Nɔɔna balʋ na tu ba taa zʋʋrɩ Zeruzalɛm wʋnɩ tɩn
11
Yisɩrayɛlɩ yigǝ tiinǝ bam dɛɛn ma ba ba zʋʋrɩ Zeruzalɛm tɩʋ wʋnɩ. Nɔɔna balʋ na daarɩ tɩn ma ta jɔrɔ sɩ ba kuri balʋ dɩ na wʋ́ vu ba taa zʋʋrɩ da tɩn. Sam fugə maama wʋnɩ ba ma lɩ sɔŋɔ dɩdʋa sɩ kʋ nɔɔna bam vu ba taa zʋʋrɩ Zeruzalɛm wʋnɩ, sɩ balʋ na daarɩ tɩn taa wʋ ba tɩtɩ tɩɩnɩ wʋnɩ. 2 Nɔɔna badaara bam wʋʋ ma da balʋ maama na sɛ sɩ ba vu Zeruzalɛm ba taa zʋʋrɩ da tɩn.3 Zuda provɛnsɩ dɩm yigǝ tiinǝ balʋ na tu ba zʋʋrɩ Zeruzalɛm wʋnɩ tɩn mʋ tɩntʋ. Yisɩrayɛlɩ tiinə badaara dɛɛn maa zʋʋrɩ ba tɩtɩ tɩga nɩ dɩ ba tɩɩnɩ dɩm wʋnɩ, kʋ na yɩ kaanɩm tiinə, dɩ Levi tiinə, dɩ Wɛ-digə tɩntʋŋna, dɩ Solɔmɔn tɩntʋŋna biə bam, 4 sɩ badaara na nuŋi Zuda dwi dɩm wʋnɩ dɩ Bɛnzamɛn dwi dɩm wʋnɩ tɩn taa zʋʋrɩ Zeruzalɛm wʋnɩ.
Zuda dwi dɩm yigǝ tiinǝ balʋ na zʋʋrɩ Zeruzalɛm wʋnɩ tɩn mʋ tɩntʋ:
Ozɩasɩ bu Ataya.
O dɛɛn ta yɩ Zakari naa mʋ, yɩ o nabaara bam yɩ Amari, dɩ Sefatɩa, dɩ Mahalaleyɛlɩ. Nɔɔna bam kʋntʋ maama dɛɛn yɩ Zuda bu Perɛsɩ naarʋ mʋ.
5 Baruki bu Maaseya.
O dɛɛn ta yɩ Kola-Hozɛ naa mʋ, yɩ o nabaara bam yɩ Hazaya, dɩ Adaya, dɩ Yoyaribi, dɩdaanɩ Zakari. Nɔɔna bam kʋntʋ maama maa yɩ Zuda bu Siloe naarʋ.
6 Farɛsɩ dwi tiinə balʋ dɛɛn na zʋʋrɩ Zeruzalɛm wʋnɩ tɩn yɩ baara biə-yana dɩ fusɩrdʋ-nana (468) mʋ. Ba maa yɩ nɔn-babɛ.
7 Bɛnzamɛn dwi tiinə bam mʋ tɩntʋ:
Mesulam bu Saalu.
O dɛɛn ta yɩ Zoyedi naa mʋ, yɩ o nabaara bam yɩ Pedaya, dɩ Kolaya, dɩ Maaseya, dɩ Iteli, dɩdaanɩ Ezayi.
8 Saalu cʋrrʋ Gabayi dɩ Salayi.
Bɛnzamɛn dwi tiinə balʋ na zʋʋrɩ Zeruzalɛm wʋnɩ tɩn maama dɛɛn yɩ baara biə-nʋgʋ dɩ fiinle-nana (928) mʋ. 9 Zikiri bu Zowɛlɩ dɛɛn mʋ yɩ ba yigə tu, yɩ Hasɩnua bu Zuda saŋɩ o te ba tɩʋ je sɩm.
10 Kaanɩm tiinə bam mʋ tɩntʋ:
Yoyaribi bu Yedaya, dɩ Yakinni.
11 Hilkiya bu Seraya.
O dɛɛn yɩ Mesulam naa mʋ, yɩ o nabaara bam yɩ Sadoki, dɩ Merayɔtɩ, dɩdaanɩ kaanɩm yigə tu Asituba.
12 Bantʋ dɩ ba tɩntʋŋna donnǝ balʋ na tʋŋɩ Wɛ-digə kam tɩtʋŋa tɩn dɛɛn yɩ baara biə-nana dɩ fiinle-bale (822) mʋ.
Zeroham bu Adaya.
O dɛɛn ta yɩ Pelalɩa naa mʋ, yɩ o nabaara bam yɩ Amezi, dɩ Zakari, dɩ Pasuuri, dɩdaanɩ Malkiya.
13 Adaya dɩdaanɩ o cʋrrʋ tɩm dɛɛn yɩ baara biə-yale dɩ fiinna-bale (242) mʋ.
Azareli bu Amasesayi.
O dɛɛn yɩ Ahazayi naa mʋ, yɩ o nabaara bam yɩ Mesilemɔtɩ, dɩdaanɩ Yimera.
14 Amasesayi dɩ o cʋrrʋ tɩm maa yɩ baara bi dɩ fiinle-nana (128). Ba maa yɩ nɔn-babɛ na ye jara-kǝm cɩga cɩga tɩn. Ba yigə tu dɛɛn mʋ yɩ Hagedolim bu Zabideli.
15 Levi tiinə bam mʋ tɩntʋ:
Hasubi bu Semaya.
O dɛɛn ta yɩ Azerikam naa mʋ, yɩ o nabaara bam yɩ Hasabia dɩ Bunni.
16 Sabetayi, dɩ Yozabadɩ.
Bantʋ dɛɛn yɩ Levi tiinə bam yigǝ tiinǝ mʋ yɩ ba nii Wɛ-digə kam pooni yigə tɩtʋŋa baŋa nɩ.
17 Mise bu Matanɩa.
O dɛɛn ta yɩ Zabidi naa mʋ. O nabaarʋ maa yɩ Azafɩ. Matanɩa dɛɛn mʋ tɔgɩ Wɛ-digə lən-leenə bam yigə pa ba leeni le-kǝm le dɩ wɛ-loro le.
Bakabukɩa.
Wʋntʋ dɛɛn saŋɩ Matanɩa kwaga mʋ o donnǝ bam wʋnɩ.
Samʋa bu Abɩda.
O ta yɩ Galalɩ naa mʋ, yɩ o nabaarʋ yɩ Yedutun.
18 Levi tiinə balʋ maama dɛɛn na ve ba zʋʋrɩ Zeruzalɛm wʋnɩ tɩn yɩ baara biə-yale dɩ funɔnɔ-bana (284) mʋ.
19 Wɛ-digə ni-yɩrɩna bam mʋ tɩntʋ:
Akuba, dɩ Talɩmon.
Ba dɩ ba tɩntʋŋna donnǝ bam dɛɛn yɩ baara bi dɩ fusɩrpɛ-bale (172) mʋ.
20 Kʋ nan na yɩ Yisɩrayɛlɩ tiinə, dɩ ba kaanɩm tiinə, dɩ ba Levi tiinə balʋ na daarɩ tɩn, bantʋ dɛɛn zʋʋrɩ Zuda tɩɩnɩ dɩm maama wʋnɩ mʋ, ba tɩtɩ nabaara tɩga kam baŋa nɩ.
21 Wɛ-digə tɩntʋŋna bam dɛɛn maa zʋʋrɩ Zeruzalɛm provɛnsɩ dɩlʋ yɩrɩ na yɩ Ofɛɛlɩ tɩn nɩ mʋ. Sia dɩdaanɩ Gisepa maa yɩ ba yigǝ tiinǝ.
22 Levi tiinə bam yigə tu wʋlʋ dɛɛn na tɔgɩ o zʋʋrɩ Zeruzalɛm wʋnɩ tɩn mʋ yɩ Bani bu Utsi. O dɛɛn ta yɩ Hasabia naa mʋ, yɩ o nabaara bam yɩ Matanɩa, dɩ Mise tɔnɔ. Utsi nuŋi Azafɩ dwi kʋm nɩ mʋ. Bantʋ nan mʋ maŋɩ sɩ ba taa leeni Wɛ-digə kam le maama. 23 Pɛ wʋm nan ya pɛ lən-leenə bam ni mʋ, sɩ dɩ taa brɩ-ba ba dɛ maama tɩtʋŋa na wʋ́ taa yɩ te tɩn.a
24 Mesezabɛɛlɩ bu Petasia maa wʋ pɛ wʋm tee nɩ sɩ o pa Yisɩrayɛlɩ tiinə bam ba wǝǝnu maama. O yɩ Zuda bu Zara dwi dɩm nɔɔnʋ mʋ.
Tɩɩnɩ dɩlʋ na kaagɩ Zeruzalɛm tɩn
25 Nɔɔna bam badaara dɛɛn maa zʋʋrɩ tɩɩnɩ dɩdonnǝ wʋnɩ, yɩ ba karɩ bwələ da. Zuda dwi tiinə badonnǝ dɛɛn maa zʋʋrɩ Kiriyat-Arba nɩ, dɩ Dibɔn nɩ, dɩ Yegabazeeli nɩ, dɩdaanɩ dɩ nawuurə yam wʋnɩ. 26 Ba ta maa zʋʋrɩ Zozwe nɩ, dɩ Molada nɩ, dɩ Bɛtɩ-Peleta nɩ, 27 dɩ Hazara-Suwala nɩ, dɩ Bɛɛr-Seba dɩ kʋ nawuurə yam wʋnɩ. 28 Ba badonnǝ ta zʋʋrɩ Zikalagɩ nɩ, dɩ Mekona dɩ kʋ nawuurə yam wʋnɩ, 29 dɩ En-Rimɔn nɩ, dɩ Zʋra nɩ, dɩ Yarmuti nɩ, 30 dɩ Zanoa nɩ, dɩ Adulamɩ nɩ, dɩ tɩɩnɩ dɩm kʋntʋ nawuurə yam wʋnɩ. Ba ta maa zʋʋrɩ Lakisi nɩ, dɩ karɩ sɩlʋ na bwələ da tɩn wʋnɩ. Badonnǝ maa zʋʋrɩ Azeka dɩ kʋ nawuurə yam wʋnɩ. Kʋ maa brɩ nɩ Zuda tiinə bam dɛɛn zʋʋrɩ laŋa kalʋ na tigi Bɛɛr-Seba nɩ, sɩ kʋ taa ve Hinom bolo kʋm seeni tɩn mʋ.
31 Kʋ na yɩ Bɛnzamɛn dwi tiinə bam, ba dɛɛn zʋʋrɩ Geba tɩʋ nɩ, dɩ Mikimasɩ nɩ, dɩ Aya nɩ, dɩ Betɛlɩ dɩ kʋ nawuurə yam wʋnɩ, 32 dɩ Anatɔtɩ nɩ, dɩ Nobi nɩ, dɩ Ananɩa nɩ, 33 dɩ Hazora nɩ, dɩ Rama nɩ, dɩ Gitayim nɩ, 34 dɩ Hadida nɩ, dɩ Zeboyim nɩ, dɩ Nebalatɩ nɩ, 35 dɩ Lɔdɩ nɩ, dɩ Ono nɩ, dɩdaanɩ Gwarʋ bolo kʋm nɩ mʋ.
36 Ba dɛɛn ma pa Levi dwi dɩm sɔ-yuni tɩdonnǝ ya na zʋʋrɩ Zuda provɛnsɩ dɩm nɩ tɩn vu ba zʋʋrɩ dɩ Bɛnzamɛn tiinə bam.