10
Hakalia bu Nehemi na yɩ tɩʋ kʋm dɩdɛɛrʋ tɩn ma da yigə sɩ o zi o jɩŋa. Kaanɩm tiinə bantʋ dɩ ma tɔgɩ ba zi ba jɩn:Zedɩkɩa,
2 dɩ Seraya, dɩ Azarɩa, dɩ Zeremi,
3 dɩ Pasuuri, dɩ Amari, dɩ Malkiya,
4 dɩ Atusi, dɩ Sebanɩa, dɩ Maluki,
5 dɩ Harim, dɩ Meremɔtɩ, dɩ Abdɩasɩ,
6 dɩ Daniyɛlɩ, dɩ Ginetoni, dɩ Baruki,
7 dɩ Mesulam, dɩ Abɩa, dɩ Miyamina,
8 dɩ Maazɩa, dɩ Biligayi, dɩ Semaya.
Ba maama dɛɛn yɩ kaanɩm tiinə mʋ.
9 Levi tiinə bantʋ dɩ ma da ba zi ba jɩn:
Azanɩa bu Zozwe,
dɩ Enadadɩ na tɔgɩ o wʋ Enadadɩ biə bam wʋnɩ tɩn,
dɩ Kadimeli,
10 dɩ bantʋ kwaga kam maama:
Sebanɩa, dɩ Odiya, dɩ Kelita, dɩ Pelaya, dɩ Hanan,
11 dɩ Mise, dɩ Rehɔbɩ, dɩ Hasabia,
12 dɩ Zakuri, dɩ Serebia, dɩ Sebanɩa,
13 dɩ Odiya, dɩ Bani, dɩ Beninu.
14 Yisɩrayɛlɩ yigǝ tiinǝ balʋ dɩ na dɛ ba zi ba jɩn tɩn mʋ tɩntʋ:
Parʋsɩ, dɩ Pahat-Moabɩ, dɩ Elam, dɩ Zaatu, dɩ Bani,
15 dɩ Bunni, dɩ Azagadɩ, dɩ Bebayi,
16 dɩ Adoniya, dɩ Bigavayi, dɩ Adin,
17 dɩ Atera, dɩ Ezekɩasɩ, dɩ Azuuri,
18 dɩ Odiya, dɩ Hasum, dɩ Bezayi,
19 dɩ Harifa, dɩ Anatɔtɩ, dɩ Nebayi,
20 dɩ Magɩpɩasɩ, dɩ Mesulam, dɩ Hezira,
21 dɩ Mesezabɛɛlɩ, dɩ Sadoki, dɩ Yadʋa,
22 dɩ Pelatɩa, dɩ Hanan, dɩ Anaya,
23 dɩ Oze, dɩ Hanania, dɩ Hasubi,
24 dɩ Alohɛsɩ, dɩ Pilisa, dɩ Sobeka,
25 dɩ Rehumi, dɩ Hasabɩna, dɩ Maaseya,
26 dɩ Asiya, dɩ Hanan, dɩ Ananɩ,
27 dɩ Maluki, dɩ Harim, dɩ Baana.
Ni-mɔrɔ dɩm
28 Dɩbam Yisɩrayɛlɩ tiinə balʋ maama na daarɩ tɩn dɩ tɔgɩ dɩ́ ni-mɔrɔ:
Wɛ kaanɩm tiinə bam,
dɩ Levi tiinə bam,
dɩ Wɛ-digə ni-yɩrɩna bam,
dɩ Wɛ-digə lən-leenə bam,
dɩ Wɛ-digə tɩntʋŋna bam,
dɩdaanɩ dɩbam balʋ maama na tɔgɩ Wɛ niə yam yɩ dɩ́ pɔɔrɩ dɩ́ tɩtɩ dɩ vərə balʋ na wʋ tɩga kantʋ nɩ tɩn,
dɩ dɩ́ kaana bam,
dɩ dɩ́ biə balʋ maama na jɩgɩ yi-pʋrʋ tɩn.
29 Dɩbam maama mʋ tɔgɩ dɩ dɩ́ yigǝ tiinǝ sɩ dɩ́ goni ni dɩntʋ dɩm:
Dɩ́ nan dugi nɩ: dɩ́ wʋ́ sɛ Wɛ niə yalʋ DƖ na dɛ DƖ tɩntʋŋnʋ Moyisi baŋa DƖ pa dɩbam tɩn. Dɩ́ sɛ sɩ dɩ́ tɔgɩ dɩbam Tu Baŋa-Wɛ cwe sɩm dɩ cullu tɩlʋ maama DƖ na brɩ dɩbam tɩn. Lɛɛrʋ taa wʋ dɩ́ baŋa nɩ nɩnɛɛnɩ dɩ́ na wʋ kɩ kʋntʋ.
30 Dɩ́ goni ni nɩ dɩbam bu-baara bá kwe tɩga kantʋ bukwa ba ma ji ba kaana, dɩbam dɩ nan bá pa-ba dɩ́ bukwa sɩ ba di ba ma kɩ ba kaana.
31 Kʋ na yɩ Wɛ siun dɛ dɩm, naa dɩ́ candi da yam nɩ, vərə na jaanɩ ba zɩla ba ba sɩ ba yəgi ba pa dɩbam, dɩ́ bá kɩ pipiu dɩ ba.a
Bɩna yarpɛ maama wʋnɩ, bɩnɩ dɩdʋa mʋ dɩ́ wʋ́ yɔɔrɩ dɩ́ yagɩ dɩ́ kaagɩ sɩ sɩ pəni sɩ sin. Dɩ́ ta maa wʋ́ kwe dɩ́ cɛ balʋ na jɩgɩ dɩ́ jɩna tɩn.
32 Dɩ́ nan wʋ́ fɩn dɩ́ tɩtɩ sɩ dɩ́ la səbu sɩ dɩ́ kwe dɩ́ kwɛ Wɛ-digə kam. Nɔɔnʋ maama wʋ́ ŋwɩ səbu sɩ kʋ maŋɩ dɩdaanɩ sɛkɛlɩ cicoro mʋ.b 33 Kʋntʋ wʋ́ pa zɩla yalʋ maama na maŋɩ dɩ Wɛ-digə kam tɩtʋŋa tɩn taa wʋra maŋa maama: kʋ maa yɩ dɩpɛ dɩlʋ ba na tigisi Wɛ ŋwaanɩ tɩn mʋ, dɩdaanɩ dɛ maama wʋnɩ wʋdiu pɛɛra yam, dɩ vara zwɛɛm pɛɛra yam, dɩ Wɛ siun dɛ pɛɛra yam, dɩ can-dʋŋa pɛɛra yam, dɩ candi sɩdonnə pɛɛra yam, dɩ Yisɩrayɛlɩ tiinə lwarɩm saarɩm pɛɛra yam, dɩ pɛɛra yalʋ maama ba na wʋ́ ma ba zuli Wɛ tɩn.
34 Bɩnɩ maama wʋnɩ dɩbam Yisɩrayɛlɩ tiinə bam, dɩ dɩ́ kaanɩm tiinə bam, dɩ Levi tiinə bam wʋ́ ta jɔrɔ sɩ dɩ́ lwarɩ maŋa kalʋ dwi dɩ dwi kʋlʋ na wʋ́ taa jaanɩ dɛ ba tui Wɛ-digə kam wʋnɩ tɩn. Baá yǝni ba kwe dɛ sɩm kʋntʋ ba ma zwɛ wǝǝnu mʋ ba kɩ kaanɩm dɩ Tu Baŋa-Wɛ bimbim dɩm baŋa nɩ, nɩnɛɛnɩ Wɛ niə yam na brɩ te tɩn.
35 Dɩ́ ta goni ni nɩ: bɩnɩ maama wʋnɩ dɩ́ wʋ́ yǝni dɩ́ kuri dɩ́ karɩ wʋdiiru dɩ dɩ́ tweeru biə balʋ na dɛ yigə ba kɩ tɩn wʋnɩ dɩ́ ja dɩ́ ba Baŋa-Wɛ digə kam wʋnɩ.c 36 Dɩ́ ta wʋ́ kɩ Wɛ niə yam na brɩ te tɩn yɩ dɩ́ ja dɩ́ bu-kwɩn sɩlʋ na yɩ baara tɩn dɩ́ ba Wɛ-digə kam wʋnɩ sɩ kaanɩm tiinə balʋ na tʋŋɩ da tɩn pɔɔrɩ-ba Wɛ ŋwaanɩ, sɩ dɩ́ daarɩ dɩ́ ja dɩ́ varɩ wo-bɛ kwɩn sɩm dɩ dɩ́ ba dɩ́ pa Baŋa-Wɛ.d 37 Dɩbam ta wʋ́ ja dɩ́ karɩ wʋdiiru tɩlʋ maama na puli sɩ tɩ bɩ tɩn dɩ́ ba Wɛ-digə kam wʋnɩ. Kʋ na yɩ muni, dɩ mɩna, dɩ tweeru biə, dɩ vinyə dɩvɛn, dɩ Olivi tiu nugə, dɩ́ wʋ́ kwe-tɩ dɩ́ pa Wɛ kaanɩm tiinə bam. Wʋdiiru tɩlʋ maama dɩ́ na nɛ tɩn, dɩ́ nan wʋ́ pɔɔrɩ tɩ fugə wʋnɩ pʋpwara kam dɩ́ pa Levi tiinə bam na wʋ dɩ́ tɩɩnɩ dɩm wʋnɩ tɩn. Bɛŋwaanɩ, pʋpwara kam wʋra bantʋ ŋwaanɩ mʋ.e 38 Levi tiinə na yǝni ba lagɩ ba joŋi wʋdiiru pʋpwara kam kʋntʋ, sɩ Arɔn dwi dɩm kaanɩm tiinə bam wʋnɩ dɩdʋa taa zɩgɩ da o niə. Levi tiinə bam laan wʋ́ lɩ tɩ fugə wʋnɩ pʋpwara dɩdʋa ba ja vu Zeruzalɛm Wɛ-digə kam nɩ ba tiŋi-tɩ da. 39 Kʋntʋ tɩn, Yisɩrayɛlɩ tiinə dɩ Levi tiinə bam na yǝni ba ja ba wʋdiiru pɛɛra, dɩ ba vinyə dɩvɛn pɛɛra, dɩ ba Olivi nugə pɛɛra yam ba vu Wɛ-digə kam nɩ, baá zɩgɩ-tɩ ka di sɩm wʋnɩ mʋ, mɛ Wɛ-digə tɩtʋŋa zɩla yam na wʋra tɩn. Kʋ maa yɩ je sɩlʋ Wɛ kaanɩm tiinə balʋ tɩtʋŋa maŋa na yi tɩn, dɩ Wɛ-digə ni-yɩrɩna bam, dɩ lən-leenə bam na zʋʋrɩ tɩn mʋ.
Dɩ́ bʋrɩ nɩ dɩ́ yigə wʋ́ taa wʋ Wɛ-digə kam wʋnɩ yɩ dɩ́ bá yagɩ-ka.