ cwǝŋǝ mʋ, yɩ o ba jɩgɩ kəm-balwaarʋ. O maa kwarɩ Wɛ, pa o cʋ o tɩtɩ dɩ lwarɩm kikiə.»
9 Sʋtaanɩ pɛ ma ləri Wɛ o wɩ: «Zobi nan na kwarɩ Wɛ te tɩn yɩ kafɛ ŋwaanɩ mʋ na? 10 Nmʋ yǝni n kwǝl‑o mʋ sɩ kʋlʋkʋlʋ yɩ yi‑o. N ta kwǝli o digə tiinə dɩ o jɩjɩgɩrʋ maama dɩ mʋ, yɩ n daarɩ n pa kʋlʋ maama o na kɩ tɩn yǝni kʋ kɩ lanyɩranɩ kʋ pa‑o. Nii o na jɩgɩ vara zanzan pa ba su tɩʋ kʋm ni maama te! 11 N nan na twɩ n jɩŋa pa kʋlʋ maama o na jɩgɩ tɩn ti kʋ daarɩ‑o, o laan wʋ́ yɔɔrɩ o lwɛ nmʋ jaja.»c
12 Baŋa-Wɛ ma ta dɩ Sʋtaanɩ pɛ o wɩ: «Tɔ! A kwe o jɩŋa woŋo maama a kɩ nmʋ dam kuri nɩ. Nan yɩ kɩ o tɩtɩ yɩra yam kʋlʋkʋlʋ.»
Sʋtaanɩ pɛ ma yagɩ Baŋa-Wɛ te yɩ o viiri.
13 Dɛ dɩdwɩ mʋ Zobi biə bam maama dɛɛn je o bəkər-kwɩa kam sɔŋɔ nɩ ba di candi-fara, yɩ ba daarɩ ba nyɔ sana. 14 Nɔɔnʋ ma duri o vu o yi Zobi te o wɩ: «Dɩ́ ya jɩgɩ n nabɛ sɩm dɩ́ varɩ mʋ, yɩ n bɩnɛ sɩm dɩ zɩgɩ sɩ bwələ dáanɩ sɩ di gaa. 15 Seba tiinə badonnǝ ma da ba zaŋɩ dɩ́ baŋa nɩ, yɩ ba kalɩ tɩ maama ba ja ba viiri. Ba ta ma gʋ n tɩntʋŋna bam maama. Amʋ yɩranɩ mʋ wanɩ a lu sɩ a ba a ta kʋlʋ na kɩ tɩn a brɩ-m.»
16 O ta na wʋra o tɛ taanɩ dɩm o brɩ-o tɩn mʋ nɔɔnʋ wʋdoŋ dɩ yiǝ. O dɩ ma ta dɩ Zobi o wɩ: «Dʋa mʋ nuŋi wɛyuu nɩ ka ba ka bagɩ n peeni sɩm dɩ n tɩntʋŋna bam maama ka gʋ. Amʋ yɩranɩ mʋ wanɩ a lu sɩ a ba a ta kʋlʋ na kɩ tɩn a brɩ-m.»
17 O ta na wʋra o tɛ taanɩ dɩm tɩn mʋ nɔɔnʋ wʋdoŋ dɩ yiǝ. O dɩ ma ta dɩ Zobi o wɩ: «Kalde tiinə bam jar-kərə cɛ ba tɩtɩ kuni bɩtɔ mʋ, yɩ ba da ba zʋ n yogondə yam wʋnɩ ba kalɩ ya maama ba ja ba viiri. Ba ta ma gʋ n tɩntʋŋna bam maama. Amʋ yɩranɩ mʋ wanɩ a lu sɩ a ba a ta kʋlʋ na kɩ tɩn a brɩ-m.»
18 O ta na wʋra o tɛ taanɩ dɩm tɩn mʋ nɔɔnʋ wʋdoŋ dɩ yiǝ. O dɩ ma ta dɩ Zobi o wɩ: «N biə bam ya wʋ n bu-kwɩan kam sɔŋɔ nɩ mʋ ba di candi-fara, yɩ ba nyɔ sana. 19 Vu-fɔrɔ ma da kʋ nuŋi kagʋa kam seeni kʋ ba dɩ dam, yɩ kʋ magɩ sɔŋɔ kʋm sɛn sɩm maama pa kʋ tʋ kʋ panɩ ba maama kʋ gʋ. Amʋ yɩranɩ mʋ wanɩ a lu sɩ a ba a ta kʋlʋ na kɩ tɩn a brɩ-m.»
20 Zobi na ni kʋntʋ maama tɩn, o ma zaŋɩ o zɩgɩ wɛɛnɩ o ja o gɔrɔ o kaarɩ wʋ-cɔgɔ ŋwaanɩ. O ma ceeri o yuu yɩ o daarɩ o vin o yibiyə tɩga nɩ o zuli Wɛ. 21 O maa wɩ:
«A na nuŋi a nu pugə nɩ a bɩɩnɩ lʋgʋ baŋa tɩn, a tu bwəri mʋ. A nan na lagɩ a yagɩ lʋgʋ kʋm, a ta wʋ́ viiri bwəri mʋ. Baŋa-Wɛ ya mʋ pɛ-nɩ a wǝǝnu tɩm maama, yɩ DƖ daa joori DƖ joŋi-tɩ. Baŋa-Wɛ yɩrɩ dɩm nan ta maŋɩ dɩ tiə.»d
22 Dɩ kʋlʋ maama na kɩ tɩn dɩ, Zobi wʋ kɩ lwarɩm. O nan wʋ tagɩ nɩ Wɛ mʋ kɩ kʋ wʋ maŋɩ dɩ.