Kaanɩm tiinə dɩ Levi tiinə bam yɩra
12
Kaanɩm tiinə dɩ Levi tiinə balʋ na tɔgɩ dɩ Salatɩyɛlɩ bu Zorobabɛlɩ, dɩdaanɩ kaanɩm yigə tu Zozwe ba joori Zuda provɛnsɩ dɩm nɩ tɩn mʋ tɩntʋ:aWɛ Kaanɩm tiinə:
Seraya, dɩ Zeremi, dɩ Esdrasɩ, 2 dɩ Amari, dɩ Maluki, dɩ Atusi, 3 dɩ Sekanɩa, dɩ Rehumi, dɩ Meremɔtɩ, 4 dɩ Ido, dɩ ɡinetoni, dɩ Abɩa, 5 dɩ Miyamina, dɩ Mowadɩa, dɩ Biliga, 6 dɩ Semaya, dɩ Yoyaribi, dɩ Yedaya, 7 dɩ Saalu, dɩ Amɔkɩ, dɩ Hilkiya, dɩdaanɩ Yedaya.
Zozwe maŋa kam nɩ, nɔɔna bam kʋntʋ dɛɛn mʋ yɩ ba donnǝ kaanɩm tiinə bam yigǝ tiinǝ.
Levi tiinə:
8 Zozwe, dɩ Enadadɩ, dɩ Kadimeli, dɩ Serebia, dɩ Zuda, dɩdaanɩ Matanɩa. Matanɩa dɩ o donnǝ dɛɛn mʋ te sɩ ba taa nii le-kǝm le sɩm baŋa nɩ.
9 Kʋ daarɩ Bakabukɩa dɩ Yunni dɩ ba donnǝ mʋ sɛ le sɩm.
10 Zozwe dɛɛn mʋ yɩ Yoyakim ko, Yoyakim maa yɩ Eliyasibi ko, Eliyasibi maa yɩ Yoyada ko, 11 Yoyada maa yɩ Zonatan ko, Zonatan maa yɩ Yadʋa ko. 12 Yoyakim maŋa kam nɩ, nɔɔna bantʋ dɛɛn mʋ nii kaanɩm tiinə bam sɔ-yuni tɩm baŋa nɩ:
Meraya dɛɛn mʋ nii Seraya di sɩm.
Hanania ma nii Zeremi di sɩm.
13 Mesulam ma nii Esdrasɩ di sɩm.
Yohanan ma nii Amari di sɩm.
14 Zonatan ma nii Maluki di sɩm.
Zozɛfʋ ma nii Sekanɩa di sɩm.
15 Adana ma nii Harim di sɩm.
Helikayi nii Meremɔtɩ di sɩm.
16 Zakari ma nii Ido di sɩm.
Mesulam ma nii Ginetoni di sɩm.
17 Zikiri ma nii Abɩa di sɩm.
Pilitayi ma nii Minamina di sɩm dɩ Mowadɩa di sɩm.
18 Samʋa ma nii Biliga di sɩm.
Zonatan ma nii Semaya di sɩm.
19 Matenayi ma nii Yoyaribi di sɩm.
Utsi ma nii Yedaya di sɩm.
20 Kalayi ma nii Salayi di sɩm.
Hebɛrɩ ma nii Amɔkɩ di sɩm.
21 Hasabia ma nii Hilkiya di sɩm.
Netaneli ma nii Yedaya di sɩm.
22 Maŋa kalʋ nɩ Eliyasibi, dɩ Yoyada, dɩ Yohanan, dɩdaanɩ Yadʋa na jigi kaanɩm yigǝ tiinǝ ba ləri daanɩ tɩn, mʋ ba pɛ ba pʋpʋnɩ kaanɩm tiinə dɩ ba di sɩm yɩra wǝǝnu ba tiŋi twannʋ wʋnɩ. Ba dɛɛn kɩ kʋntʋ sɩ kʋ taa ve Dariusi na tu o ji Pɛrsɩ tɩʋ pa-farʋ tɩn mʋ. 23 Kʋ daarɩ kʋ na yɩ Levi tiinə bam dɩ ba di sɩm yɩra wǝǝnu, ba pʋpʋnɩ tɩntʋ ba tiŋi ba tɩʋ kʋm cɩbara gulə twaanʋ wʋnɩ sɩ kʋ taa ve Eliyasibi bu Yohanan maŋa nɩ mʋ.
Wɛ-digə kam tɩtʋŋa na pɔɔrɩ te tɩn
24 Levi tiinə bam yigǝ tiinǝ dɛɛn yɩ Hasabia, dɩ Serebia, dɩ Zozwe, dɩ Enadadɩ dɩ Kadimeli mʋ. Bantʋ ma nii Wɛ tiə dɩ le-kǝm le sɩm baŋa nɩ yɩ ba donnǝ bam zɩgɩ ba jeeri-ba sɩ ba taa leeni ba sɛ-sɩ, nɩnɛɛnɩ Wɛ tɩntʋŋnʋ Davidi dɛɛn na brɩ-ba sɩ ba taa kɩ te tɩn.
25 Wɛ-digə ni-yɩrɩna bam dɛɛn yɩ Matanɩa, dɩ Bakabukɩa, dɩ Abdɩasɩ, dɩ Mesulam, dɩ Talɩmon, dɩdaanɩ Akuba mʋ. Bantʋ tɩtʋŋɩ mʋ maŋɩ sɩ ba taa yɩrɩ zɩla di sɩm na wʋ Wɛ-digə kam bwəəru tɩm seeni tɩn.
26 Levi tiinə bam kʋntʋ dɛɛn tʋŋɩ Wɛ-digə kam tɩtʋŋa Yoyakim na yɩ Zozwe bu dɩ Yozadaki naa tɩn maŋa nɩ mʋ. Ba ta tʋŋɩ maŋa kalʋ nɩ Nehemi na yɩ tɩʋ kʋm dɩdɛɛrʋ, yɩ Esdrasɩ yɩ Wɛ kaanɩm tu, yɩ o ta yɩ Wɛ niə karanyɩna tu tɩn mʋ.
Ba kwe Zeruzalɛm kəbrə kam ba pa Wɛ
27 Ba dɛɛn na ti yigə sɩ ba kwe Zeruzalɛm kəbrə kam ba kɩ Wɛ jɩŋa nɩ tɩn, mʋ ba tʋŋɩ ba bəŋi Levi tiinə bam sɩ ba zɩgɩ ba na wʋ mɛ maama nɩ tɩn ba ba. Ba ma kwe zwɩ dɩ kwaanʋ dwi dwi mʋ ba tɔgɩ ba di ywəəni dɩm, yɩ ba leeni Wɛ le-kǝm le. 28-29 Levi tiinə lən-leenə bam dɛɛn zʋʋrɩ Zeruzalɛm nawuurə yam wʋnɩ, dɩ Netofa tɩʋ kʋm seeni, dɩ Bɛte-Giligal nɩ, dɩ Geba nɩ, dɩ Azɩmavɛtɩ nɩ mʋ. Ba dɩ ma zɩgɩ ba ya na zʋʋrɩ mɛ maama nɩ tɩn ba ba Zeruzalɛm. 30 Kaanɩm tiinə bam, dɩ Levi tiinə bam dɛɛn ma tʋŋɩ kʋlʋ na wʋ́ kwɛ ba tɩtɩ Wɛ ŋwaanɩ, yɩ ba daarɩ ba kwɛ nɔɔna bam, dɩ tɩʋ kʋm bwəəru, dɩ kʋ kabri sɩm maama.
31 Amʋ laan ma pa ni sɩ Zuda provɛnsɩ yigǝ tiinǝ bam di ba zɩgɩ kəbrə kam yuu nɩ. A ta ma beeri lən-leenə zanzan a pɔɔrɩ-ba kuni bɩle, sɩ ba taa ve ba kaagɩ tɩʋ kʋm mʋ yɩ ba leeni ba kɩ Wɛ le. Ba kɔgɔ dɩdʋa ma tɔgɩ kəbrə kam jazɩm seeni ba vu Weeru-puuri Ni dɩm seeni.b 32 Hosaya dɩdaanɩ Zuda yigǝ tiinǝ bam cicoro kʋm ma tɔgɩ lən-leenə bam kwaga. 33 Azarɩa, dɩ Esdrasɩ, dɩ Mesulam, 34 dɩ Zuda, dɩ Bɛnzamɛn, dɩ Semaya, dɩ Zeremi, dɩ maa tɔgɩ da. 35 Kaanɩm tiinə badonnǝ dɩ na ze nabwaanʋ tɩn ma saŋɩ bantʋ dɩ kwaga. Zonatan bu Zakari dɩ daa ma saŋɩ. Wʋntʋ dɛɛn yɩ Semaya naa mʋ, yɩ o nabaara dɛɛn yɩ Matanɩa, dɩ Mikaya, dɩ Zakuri, dɩ Azafɩ. 36 Zakari cʋrrʋ tɩlʋ na tɔgɩ dɩd-o tɩn mʋ tɩntʋ: Semaya, dɩ Azareli, dɩ Milalayi, dɩ Gilalayi, dɩ Maayi, dɩ Netaneli, dɩ Zuda, dɩdaanɩ Hanani. Bantʋ maama dɛɛn ze kwɛɛra zɩla yalʋ maama Wɛ tɩntʋŋnʋ Davidi dɛɛn na pɛ ni sɩ ba taa ma-ya ba zuli Wɛ tɩn mʋ. Wɛ niə karanyɩna tu Esdrasɩ dɛɛn ma tɔgɩ kɔgɔ kʋm maama yigə. 37 Ba dɛɛn ma vu ba yi Buli-yi Ni dɩm, yɩ ba yɔɔrɩ ba vu ba din ba din Davidi tɩʋ kʋm nɩ. Ba ta ma vu ba gaalɩ Davidi sɔ-fɔrɔ kʋm na zɩgɩ mɛ tɩn, yɩ ba laan tʋlɩ ba vu ba yi tɩʋ kʋm wa-puli seeni mɛ kəbrə kam na ve ka tɔ dɩ Na Ni dɩm tɩn.
38 Lən-leenə kɔgɔ kʋdoŋ kʋm ma tɔgɩ kəbrə kam jagwiə seeni ba veǝ. Amʋ dɩ ma tɔgɩ ba kwaga, dɩdaanɩ nɔɔna bam cicoro. Dɩ́ ma vu dɩ́ gaalɩ Jugu di-dɩdɔrɔ kʋm dɩ́ vu dɩ́ yi Kabri lilirim kʋm seeni. 39 Dɩ́ zɩgɩ dáanɩ dɩ́ vu dɩ́ gaalɩ Efrayim Ni dɩm mʋ, dɩ Yesana Ni dɩm, dɩ Kale Ni dɩm, dɩ Hananɛlɩ di-dɩdɔrɔ kʋm, dɩ Wǝǝnu Bi di-dɩdɔrɔ kʋm, dɩ́ ta vu dɩ́ yi Peeni Ni dɩm. Dɩ́ laan ma vu dɩ́ yi Wɛ-digə Yɩrɩna ni dɩm dɩ́ zɩgɩ da.
40 Lən-leenə pɔɔrɩm sɩle sɩm laan ma vu ba zɩgɩ Wɛ-digə kam wʋnɩ. Amʋ dɩdaanɩ yigǝ tiinǝ bam cicoro dɩ ma vu dɩ́ zɩgɩ da. 41 Kaanɩm tiinə bantʋ dɩ dɛɛn nan mʋ tɔgɩ ba zɩgɩ dɩ amʋ, yɩ ba jɩgɩ nabwaanʋ ba wui:
Eliyakɩm, dɩ Maaseya, dɩ Minamina, dɩ Mikaya, dɩ Eliu-Enayi, dɩ Zakari, dɩdaanɩ Hanania.
42 Nɔɔna bantʋ dɩ dɛɛn mʋ tɔgɩ ba wʋra:
Maaseya, dɩ Semaya, dɩ Eleyazaarɩ, dɩ Utsi, dɩ Yohanan, dɩ Malkiya, dɩ Elam, dɩdaanɩ Etisɛrɩ.
Kʋ dɛɛn yɩ Yizrayia mʋ tɩn lən-leenə bam yigə pa ba leeni dɩ kwǝr-dɩa ba kɩ Wɛ le. 43 Dɛ dɩm kʋntʋ nɩ, ba ma kɩ kaanɩm zanzan ba pa Baŋa-Wɛ. Nɔɔna bam dɩ ma tiini ba di ywəəni sɩ kʋ gaalɩ, Wɛ na pɛ ba wʋʋ poli tɩn ŋwaanɩ. Kaana bam dɩ ba biə maama dɩ ma nuŋi ba tɔgɩ ba di ywəəni dɩm, pa dɩ sɔɔ kʋm zaŋɩ wɛɛnɩ kʋ yi yigə yigə.c
Wɛ tɩntʋŋna bam ni-wʋdiu taanɩ
44 Dɛ dɩm kʋntʋ nɩ ba dɛɛn ma kuri nɔɔna sɩ ba taa nii Wɛ-digə zɩla di sɩm dɩ sɩ wǝǝnu tɩm baŋa nɩ. Ba dɛɛn yǝni ba kwalɩmɩ Wɛ tǝri dɩm, dɩ dayigǝ mɩna yam, dɩ dayigǝ tiu biə pɛɛra yam, dɩ pɛɛra yalʋ maama nɔɔna na pɛ Wɛ-digə tɩtʋŋa yam ŋwaanɩ tɩn mʋ. Ba maa wʋ́ vu Yisɩrayɛlɩ tiinə karɩ sɩm na wʋ ba tɩɩnɩ dɩm maama wʋnɩ tɩn ba joŋi wʋdiiru tɩlʋ Wɛ niə yam na pɛ cwǝŋǝ sɩ kaanɩm tiinə dɩ Levi tiinə bam joŋi tɩn. Zuda tiinə bam maama wʋʋ dɛɛn tɔgɩ dɩ kaanɩm tiinə bam dɩ Levi tiinə bam kikiə mʋ. 45 Bɛŋwaanɩ, bantʋ dɛɛn sɩɩnɩ yiǝ mʋ ba tʋŋɩ cullu dɩ kwɛɛm tɩtʋŋa yam Baŋa-Wɛ na pɛ-ba sɩ ba kɩ tɩn. Lən-leenə bam, dɩ Wɛ-digə ni-yɩrɩna bam dɩ ma tʋŋɩ ba tɩtʋŋa sɩ kʋ tɔgɩ dɩ niə yalʋ Pɛ Davidi dɩ o bu Solɔmɔn na brɩ-ba sɩ ba taa kɩ tɩn. 46 Kʋ nan na zɩgɩ Pɛ Davidi dɩdaanɩ Azafɩ maŋa kam nɩ tɩn, mʋ ba lɩ nɔɔna sɩ ba yǝni ba tɔgɩ lən-leenə bam yigə sɩ ba taa leeni ba tee Wɛ, yɩ ba daarɩ ba kɩ DƖ le. 47 Kʋ daa ta na yi Zorobabɛlɩ maŋa kam nɩ dɩdaanɩ Nehemi maŋa kam nɩ tɩn, Yisɩrayɛlɩ tiinə bam maa yǝni ba kuri ba wʋdiiru tɩm wʋnɩ ba paɩ lən-leenə bam dɩ Wɛ-digə ni-yɩrɩna bam dɛ maama sɩ kʋ wǝli-ba ba tɩtʋŋa baŋa nɩ. Ba ta maa yǝni ba lɩ pʋpwara kalʋ na maŋɩ dɩ Levi tiinə badaara bam tɩn mʋ ba pa-ba. Levi tiinə dɩ laan maa yǝni ba lɩ pʋpwara kalʋ na yɩ kaanɩm tiinə bam nyɩm tɩn ba pa-ba.